တေလကဋာဟဂါထာ |ဩ၀.၀၀၀၁|
နမော တဿ ဘဂဝတော အရဟတော သမ္မာသမ္ဗုဒ္ဓဿ
၁. လံကိဿရော ဇယတု ဝါရဏရာဇဂါမီ
ဘောဂိန္ဒဘောဂ ရုစိရာယတ ပီဏ ဗာဟု၊
သာဓုပစာရနိရတော ဂုဏသန္နိဝါသော
ဓမ္မေ ဌိတော ဝီဂတကောဓမဒါဝလေပေါ၊
၂. ယော သဗ္ဗလောကမဟိတော ကရုဏာဓိဝါသော
မောက္ခာကရော ရဝိကုလမ္ဗရ ပုဏ္ဏ စန္ဒော၊
ဉေယျောဒဓိံ သုဝိပုလံ သကလံ ဝိဗုဒ္ဓေါ
လောကုတ္တမံ နမထ တံ သိရသာ မုနိန္ဒံ၊
၃. သောပါနမာလမမလံ တိဒသာလယဿ
သံသာရ သာဂရသမုတ္တရဏာယ သေတုံ၊
သဗ္ဗာဂတီဘယ ဝိဝဇ္ဇိတ ခေမ မဂ္ဂံ
ဓမ္မံ နမဿထ သဒါ မုနိနာ ပဏီတံ၊
၄. |ဩ၀.၀၀၀၂|
ဒေယျံ တဒပ္ပမပိ ယတ္ထ ပသန္န စိတ္တာ
ဒတွာ နရာ ဖလမုဠာရတရံ လဘန္တေ၊
တံ သဗ္ဗဒါ ဒသဗလေနပိ သုပ္ပသတ္ထံ
သံဃံ နမဿထ သဒါမိတပုညခေတ္တံ၊
၅. တေဇော ဗလေန မဟတာ ရတနတ္တယဿ
လောကတ္တယံ သမဓိဂစ္ဆတိ ယေန မောက္ခံ၊
ရက္ခာ န စတ္ထိ စ သမာ ရတနတ္တယဿ
တသ္မာ သဒါ ဘဇထ တံ ရတနတ္တယံ ဘော၊
၆. လံကိဿရော ပရဟိတေကရတော နိရာသော
ရတ္တိမ္ပိ ဇာဂရရတော ကရုဏာဓိဝါသော၊
လောကံ ဝိဗောဓယတိ လောကဟိတာယ ကာမံ
ဓမ္မံ သမာစရထ ဇာဂရိယာနုယုတ္တာ၊
၇. |ဩ၀.၀၀၀၃|
သတ္တောပကာရ နိရတာ ကုသလေ သဟာယာ
ဘော ဒုလ္လဘာ ဘုဝိ နရာ ဝိဟတပ္ပမာဒါ၊
လံကာဓိပံ ဂုဏဓနံ ကုသလေ သဟာယံ
အာဂမ္မ သံစရထ ဓမ္မမလံ ပမာဒံ၊
၈. ဓမ္မော တိလောက သရဏော ပရမော ရသာနံ
ဓမ္မော မဟဂ္ဃရတနော ရတနေသု လောကေ၊
ဓမ္မော ဘဝေ တိဘဝဒုက္ခ ဝိနာသဟေတု
ဓမ္မံ သမာစရထ ဇာဂရိယာနုယုတ္တာ၊
၉. နိဒ္ဒံ ဝိနောဒယထ ဘာဝယထပ္ပမေယျံ
ဒုက္ခံ အနိစ္စမ္ပိ စေဟ အနတ္တတဉ္စ၊
ဒေဟေ ရတိံ ဇဟထ ဇ ဇဇ္ဇရဘာဇနာဘော
ဓမ္မံ သမာစရထ ဇာဂရိယာနုယုတ္တာ၊
၁၀. |ဩ၀.၀၀၀၄|
ဩကာသ မဇ္ဇ မမ နတ္ထိ သုဝေ ကရိဿံ
ဓမ္မံ ဣတီဟလသတာ ကုသလပ္ပယောဂေ၊
နာ’လံ တိယဒ္ဓသု တထာ ဘုဝနတ္တယေ စ
ကာမံ န စတ္ထိ မနုဇော မရဏာ ပမုတ္တော၊
၁၁. ခိတ္တော ယထာ နဘသိ ကေနစိဒေဝ လေဍ္ဍု
ဘူမိံ သမာပတ္တိ ဘာရတယာ ခဏေန၊
ဇာတတ္တမေဝ ခလု ကာရဏမေကမတြ
လောကံ သဒါ နနု ဓုဝံ မရဏာယ ဂန္တုံ၊
၁၂. ကာမံ နရဿ ပတတော ဂိရိမုဒ္ဓနာတော
မဇ္ဈေ န ကိဉ္စိ ဘယနိဿရဏာယ ဟေတု၊
ကာမံ ဝဇန္တိ မရဏံ တိဘဝေသု သတ္တာ
ဘောဂေ ရတိံ ပဇဟထာပိ စ ဇီဝိတေ စ၊
၁၃. |ဩ၀.၀၀၀၅|
ကာမံ ပတန္တိ မဟိယာ ခလု ဝဿဓာရာ
ဝိဇ္ဇုလ္လတာ ဝိတတမေဃ မုခါ ပမုတ္တာ၊
ဧဝံ နရာ မရဏဘီမ ပပါတမဇ္ဈေ
ကာမံ ပတန္တိ နဟိ ကောစိ ဘဝေသု နိစ္စော၊
၁၄. ဝေလာတဋေ ပဋုတရောရု တရံဂမာလာ
နာသံ ဝဇန္တိ သတတံ သလိလာလယဿ၊
နာသံ တထာ သမုပယန္တိ နရာမရာနံ
ပါဏာနိ ဒါရုဏတရေ မရဏောဒဓိမှိ၊
၁၅. ရုဒ္ဓေါပိ သော ရထဝရဿဂဇာဓိပေဟိ
ယောဓေဟိ စာပိ သဗလေဟိ စ သာယုဓေဟိ၊
လောကံ ဝိဝံစိယ သဒါ မရဏူသဘော သော
ကာမံ နိဟန္တိ ဘုဝနတ္တယ သာလိ ဒဏ္ဍံ၊
၁၆. |ဩ၀.၀၀၀၆|
ဘော မာရုတေန မဟတာ ဝိဟတော ပဒီပေါ
ခိပ္ပံ ဝိနာသ မုခမေတိ မဟပ္ပဘောပိ၊
လောကေ တထာ မရဏစဏ္ဍ သမီရဏေန
ခိပ္ပံ ဝိနဿတိ နရာယုမဟာ ပဒီပေါ၊
၁၇. ရာမဇ္ဇုနပ္ပဘူတိ ဘူပတိ ပုံဂဝါ စ
သူရာ ပုရေ ရဏမုခေ ဝိဇိတာရိ သံဃာ၊
တေပီဟ စဏ္ဍ မရဏောဃ နိမုဂ္ဂဒေဟာ
နာသံ ဂတာ ဇဂတိ ကေ မရဏာ ပမုတ္တာ?
၁၈. လက္ခီ စ သာဂရပဋာ သဓရာဓရာ စ
သမ္ပတ္တိယော စ ဝိဝိဓာ အပိ ရူပသောဘာ၊
သဗ္ဗာ စ တာ အပိ စ မိတ္တသုတာ စ ဒါရာ
ကေ စာပိ ကံ အနုဂတာ မရဏံ ဝဇန္တံ?
၁၉. |ဩ၀.၀၀၀၇|
ဗြဟ္မာသုရာသုရဂဏာ စ မဟာနုဘာဝါ
ဂန္ဓဗ္ဗကိန္နရမဟောရဂရက္ခသာ စ၊
တေ စာ ပရေ စ မရဏဂ္ဂိသိခါယ သဗ္ဗေ
အန္တေ ပတန္တိ သလဘာ ဣဝ ခီဏပုညာ၊
၂၀. ယေ သာရိပုတ္တပမုခါ မုနိသာဝကာ စ
သုဒ္ဓါ သဒါသဝနုဒါ ပရမိဒ္ဓိပတ္တာ၊
တေ စာပိ မစ္စုဝဠဘာ မုခ သန္နိမုဂ္ဂါ
ဒီပါနိဝါနလဟတာ ခယတံ ဥပေတာ၊
၂၁. ဗုဒ္ဓါပိ ဗုဒ္ဓကမလာမလစာရုနေတ္တာ
ဗတ္တိံသလက္ခဏ ဝိရာဇိတ ရူပသောဘာ၊
သဗ္ဗာသစက္ခယကရာပိ စ လောကနာထာ
သမ္မဒ္ဒိတာ မရဏမတ္တမဟာဂဇေန၊
၂၂. |ဩ၀.၀၀၀၈|
ရောဂါတုရေသု ကရုဏာ န ဇရာတုရေသု
ခိဍ္ဍာပရေသု သုကုမာရကုမာရကေသု၊
လောကံ သဒါ ဟနတိ မစ္စု မဟာဂဇိန္ဒော
ဒဝါနလော ဝနမိဝါဝရတံ အသေသံ၊
၂၃. အာပုဏ္ဏတာ န သလိလေ န ဇလာသယဿ
ကဋ္ဌဿ စာပိ ဗဟုတာ န ဟုတာသနဿ၊
ဘုတွာန သော တိဘူဝနမ္ပိ တထာ အသေသံ
ဘော နိဒ္ဒယော န ခလု ပီတိမုပေတိ မစ္စု၊
၂၄. ဘော မောဟ မောဟိတတယာ ဝိဝသော အဓညော
လောကော ပတတျပိပိ မစ္စုမုခေ သုဘီမေ၊
ဘောဂေ ရတိံ သမုပယာတိ နိဟီနပညော
ဒေါလာ တရင်္ဂစပလေ သုပိနောပမေယျေ၊
၂၅. |ဩ၀.၀၀၀၉|
ဧကောပိ မစ္စုရဘိဟန္တုမလံ တိလောကံ
ကိံ နိဒ္ဒယာ အပိ ဇရာမရဏာနုယာယီ၊
ကော ဝါ ကရေယျ ဝိဘသုဝေသု စ ဇီဝိတာသံ
ဇာတော နရော သုပိန သံဂမ သန္နိဘေသု၊
၂၆. နိစ္စာတုရံ ဇဂဒိဒံ သဘယံ သသောကံ
ဒိသွာ စ ကောဓမဒမောဟဇရာဘိဘူတံ၊
ဥဗ္ဗေဂမတ္တမပိ ယဿ န ဝိဇ္ဇတီ စေ
သော ဒါရုဏောန မရဏံ ဝတ တံ ဓိရတ္ထု!
ဘော ဘော န ပဿထ ဇရာသိဓရဉှိ မစ္စု
မာဟညမာနမခိလံ သတတံ တိလောကံ၊
ကိံ နိဒ္ဒယာ နယထ ဝီတဘယာ တိယာမံ
ဓမ္မံ သဒါ’သဝနုဒံ စရထ’ပ္ပမတ္တာ၊
၂၈. |ဩ၀.၀၀၁၀|
ဘာဝေထ ဘော မရဏမာရဝိဝဇ္ဇနာယ
လောကေ သဒါ မရဏ သညမိမံ ယတတ္တာ၊
ဧဝဉှိ ဘာဝနရတဿ နရဿ တဿ
တဏှာ ပဟီယတိ သရီရဂတာ အသေသာ၊
၂၉. ရူပံ ဇရာ ပိယတရံ မလိနီကရောတိ
သဗ္ဗံ ဗလံ ဟရတိ အတ္တနိ ဃောရရောဂေါ၊
နာနူပဘောဂ ပရိရက္ခိတ မတ္တဘာဝံ
ဘော မစ္စု သံဟရတိ ကိံ ဖလမတ္တဘာဝေ?
၃၀. ကမ္မာနိလာပဟတရောဂတရံဂဘံဂေ
သံသာရ သာဂရ မုခေ ဝိတတေ ဝိပန္နာ၊
မာ မာပမာဒမကရိတ္ထ ကရောထ မောက္ခံ
ဒုက္ခောဒယော နနု ပမာဒမယံ နရာနံ၊
၃၁. |ဩ၀.၀၀၁၁|
ဘောဂါ စ မိတ္တသုတပေါရိသ ဗန္ဓဝါ စ
နာရီ စ ဇီဝိတသမာ အပိ ခေတ္တဝတ္ထု၊
သဗ္ဗာနိ တာနိ ပရလောကမိတော ဝဇန္တံ
နာနုဗ္ဗဇန္တိ ကုသလာကုသလံဝ လောကေ၊
၃၂. ဘော ဝိဇ္ဇုစံစလတရေ ဘဝသာဂရမှိ
ခိတ္တာ ပုရာ ကတမဟာပဝနေန တေန၊
ကာမံ ဝိဘိဇ္ဇတိ ခဏေန သရီရနာဝါ
ဟတ္ထေ ကရောထ ပရမံ ဂုဏဟတ္ထသာရံ၊
၃၃. နိစ္စံ ဝိဘိဇ္ဇတိဟ အာမက ဘာဇနံဝ
သံရက္ခိတောပိ ဗဟုဓာ ဣဟ အတ္တဘာဝေါ၊
ဓမ္မံ သမာစရထ သဂ္ဂပတိပ္ပတိဋ္ဌံ
ဓမ္မော သုစိဏ္ဏမိဟမေဝ ဖလံ ဒဒါတိ၊
၃၄. |ဩ၀.၀၀၁၂|
ရန္တွာ သဒါ ပိယတရေ ဒိဝိ ဒေဝရဇ္ဇေ
နမှာ စဝန္တိ ဝိဗုဓာ အပိ ခီဏပုညာ၊
သဗ္ဗံ သုခံ ဒိဝိ ဘုဝီဟ ဝိယောဂနိဋ္ဌံ
ကော ပညဝါ ဘဝသုခေသု ရတိံ ကရေယျ?
၃၅. ဗုဒ္ဓေါ သသာဝကဂဏော ဇဂဒေကနာထော