ဇိနဝံသဒီပံ |ဩ၀.၀၀၀၁|
နမော တဿ ဘဂဝတော အရဟတော သမ္မာသမ္ဗုဒ္ဓဿ
၁. မဟာဒယော ယော ဟဒယော’ဒယော’ဒယော
ဟိတာယ ဒုက္ခာနုဘဝေ ဘဝေ ဘဝေ၊
အကာသိ သမ္ဗောဓိပဒံ ပဒံ ပဒံ
တမာဘိဝန္ဒာမိ ဇိနံ ဇိနံ ဇိနံ၊ (ယမကဗန္ဓနံ)
၂. |ဩ၀.၀၀၀၂|
ပဟာယ ယတ္ထာ’ဘိရတိံ ရတိံ ရတိံ
ရမန္တိ ဓမ္မေဝ မုနီ မုနီ မုနီ၊
ဝိမုတ္တိဒံ သဗ္ဗဘဝါ ဘဝါ’ဘဝါ
တမာဘိဝန္ဒေ မဟိတံ ဟိတံ ဟိတံ၊ (ယမကဗန္ဓနံ)
၃. |ဩ၀.၀၀၀၄|
နိပီတသဒ္ဓမ္မရသာ ရသာ’ရသာ
သုပုညခေတ္တော’ရသတံ သတံ သတံ၊
ဂတာ ဝိဓူတာ ဝိနယေန ယေန ယေ
တမာဘိဝန္ဒေ’သိဂဏင်္ဂဏ’င်္ဂဏံ၊ (ယမကဗန္ဓနံ)
၄. |ဩ၀.၀၀၀၅|
ဇိနာ’နတမ္ဘောရုဟ ဟံသရာဇိနီ
ဇိနောရသာနံ မုခပဉ္ဇရာ’လိ နီ၊
သဒတ္ထသာရံ သရသံ ဝိသူဒ နီ
ဥပေတု မေ မာနသမေဝ ဝါဏိ နီ၊
၅. ကမ္မာဝသေသာ ဝိစိတော’ပဇာတျာ
ဂန္ထာ’ဟိသင်္ခါရဝိဗန္ဓကာ မေ၊
ပဏာမ ပုညာတိသယေန’နေန
မာ ပါကဒါနာ’ဝသရာ ဘဝန္တု၊
၆. သုဝဏ္ဏဝဏ္ဏဿ ဇိနဿ ဝဏ္ဏံ
ဝဏ္ဏေယျ ကပ္ပမ္ပိ ကဇိတော သုဝဏ္ဏော၊
ကပ္ပဿိ’ဝေါသာန မနတ္တတာယ
န ပါပုဏေ ဗုဒ္ဓဂုဏာန မန္တံ၊
၇. |ဩ၀.၀၀၀၆|
နိဒ္ဓန္တ စာမီကရ စာရု ရူပံ
သရဿတီ ဘူသဏ ဘာသနံစ၊
အနည သာဓာရဏ ဉာဏမဿ
အဝါဝိယာ’စိန္တိယ မပက္ပမေယျံ၊
၈. ကုဟိံ အသာဓာရဏ ရူပ လီလာ
ကုဟိံ အသာဓာရဏ ဝါဏိ လီလာ၊
ကုဟိံ အသာဓာရဏဉာဏ လီလာ
ကုဟိံ နု မေ မန္ဒမတိဿ လီလာ၊
၉. |ဩ၀.၀၀၀၇|
ဝိဘာဝိမာနီ ပရဝမှိနော ယေ
ဣဿာ’ဘိမာနေန ဝိဘညမာနာ၊
ဂဝေသယန္တီ’ဓ ပရဿ ရန္ဓံ
တေသံ ပသံသာဂရဟာဟိ ကိမ္မေ၊
၁၀. ပသတ္ထ သတ္ထာဂမ ပါရဒဿီ
ယေ သာဓဝေါ သာဓု ဂုဏပ္ပသန္တာ၊
ဂန္ထဿ နိမ္မာဏပရိဿမံ နော
ဇာနန္တိ တေယေဝ ဣဓပ္ပမာဏာ၊
၁၁. အာဒိစ္စဝံသပ္ပဘဝဿ တဿ
ဇိနဿ သတ္ထာဂမကောဝိဒေဟိ၊
ဝုတ္တောပိ ပုဗ္ဗာစရိယေဟိ ယေသု
ဂန္ထေသု သင်္ခေပဝသေန ဝံသော၊
၁၂. န တေဟိ သက္ကာ သုဂတဿ ဝံသံ
ကိဉ္စာပိ ဝိညာတု မသေသယိတွာ၊
သမ္ပုဏ္ဏဝံသဿ ဝိဘာဝနာယ
တသ္မာ သမုဿာဟိတ မာနသေန၊
၁၃. |ဩ၀.၀၀၀၈|
အဘိပ္ပသန္နော ရတနတ္တယမှိ
ပသတ္ထဝံသပ္ပဘဝေါ ပဘုနံ၊
ဝိဘုသဏော ဝိဿုတကိတ္တိဃောသော
ယော ဘာတိ လင်္ကာယ မုဠာရဘာဂျော၊
၁၄. အမန္ဒစာဂါ’ဘိရတဿ
ပုနန္ဒု နာမဿ ဒယာဓနဿ၊
ဗုဒ္ဓေ ပသာဒါတိသယဿ တဿ
အဇ္ဈေသနဉ္စာပိ ပဋိဂ္ဂဟေတွာ၊
၁၅. နဿာယ ပုဗ္ဗာစရိယော’ပဒေသံ
သောတူန မတ္ထာယ မယာ ဟိတာယ၊
နိရုတ္တိယာ မာဂဓိကာယ သမ္မာ
ဝိဓီယတေ’ဒံ ဇိနဝံသဒီပံ၊
၁၆. |ဩ၀.၀၀၀၉|
သဒ္ဓါသိနေဟာနုဂတာယ ပညာ-
ဒသာယ သောတူဟိ မနောဝိမာနေ၊
ပဒီပိတော’ယံ ဇိနဝံသဒီပ-
ဒီပေါဟရေပါပတမပ္ပဗန္ဓံ၊
၁၇. ပုရင်္ဂပုဏ္ဏာ သိရိဇမ္ဗုဒီပေ
သမ္ပတ္တိဘာရေန ဒိဝါ’ဝတိဏ္ဏာ၊
ယာ ဒေဝရာဇဿ’မရာဝတီ’ဝါ-
မရာဝတီနာမ ပုရီ ပုရေ’သီ၊
၁၈. ဝိဇ္ဇာဓရာနဉ္စ ဝိဟင်္ဂမာနံ
ဝိဗန္ဓ ဝေဟာသဂတိံ ဗဟာသ၊
ယသ္မိံ ပုရသ္မိံ ဇိတဝေရိ စက္ကံ
ပါကာရစက္ကံ ဝိယ စက္ကဝါဠံ၊
၁၉. |ဩ၀.၀၀၁၀|
သဉ္စုမ္ဗိတမှောဇ ရဇော ပဗန္ဓ-
သုပိဉ္ဇရာပါ ပရိခါဟိရာမာ၊
ပုရိတ္ထိ ပါကာရ နိတမ္ဗဘာဂေ
သမုဗ္ဗဟီ ကဉ္စန မေခလာ’ဘံ၊
၂၀. ရတ္တိန္ဒိဝါ ရတ္တမဏိ’န္ဒနီလ-
မဏိပ္ပဘာရဉ္ဇိတ ရာဇဓာနိ၊
ဗဗန္ဓ ယာ’မန္ဒသုရိန္ဒစာပ-
သမုဇ္ဇလာကာသတလဗ္ဗိလာသံ၊
၂၁. ယဟိံဝဓူနံ ဝဒနမ္ဗုဇေဟိ
ကတာဝမာနံ ဟရိဏင်္ကဗိမ္ဗံ၊
ပဘာဟိ နီလောပလတောရဏာတံ
သောကာဘီဘူတံစ ဝိဝဏ္ဏမာပ၊
၂၂. |ဩ၀.၀၀၁၁|
သရောရုဟ’န္တီ မဏိမန္ဒိရာဘာ-
သဉ္စုမ္ဗိတံ ပုဏ္ဏသသင်္ကဗိမ္ဗံ၊
သင်္ကာယ ရာမာဇနတာ’ဘိရာမာ
ကရေ ပသာရေသိ ပုရမှိ ယသ္မိံ၊
၂၃. ယတ္ထ’င်္ဂနာနံ ပဋိဗိမ္ဗိတာနိ
အာဒါသဘိတ္တီသု မုခမ္ဗုဇာနိ၊
အာသုံ ဝိဃာတာယ မဓုဗ္ဗတာနံ
ဝိလောစနာလီန မနုဂ္ဂဟာယ၊
၂၄. သမ္မတ္တ မာတင်္ဂ ဓရာဓရေဟိ
ယသ္မိံ အဘိဿန္ဒ မဒဿဝန္တိ၊
တုရင်္ဂ ရင်္ဂေဟီ တရင်္ဂ မာလာ
သမာကုလေဝါ’သိ ဝိဓူတ ဓူလီ၊
၂၅. |ဩ၀.၀၀၁၂|
နိက္ခိတ္တဝီဏာ မဏိနုပုရာနံ
ဝိလာသိနီနံ မုဒုပါဏိ ပါဒေ၊
မတ္တာလိမာလာ ကလနာဒိနီ ကိံ
နာလင်္ကရုံ ယတ္ထ ကတာဝကာသာ၊
၂၆. ဓဝတ္ထိနီနံ ကုစသာရသေဟိ
နေတ္တာလိဘာရာ’နနနီရဇေဟိ၊
ယာ ဟာသဝီစီဟိ ပုရီ ရဇနျာ
ရရာဇ သမဖုလ္လသရောဇိနီ’ဝ၊
၂၇. စန္ဒပ္ပဘာ စုမ္ဗိတ စန္ဒကန္တ
ပါသာဏဓာရာ မဏိစန္ဒိကာသူ၊
စန္ဒာနနာနံ ယဟိ မင်္ဂနာဟံ
ပရိဿမဿော’ပသမာယ’ဟေသုံ၊
၂၈. |ဩ၀.၀၀၁၃|
ယသ္မိံ ပူရေ ဥဒ္ဓမဓော ဝိနဒ္ဓ-
ဇုတိပ္ပဗန္ဓော မဏိမန္ဒိရာနံ၊
သမုဗ္ဗဟီ ဂေရုက ပင်္က ဒိဒ္ဓ-
ဝိတာန ပစ္စတ္ထရဏဗ္ဗိလာသံ
၂၉. သုဝဏ္ဏ မုတ္တာ မဏိ ဝံသဝဏ္ဏာ-
ပဝါဠ ရူပီ ဝဇိရေဟိဉ္စာ’ပိ၊
ယာ သတ္တဓညေဟိ ဓနေဟိ ဖီတာ
အဟူ ပုရိ ဓညဝတီ’ဝ နာရီ၊ (သိလေသဗန္ဓနံ)
၃၀. ပသာရိတာ’နေကဒိသာမုခေသု
ဝိစိတ္တဝတ္ထာ’ဘရဏာဒိပူရာ၊
ယတ္ထာ’ပဏာ နိဇ္ဇိတကပ္ပရုက္ခာ
ကရိံသု လောကာဘိမတတ္ထသိဒ္ဓိံ၊
၃၁. |ဩ၀.၀၀၁၄|
ပရာဂရတ္တာ မဓုပါတိမတ္တာ
သမှိန္နဝေလာ ဃနနီလဝါလာ၊
ဟံသာသယာ ပဉ္စသရာဘိရာမာ
ယသ္မိံ တဠာကာ ဝိယ ကာမဘောဂီ၊ (သိလေသဗန္ဓနံ)
၃၂. ပုရန္တရသ္မိံ ရတနဂ္ဃိကာနံ
ရံသိပ္ပဗန္ဓေဟိ ဟတန္ဓကာရေ၊
ကုန္ဒာရဝိန္ဒဗ္ဘုဒယေနယသ္မိံ
ရတ္တိန္ဒိဝါဘေဒ မဝေဒိ လောကော၊
၃၃. |ဩ၀.၀၀၁၅|
မာတင်္ဂဇီမူတဃဋာယ ဃဏ္ဋာ-
ဋင်္ကာရဂမ္ဘီရရဝါယ ယသ္မိံ၊
ပလမ္ဘီတာ မတ္တသိခဏ္ဍိမာလာ
အကာ ဝိကာလေပိ အခဏ္ဍကီဠံ၊
၃၄. ပုရမှိ ယသ္မိံ စရဏမ္ဗုဇေဟိ
ဝဓူဇတော ဗန္ဓိတနူပုရေဟိ၊
ဝိကာသ ကောကာသန သီသ ဗဒ္ဓ