၅. တဒ္ဓိတကပ္ပ
အဋ္ဌမကဏ္ဍ
၃၄၄. ၊ ၃၆၁. ဝါဏ’ပစ္စေ.
ဏပစ္စယော ဟောတိ ဝါ ‘‘တဿာပစ္စ’’ မိစ္စေတသ္မိံ အတ္ထေ.
ဝသိဋ္ဌဿ အပစ္စံ ဝါသိဋ္ဌော၊ ဝသိဋ္ဌဿ အပစ္စံ ဝါ၊ ဝသိဋ္ဌဿ အပစ္စံ ဝါသိဋ္ဌီ၊ ဝသိဋ္ဌဿ အပစ္စံ ဝါသိဋ္ဌံ. ဧဝံ ဘာရဒွါဇော၊ ဘာရဒွါဇီ၊ ဘာရဒွါဇံ. ဂေါတမော၊ ဂေါတမီ၊ ဂေါတမံ. ဝါသုဒေဝေါ၊ ဝါသုဒေဝီ၊ ဝါသုဒေဝံ. ဗာလဒေဝေါ၊ ဗာလဒေဝီ၊ ဗာလဒေဝံ. ဝေသာမိတ္တော၊ ဝေသာမိတ္တီ ဝေသာမိတ္တံ.
၃၄၅. ၊ ၃၆၆. ဏာယန ဏာန ဝစ္ဆာဒိတော.
တသ္မာ ဝစ္ဆာဒိတော ဂေါတ္တဂဏတော ဏာယနဏာနပစ္စယာ ဟောန္တိ ဝါ ‘‘တဿာပစ္စ’’မိစ္စေတသ္မိံ အတ္ထေ.
ဝစ္ဆဿ အပစ္စံဝစ္ဆာယနော၊ ဝစ္ဆာနော၊ ဝစ္ဆဿ အပစ္စံ ဝါ၊ ဝစ္ဆဿ အပစ္စံ ဝစ္ဆာယနီ၊ ဝစ္ဆာနီ၊ ဝစ္ဆဿ အပစ္စံ ဝစ္ဆာယနံ၊ ဝစ္ဆာနံ. သကဋဿ အပစ္စံ သာကဋာယနော၊ သာကဋာနော၊ သကဋဿ အပစ္စံ ဝါ၊ သာကဋာယနီ၊ သာ ကဋာနီ၊ သာကဋာယနံ၊ သာကဋာနံ. ဧဝံ ကဏှာယနော၊ ကဏှာနော၊ ကဏှဿ အပစ္စံ ဝါ. ကဏှာယနီ၊ ကဏှာနီ၊ ကဏှာယနံ၊ ကဏှာနံ. အဂ္ဂိဝေဿာယနော၊ အဂ္ဂိဝေဿာနော၊ အဂ္ဂိဝေဿာယနီ၊ အဂ္ဂိဝေဿာနီ၊ အဂ္ဂိဝေဿာယနံ၊ အဂ္ဂိဝေဿာနံ. ဂစ္ဆာယနော၊ ဂစ္ဆာနော၊ ဂစ္ဆာယနီ၊ ဂစ္ဆာနီ၊ ဂစ္ဆာယနံ၊ ဂစ္ဆာနံ. ကပ္ပါယနော၊ ကပ္ပါနော၊ ကပ္ပါယနီ၊ ကပ္ပါနီ၊ ကပ္ပါယနံ၊ ကပ္ပါနံ. မောဂ္ဂလ္လာယနော၊ မောဂ္ဂလ္လာနော၊ မောဂ္ဂလ္လာယနီ၊ မောဂ္ဂလ္လာနီ၊ မောဂ္ဂလ္လာယနံ၊ မောဂ္ဂလ္လာနံ. မုဉ္စာယနော၊ မုဉ္စာနော၊ မုဉ္စာယနီ၊ မုဉ္စာနီ၊ မုဉ္စာယနံ၊ မုဉ္စာနံ. သံဃာယနော၊ သံဃာနော၊ သံဃာယနီ၊ သံဃာနီ၊ သံဃာယနံ၊ သံဃာနံ. လောမာယနော၊ လောမာနော၊ လောမာယနီ၊ လောမာနီ၊ လောမာယနံ၊ လောမာနံ၊ သာကမာယနော၊ သာကမာနော၊ သာကမာယနီ၊ သာကမာနီ၊ သာကမာယနံ၊ သာကမာနံ. နာရာယနော၊ နာရာနော၊ နာရာယနီ၊ နာရာနီ၊ နာရာယနံ၊ နာရာနံ. စောရာယနောစောရာနော၊ စောရာယနီ၊ စောရာနီ၊ စောရာယနံ၊ စောရာနံ၊ အာဝသာလာယနော၊ အာဝသာလာနော၊ အာဝသာလာယနီ၊ အာဝသာလာနီ၊ အာဝသာလာယနံ၊ အာဝသာလာနံ. ဒွေပါယနော၊ ဒွေပါနော၊ ဒွေပါယနီ၊ ဒွေပါနီ၊ ဒွေပါယနံ၊ ဒွေပါနံ. ကုဉ္စာယနော၊ ကုဉ္စာနော၊ ကုဉ္စာယနီ၊ ကုဉ္စာနီ၊ ကုဉ္စာယနံ၊ ကုဉ္စာနံ. ကစ္စာယနော၊ ကစ္စာနော၊ ကစ္စာယနီ၊ ကစ္စာနီ၊ ကစ္စာယနံ၊ ကစ္စာနံ.
၃၄၆. ၊ ၃၆၇. ဏေယျော ကတ္တိကာဒီဟိ.
တေဟိ ဂေါတ္တဂဏေဟိ ကတ္တိကာဒီဟိ ဏေယျပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ.
ကတ္တိကာယ အပစ္စံ ကတ္တိကေယျော၊ ကတ္တိကာယ အပစ္စံ ဝါ. ဧဝံ ဝေနတေယျော၊ ရောဟိဏေယျော၊ ဂင်္ဂေယျော၊ ကဒ္ဒမေယျော၊ နာဒေယျော၊ အာလေယျော၊ အာဟေယော၊ ကာမေယျော၊ သုစိယာ အပစ္စံ သောစေယျော၊ သာလေယျော၊ ဗာလေယျော၊ မာလေယျော၊ ကာလေယျော.
၃၄၇. ၊ ၃၆၈. အတော ဏိ ဝါ.
တသ္မာ အကာရတော ဏိပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ.
ဒက္ခဿ အပစ္စံ ဒက္ခိ၊ ဒက္ခဿ အပစ္စံ ဝါ. ဒုဏဿ အပစ္စံ ဒေါဏိ၊ ဒုဏဿ အပစ္စံ ဝါ၊ ဧဝံ ဝါသဝိ၊ သကျပုတ္တိ၊ နာဋပုတ္တိ၊ ဒါသပုတ္တိ၊ ဒါသဝိ၊ ဝါရုဏိ၊ ဂဏ္ဍိ၊ ဗာလဒေဝိ၊ ပါဝကိ၊ ဇေနဒတ္တိ၊ ဗုဒ္ဓိ၊ ဓမ္မိ၊ သံဃိ၊ ကပ္ပိ၊ အနုရုဒ္ဓိ.
ဝါတိ ဝိကပ္ပနတ္ထေန ဏိကပစ္စယော ဟောတိ ‘‘တဿာပစ္စ’’မိစ္စေတသ္မိံ အတ္ထေ. သကျပုတ္တဿ အပစ္စံ သကျပုတ္တိကော. ဧဝံ နာဋပုတ္တိကော၊ ဇေနဒတ္တိကော.
၁၄၈. ၊ ၃၇၁. ဏဝေါ’ ပကွာဒီဟိ.
ဥပကုဣစ္စေဝမာဒီဟိ ဏဝပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ.
ဥပကုဿ အပစ္စံ ဩပကဝေါ၊ ဥပကုဿ အပစ္စံ ဝါ. မနုနော အပစ္စံ မာနဝေါ၊ မနုနော အပစ္စံ ဝါ. ဘဂ္ဂုဿ အပစ္စံ ဘဂ္ဂဝေါ၊ ဘဂ္ဂုဿ အပစ္စံ ဝါ၊ ပဏ္ဍုဿ အပစ္စံ ပဏ္ဍဝေါ၊ ပဏ္ဍုဿ အပစ္စံ ဝါ၊ ဗဟုဿ အပစ္စံ ဗာဟဝေါ၊ ဗဟုဿ အပစ္စံ ဝါ.
၃၄၉. ၊ ၃၇၂. ဏေရ ဝိဓဝါဒိတော.
တသ္မာ ဝိဓဝါဒိတော ဏေရပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ.
ဝိဓဝါယ အပစ္စံ ဝေဓဝေရော၊ ဝိဓဝါယ အပစ္စံ ဝါ. ဗန္ဓုကိယာ အပစ္စံ ဗန္ဓုကေရော၊ ဗန္ဓုကိယာ အပစ္စံ ဝါ. သမဏဿ အပစ္စံ သာမဏေရော၊ သမဏဿ အပစ္စံ ဝါ. ဧဝံ သာမဏေရီ၊ သာမဏေရံ၊ နာဠိကေရော၊ နာဠိကေရီ၊ နာဠိကေရံ.
၃၅၀. ၊ ၃၇၃. ယေန ဝါ သံသဋ္ဌံ တရတိ စရတိ ဝဟတိ ဏိကော.
ယေန ဝါ သံသဋ္ဌံ၊ ယေန ဝါ တရတိ၊ ယေန ဝါ စရတိ၊ ယေန ဝါ ဝဟတိ ဣစ္စေတေသွတ္ထေသု ဏိကပစ္စယော ဟောတိ ဝါ.
တိလေန သံသဋ္ဌံ ဘောဇနံ တေလိကံ၊ တိလေန သံသဋ္ဌံ ဝါ. ဧဝံ ဂေါဠိကံ၊ ဃာတိကံ.
နာဝါယ တရတီတိ နာဝိကော၊ နာဝါယ တရတိ ဝါ. ဧဝံ ဩဠုမ္ပိကော.
သကဋေန စရတီတိ သာကဋိကော၊ သကဋေန စရတိ ဝါ. ဧဝံ ပတ္တိကော၊ ဒဏ္ဍိကော၊ ဓမ္မိကော၊ ပါဒိကော.
သီသေန ဝဟတီတိ သီသိကော၊ သီသေန ဝဟတိ ဝါ. အံသေန ဝဟတီတိ အံသိကော၊ အံသေန ဝဟတိ ဝါ. ဧဝံ ခန္ဓိကော၊ အင်္ဂုလိကော.
ဝါတိ ဝိကပ္ပနတ္ထေန အညေသုပိ ဏိကပစ္စယော ဟောတိ. ရာဇဂဟေ ဝသတီတိ ရာဇဂဟိကော၊ ရာဇဂဟေ ဝသတိ ဝါ. ရာဇဂဟေ ဇာတော ရာဇဂဟိကော၊ ရာဇဂဟေ ဇာတော ဝါ. ဧဝံ မာဂဓိကော၊ သာဝတ္ထိကော၊ ကာပိလ ဝတ္ထိကော၊ ပါဋလိပုတ္တိကော၊ ဝေသာလိကော.
၃၅၁. ၊ ၃၇၄. တမဓီတေ တေနကတာဒိ သန္နိဓာန နိယောဂ သိပ္ပ ဘဏ္ဍ ဇီဝိကတ္ထေသု စ.
တမဓီတေ၊ တေနကတာဒိအတ္ထေ၊ တမှိ သန္နိဓာနာ၊ တတ္ထ နိယုတ္တော၊ တမဿ သိပ္ပံ၊ တမဿ ဘဏ္ဍံ၊ တမဿ ဇီဝိကံ ဣစ္စေတေသွတ္ထေသု စ ဏိကပစ္စယော ဟောတိ ဝါ.
ဝိနယမဓီတေ ဝေနယိကော၊ ဝိနယမဓီတေ ဝါ. ဧဝံ သုတ္တန္တိကော၊ အာဘိဓမ္မိကော၊ ဝေယျာကရဏိကော.
ကာယေန ကတံ ကမ္မံ ကာယိကံ၊ ကာယေန ကတံ ကမ္မံ ဝါ. ဧဝံ ဝါစသိကံ၊ မာနသိကံ.
သရီရေ သန္နိဓာနာ ဝေဒနာ သာရီရိကာ၊ သရီရေ သန္နိဓာနာ ဝါ၊ ဧဝံ မာနသိကာ.
ဒွါရေ နိယုတ္တော ဒေါဝါရိကော၊ ဒွါရေ နိယုတ္တော ဝါ. ဧဝံ ဘဏ္ဍာဂါရိကော၊ နာဂရိကော၊ နာဝကမ္မိကော.
ဝီဏာ အဿ သိပ္ပံ ဝေဏိကော၊ ဝီဏာ အဿ သိပ္ပံ ဝါ. ဧဝံ ပါဏဝိကော၊ မောဒိင်္ဂိကော၊ ဝံသိကော.
ဂန္ဓော အဿ ဘဏ္ဍံ ဂန္ဓိကော၊ ဂန္ဓော အဿ ဘဏ္ဍံ ဝါ. ဧဝံ တေလိကော၊ ဂေါဠိကော.
ဥရဗ္ဘံ ဟန္တွာ ဇီဝတီတိ ဩရဗ္ဘိကော၊ ဥရဗ္ဘံ ဟန္တွာ ဇီဝတိ ဝါ. မဂံ ဟန္တွာ ဇီဝတီတိ မာဂဝိကော၊ မဂံ ဟန္တွာ ဇီဝတိ ဝါ. ဧဝံ သောကရိကော၊ သာကုဏိကော.
အာဒိဂ္ဂဟဏေန အညတ္ထာပိ ဏိက ပစ္စယော ယောဇေတဗ္ဗော. ဇာလေန ဟတော ဇာလိကော၊ ဇာလေန ဟတော ဝါ.
သုတ္တေန ဗန္ဓော သုတ္တိကော၊ သုတ္တေန ဗန္ဓော ဝါ.
စာပေါ အဿ အာဝုဓော စာပိကော၊ စာပေါ အဿ အာဝုဓော ဝါ. ဧဝံ တောမရိကော၊ မုဂ္ဂရိကော၊ မောသလိကော.
ဝါတော အဿ အာဗာဓော ဝါတိကော၊ ဝါတော အဿ အာဗာဓော ဝါ. ဧဝံ သေမှိကော၊ ပိတ္တိကော.
ဗုဒ္ဓေ ပသန္နော ဗုဒ္ဓိကော၊ ဗုဒ္ဓေ ပသန္နော ဝါ. ဧဝံ ဓမ္မိကော၊ သံဃိကော.
ဗုဒ္ဓဿ သန္တကံ ဗုဒ္ဓိကံ၊ ဗုဒ္ဓဿ သန္တကံ ဝါ. ဧဝံ ဓမ္မိကံ၊ သံဃိကံ.
ဝတ္ထေန ကီတံ ဘဏ္ဍံ ဝတ္ထိကံ၊ ဝတ္ထေန ကီတံ ဘဏ္ဍံ ဝါ. ဧဝံ ကုမ္ဘိကံ၊ ဖာလိကံ၊ ကိံ ကဏိကံ၊ သောဝဏ္ဏိကံ.
ကုမ္ဘော အဿ ပရိမာဏံ ကုမ္ဘိကံ၊ ကုမ္ဘော အဿ ပရိမာဏံ ဝါ.
ကုမ္ဘဿ ရာသိ ကုမ္ဘိကံ၊ ကုမ္ဘဿ ရာသိ ဝါ.
ကုမ္ဘံ အရဟတီတိ ကုမ္ဘိကော၊ ကုမ္ဘံ အရဟတိ ဝါ.
အက္ခေန ဒိဗ္ဗတီတိ အက္ခိကော၊ အက္ခေန ဒိဗ္ဗတိ ဝါ. ဧဝံ သာလာကိကော၊ တိန္ဒုကိကော၊ အမ္ဗဖလိကော. ကပိဋ္ဌဖလိကော၊ နာဠိကေရိကော ဣစ္စေဝမာဒိ.
၃၅၂. ၊ ၃၇၆. ဏ ရာဂါ တဿေ ဒမညတ္ထေသု စ.
ဏပစ္စယော ဟောတိ ဝါ ရာဂမှာ ‘‘တေန ရတ္တံ’’ ဣစ္စေတသ္မိံ အတ္ထေ၊ ‘‘တဿေဒံ’’ အညတ္ထေသု စ.
ကသာဝေန ရတ္တံ ဝတ္ထံ ကာသာဝံ၊ ကသာဝေန ရတ္တံ ဝတ္ထံ ဝါ. ဧဝံ ကောသုမ္ဘံ၊ ဟာလိဒ္ဒံ၊ ပါဋင်္ဂံ၊ ရတ္တင်္ဂ၊ မဉ္ဇိဋ္ဌံ၊ ကုင်္ကုမံ.
သူကရဿ ဣဒံ မံသံ သောကရံ၊ သူကရဿ ဣဒံ မံသံ ဝါ. ဧဝံ မာဟိသံ.
ဥဒုမ္ဗရဿ အဝိဒူရေ ပဝတ္တံ ဝိမာနံ ဩဒုမ္ဗရံ၊ ဥဒုမ္ဗရဿ အဝိဒူရေ ပဝတ္တံ ဝိမာနံ ဝါ.
ဝိဒိသာယ အဝိဒူရေ နိဝါသော ဝေဒိသော၊ ဝိဒိသာယ အဝိဒူရေ နိဝါသော ဝါ.
မထုရာယ ဇာတော မာထုရော၊ မထုရာယ ဇာတော ဝါ.
မထုရာယ အာဂတော မာထုရော၊ မထုရာယ အာဂတော ဝါ.
ကတ္တိကာယ နိယုတ္တော မာသော ကတ္တိကော၊ ကတ္တိကာယ နိယုတ္တော မာသော ဝါ. ဧဝံ မာဂသိရော၊ ဖုဿော၊ မာဃော၊ ဖဂ္ဂုနော၊ စိတ္တော၊ ဝေသာခေါ၊ ဇေဋ္ဌော၊ အာသဠှော၊ သာဝဏော၊ ဘဒ္ဒေါ၊ အဿယုဇော.
န ဝုဒ္ဓိ နီလပီတာဒေါ၊ ပစ္စယေ သဏကာရကေ.
ဖကာရော ဖုဿသဒ္ဒဿ၊ ‘‘သိရော’’တိ သိရသံ ဝဒေ.
သိက္ခာနံ သမူဟော သိက္ခော၊ ဘိက္ခာနံ သမူဟော ဘိက္ခော. ဧဝံ ကာပေါတော၊ မာယူရော၊ ကောကိလော.
ဗုဒ္ဓေ၊ အဿ ဒေဝတာ ဗုဒ္ဓေါ. ဧဝံ ဘဒ္ဒေါ၊ မာရော၊ မာဟိန္ဒော၊ ဝေဿဝဏော၊ ယာမော၊ သောမော၊ နာရာယဏော.
သံဝစ္ဆရမဓီတေ သံဝစ္ဆရော. ဧဝံ မောဟုတ္တော၊ နေမိတ္တော၊ အင်္ဂဝိဇ္ဇော၊ ဝေယျာကရဏော၊ ဆန္ဒော၊ ဘာဿော၊ စန္ဒော.
ဝသာဒါနံ ဝိသယော ဒေသော ဝါသာဒေါ. ဧဝံ ကုမ္ဘော၊ သာကုန္တော၊ အာတိသာရော.
ဥဒုမ္ဗရာ အသ္မိံ ပဒေသေ သန္တီတိ ဩဒုမ္ဗရော. သာဂရေဟိ နိဗ္ဗတ္တော သာဂရော. သာဂလမဿ နိဝါသော သာဂလော. မထုရာ အဿ နိဝါသော မာထုရော. မထုရာယ ဣဿရော မာထုရော. ဣစ္စေဝမာဒယော ယောဇေတဗ္ဗာ.
၃၅၃. ၊ ၃၇၈. ဇာတာဒီနမိမိယာ စ.
ဇာတဣစ္စေဝမာဒီနမတ္ထေ ဣမဣယပစ္စယာ ဟောန္တိ.
ပစ္ဆာ ဇာတော ပစ္ဆိမော. ဧဝံ အန္တိမော၊ မဇ္ဈိမော၊ ပုရိမော၊ ဥပရိမော၊ ဟေဋ္ဌိမော၊ ဂေါပ္ဖိမော. ဗောဓိသတ္တဇာတိယာ ဇာတော ဗောဓိသတ္တဇာတိယော၊ ဧဝံ အဿဇာတိယော၊ ဟတ္ထိဇာတိယော၊ မနုဿဇာတိယော.
အာဒိဂ္ဂဟဏေန နိယုတ္တတ္ထာဒိတောပိ တဒဿတ္ထာဒိတောပိ ဣမ ဣယ ဣက ဣစ္စေတေ ပစ္စယာ ဟောန္တိ. အန္တော နိယုတ္တော အန္တိမော. ဧဝံ အန္တိယော၊ အန္တိကော.
ပုတ္တော အဿ အတ္ထိ၊ တသ္မိံ ဝါ ဝိဇ္ဇတီတိ ပုတ္တိမော. ဧဝံ ပုတ္တိယေဝ၊ ပုတ္တိကော၊ ကပ္ပိမော၊ ကပ္ပိယော၊ ကပ္ပိကော.
စဂ္ဂဟဏေန ကိယပစ္စယော ဟောတိ နိယုတ္တတ္ထေ. ဇာတိယံ နိယုတ္တော ဇာတိကိယော၊ အန္ဓေ နိယုတ္တော အန္ဓကိယော၊ ဇာတိယာ အန္ဓော ဇစ္စန္ဓော၊ ဇစ္စန္ဓေ နိယုတ္တော ဇစ္စန္ဓကိယော.
၃၅၄. ၊ ၃၇၉. သမူဟတ္ထေ ကဏ ဏာ.
သမူဟတ္ထေ ကဏ ဏဣစ္စေတေ ပစ္စယာ ဟောန္တိ.
ရာဇပုတ္တာနံ သမူဟော ရာဇပုတ္တကော. ဧဝံ ရာဇပုတ္တော၊ မာနုဿကော၊ မာနုဿော၊ မာယူရကော၊ မာယူရော၊ မာဟိံသကော၊ မာဟိံသော.
၃၅၅. ၊ ၃၈၀. ဂါမ ဇန ဗန္ဓု သဟာယာဒီဟိတာ.
ဂါမ ဇန ဗန္ဓု သဟာယဣစ္စေဝမာဒီဟိ တာပစ္စယော ဟောတိ သမူဟတ္ထေ.
ဂါမာနံ သမူဟော ဂါမတာ. ဧဝံ ဇနတာ၊ ဗန္ဓုတာ၊ သဟာယတာ၊ နဂရတာ.
၃၅၆. ၊ ၃၈၁. တဒဿ ဌာနမိယော စ.
‘‘တဒဿ ဌာန’’ မိစ္စေတသ္မိံ အတ္ထေ ဣယပစ္စယော ဟောတိ.
မဒနဿ ဌာနံ မဒနိယံ၊ ဗန္ဓနဿ ဌာနံ ဗန္ဓနိယံ၊ မုစ္ဆနဿ ဌာနံ မုစ္ဆနိယံ၊ ဧဝံ ရဇနိယံ၊ ကမနိယံ၊ ဂမနိယံ၊ ဒုဿနိယံ၊ ဒဿနိယံ.
၃၅၇. ၊ ၃၈၂. ဥပမတ္ထာယိတတ္တံ.
ဥပမတ္ထေ အာယိတတ္တပစ္စယော ဟောတိ.
ဓူမော ဝိယ ဒိဿတိ အဒုံ ဝနံ တဒိဒံ ဓူမာယိတတ္တံ၊ တိမိရံ ဝိယ ဒိဿတိ အဒုံ ဝနံ တဒိဒံ တိမိရာယိတတ္တံ.
၃၅၈. ၊ ၃၈၃. တန္နိဿိတတ္ထေ လော.
‘‘တန္နိဿိတတ္ထေ၊ တဒဿ ဌာန’’မိစ္စေတသ္မိံ အတ္ထေ စ လပစ္စယော ဟောတိ.
ဒုဋ္ဌု နိဿိတံ ဒုဋ္ဌုလ္လံ၊ ဝေဒံ နိဿိတံ ဝေဒလ္လံ၊ ဒုဋ္ဌု ဌာနံ ဒုဋ္ဌုလ္လံ၊ ဝေဒဿ ဌာနံ ဝေဒလ္လံ.
၃၅၉. ၊ ၃၈၄. အာလု တဗ္ဗဟုလေ.
အာလုပစ္စယော ဟောတိ တဗ္ဗဟုလတ္ထေ.
အဘိဇ္ဈာ အဿ ပကတိ အဘိဇ္ဈာလု၊ အဘိဇ္ဈာ အဿ ဗဟုလာ ဝါ အဘိဇ္ဈာလု. ဧဝံ သီတာလု၊ ဓဇာလု၊ ဒယာလု.
၃၆၀. ၊ ၃၈၇. ဏျ တ္တ တာ ဘာဝေ တု.
ဏျတ္တတာဣစ္စေတေ ပစ္စယာ ဟောန္တိ ဘာဝတ္ထေ.
အလသဿ ဘာဝေါ အာလသျံ၊ အရောဂဿ ဘာဝေါ အာရောဂျံ. ပံသုကူလိကဿ ဘာဝေါ ပံသုကူလိကတ္တံ၊ အနောဒရိကဿ ဘာဝေါ အနောဒရိကတ္တံ. သင်္ဂဏိကာရာမဿ ဘာဝေါ သင်္ဂဏိကာရာမတာ၊ နိဒ္ဒါရာမဿ ဘာဝေါ နိဒ္ဒါရာမတာ.
တုဂ္ဂဟဏေန တ္တနပစ္စယော ဟောတိ. ပုထုဇ္ဇနတ္တနံ၊ ဝေဒနတ္တနံ.
၃၆၁. ၊ ၃၈၈. ဏ ဝိသမာဒီဟိ.
ဏပစ္စယော ဟောတိ ဝိသမာဒီဟိ ‘‘တဿ ဘာဝေါ’’ဣစ္စေတသ္မိံ အတ္ထေ.
ဝိသမဿ ဘာဝေါ ဝေသမံ၊ သုစိဿ ဘာဝေါ သောစံ.
၃၆၂. ၊ ၃၈၉. ရမဏီယာဒိတော ကဏ.
ရမဏီယဣစ္စေဝမာဒိတော ကဏ ပစ္စယော ဟောတိ ‘‘တဿ ဘာဝေါ’’ဣစ္စေတသ္မိံ အတ္ထေ.
ရမဏီယဿ ဘာဝေါ ရာမဏီယကံ၊ မနုညဿ ဘာဝေါ မာနုညကံ.
၃၆၃. ၊ ၃၉၀. ဝိသေသေ တရတမိသိကိယိဋ္ဌာ.
ဝိသေသတ္ထေ တရ တမ ဣသိက ဣယ ဣဋ္ဌဣစ္စေတေ ပစ္စယာ ဟောန္တိ.
သဗ္ဗေ ဣမေ ပါပါ၊ အယမိမေသံ ဝိသေသေန ပါပေါတိ ပါပတရော. ဧဝံ ပါပတမော၊ ပါပိသိကော၊ ပါပိယော၊ ပါပိဋ္ဌော.
၃၆၄. ၊ ၃၉၈. တဒဿတ္ထီတိ ဝီ စ.
‘‘တဒဿတ္ထိ’’ဣစ္စေတသ္မိံ အတ္ထေ ဝီပစ္စယော ဟောတိ.
မေဓာ ယဿ အတ္ထိ၊ တသ္မိံ ဝါ ဝိဇ္ဇတီတိမေဓာဝီ. ဧဝံ မာယာဝီ.
စဂ္ဂဟဏေန သောပစ္စယော ဟောတိ. သုမေဓာ ယဿ အတ္ထိ၊ တသ္မိံ ဝါ ဝိဇ္ဇတီတိ သုမေဓသော.
၃၆၅. ၊ ၃၉၉. တပါဒိတော သီ.
တပါဒိတော သီပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ.
တပေါ ယဿ အတ္ထိ တသ္မိံ ဝါ ဝိဇ္ဇတီတိ တပဿီ. ဧဝံ ယသဿီ၊ တေဇဿီ.
၂၆၆. ၊ ၄၀၀. ဒဏ္ဍာဒိတော ဣကဤ.
ဒဏ္ဍာဒိတော ဣက ဤဣစ္စေတေ ပစ္စယာ ဟောန္တိ ‘‘တဒဿတ္ထိ’’ဣစ္စေတသ္မိံ အတ္ထေ.
ဒဏ္ဍော ယဿ အတ္ထိ၊ တသ္မိံ ဝါ ဝိဇ္ဇတီတိ ဒဏ္ဍိကော၊ ဒဏ္ဍီ. ဧဝံ မာလိကော၊ မာလီ.
၃၆၇. ၊ ၄၀၁. မဓွာဒိတော ရော.
မဓုဣစ္စေဝမာဒိတော ရပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ.
မဓု ယဿ အတ္ထိ၊ တသ္မိံ ဝါ ဝိဇ္ဇတီတိ မဓုရော. ဧဝံ ကုဉ္ဇရော၊ မုဂ္ဂရော၊ မုခရော၊ သုသိရော၊ (သီသရော၊ သုကရော၊ သုင်္ကရော)၊ သုဘရော၊ သုစိရော၊ ရုစိရော.
၃၆၈. ၊ ၄၀၂. ဂုဏာဒိတော ဝန္တု.
ဂုဏဣစ္စေဝမာဒိတော ဝန္တုပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ.
ဂုဏော ယဿ အတ္ထိ၊ တသ္မိံ ဝါ ဝိဇ္ဇတီတိ ဂုဏဝါ. ဧဝံ ယသဝါ၊ ဓနဝါ၊ ပညဝါ၊ ဗလဝါ၊ ဘဂဝါ.
၃၆၉. ၊ ၄၀၃. သတျာဒီဟိ မန္တု.
သတိဣစ္စေဝမာဒီဟိ မန္တုပစ္စယောဟောတိ ‘‘တဒဿတ္ထိ’’ ဣစ္စေတသ္မိံ အတ္ထေ.
သတိ ယဿ အတ္ထိ၊ တသ္မိံ ဝါ ဝိဇ္ဇတီတိ သတိမာ၊ ဧဝံ ဇုတိမာ၊ ရုစိမာ၊ ထုတိမာ၊ ဓိတိမာ၊ မတိမာ၊ ဘာဏုမာ.
၃၇၀. ၊ ၄၀၅. သဒ္ဓါဒိတောဏ.
သဒ္ဓါဣစ္စေဝမာဒိတော ဏ ပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ.
သဒ္ဓါ ယဿ အတ္ထိ၊ တသ္မိံ ဝါ ဝိဇ္ဇတီဘိ သဒ္ဓေါ၊ ဧဝံ ပညော၊ အမစ္ဆရော.
၃၇၁. ၊ ၄၀၄. အာယုဿုကာရာသ မန္တုမှိ.
အာယုဿ အန္တော ဥကာရော အသာဒေသော ဟောတိမန္တုမှိ ပစ္စယေ ပရေ.
အာယု အဿ အတ္ထိ၊ တသ္မိံ ဝါ ဝိဇ္ဇတီတိ အာယသ္မာ.
၃၇၂. ၊ ၃၈၅. တပ္ပကတိဝစနေ မယော.
တပ္ပကတိဝစနတ္ထေ မယပစ္စယော ဟောတိ.
သုဝဏ္ဏေန ပကတံ ကမ္မံ သောဝဏ္ဏမယံ. ဧဝံ ရူပိယမယံ ဇတုမယံ၊ ရဇတမယံ၊ ဣဋ္ဌကမယံ၊ အယောမယံ၊ မတ္တိကာ မယံ၊ ဒါရုမယံ၊ ဂေါမယံ.
၃၇၃. ၊ ၄၀၆. သင်္ချာပူရဏေ မော.
သင်္ချာပူရဏတ္ထေ မပစ္စယော ဟောတိ.
ပဉ္စန္နံ ပူရဏော ပဉ္စမော၊ ဧဝံ သတ္တမော၊ အဋ္ဌမော၊ နဝမော၊ ဒသမော.
၃၇၄. ၊ ၄၀၈. သ ဆဿဝါ.
ဆဿ သကာရာဒေသော ဟောတိ ဝါ သင်္ချာပူရဏတ္ထေ.
ဆန္နံ ပူရဏော သဋ္ဌော၊ ဆဋ္ဌော ဝါ.
၃၇၅. ၊ ၄၁၂. ဧကာဒိတော ဒသဿီ.
ဧကာဒိတော ဒသဿ အန္တေ ဤပစ္စယော ဟောတိ ဝါ သင်္ချာပူရဏတ္ထေ.
ဧကော စ ဒသ စ ဧကာဒသ၊ ဧကာဒသန္နံ ပူရဏီ ဧကာဒသီ. ပဉ္စစ ဒသ စ ပဉ္စဒသ၊ ပဉ္စဒသန္နံ ပူရဏီ ပဉ္စဒသီ. စတ္တာရော စ ဒသ စ စတုဒ္ဒသ၊ စတုဒ္ဒသန္နံ ပူရဏီ စာတုဒ္ဒသီ.
ပူရဏေတိ ကိမတ္ထံ? ဧကာဒသ၊ ပဉ္စဒသ.
၃၇၆. ၊ ၂၅၇. ဒသေ သော နိစ္စဉ္စ.
ဒသသဒ္ဒေ ပရေ နိစ္စံ ဆဿ သော ဟောတိ.
သောဠသ.
၃၇၇. ၊ ၀. အန္တေ နိဂ္ဂဟိတဉ္စ.
တာသံ သင်္ချာနံ အန္တေ နိဂ္ဂဟိတာဂမော ဟောတိ.
ပဉ္စဒသိ၊ စာတုဒ္ဒသိ.
၃၇၈. ၊ ၄၁၄. တိ စ.
တာသံ သင်္ချာနံ အန္တေ တိကာရာဂမော ဟောတိ. ဝီသတိ၊ တိံသတိ.
၃၇၉. ၊ ၂၅၈. လ ဒရာနံ.
ဒကာရ ရကာရာနံ သင်္ချာနံ လကာရာဒေသော ဟောတိ. သောဠသ၊ စတ္တာလီသံ.
၃၈၀. ၊ ၂၅၅. ဝီသတိ ဒသေသု ဗာ ဒွိဿ တု.