၁. သန္ဓိ ကဏ္ဍ

သညာ

၂. အက္ခရာပါဒယော ဧကစတ္တာလီသံ.

အက္ခရာပိ အကာရာဒယော ဧကစတ္တာလီသံ သုတ္တန္တောပကာရာ. တံ ယထာ-အ အာ-ဣ ဤ-ဥ ဦ-ဧ ဩ၊ က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ-ဣတိ.

၃. တတ္ထောဒန္တာသရာ အဋ္ဌ.

တတ္ထ အက္ခရေသု ဩကာရန္တာ အဋ္ဌ သရာ နာမ. တတ္ထေတိ ဝတ္တတေ.

၄. လဟုမတ္တာ တယော ရဿာ.

တတ္ထ သရေသု လဟုမတ္တာ အ၊ ဣ၊ ဥ ဣတိ တယော ရဿာ.

၅. အညေ ဒီဃာ.

တတ္ထ သရေသု ရဿေဟညေ ဒီဃာ.

သံယောဂတော ပုဗ္ဗေ ဧဩ ရဿာ ဣဝေါစ္စန္တေ၊ အနန္တရာ ဗျဉ္ဇနာ သံယောဂေါ. ဧတ္ထ၊ သေယျော၊ ဩဋ္ဌော၊ သောတ္ထိ.

၆. သေသာ ဗျဉ္ဇနာ.

သရေ ဌပေတွာ သေသာ ကာဒယော နိဂ္ဂဟီတန္တာ ဗျဉ္ဇနာ.

၇. ဝဂ္ဂါ ပဉ္စပဉ္စသော မန္တာ.

ဗျဉ္ဇနာနံ ကာဒယော မကာရန္တာ ပဉ္စပဉ္စသော အက္ခရဝန္တော ဝဂ္ဂါ.

၈. ဝဂ္ဂါနံ ပဌမဒုတိယာ သော စာဃောသော. ဠန္တာညေ ဃောသာ. ဃောသာဃောသသညာ စ ‘‘ပရသမညာ ပယောဂေ’’တိ သင်္ဂဟီတာ. ဧဝံ လိင်္ဂ၊ သဗ္ဗနာမ၊ ပဒ၊ ဥပသဂ္ဂ၊ နိပါတ၊ တဒ္ဓိတ၊ အာချာတ၊ ကမ္မပ္ပဝစနီယာဒိသညာ စ.

၉. အံဣတိ နိဂ္ဂဟီတံ.

အံဣတိ အကာရတော ပရံ ယော ဗိန္ဒု သူယတေ၊ တံ နိဂ္ဂဟီတံ နာမ.

ဗိန္ဒု စူဠာမဏာကာရော၊ နိဂ္ဂဟီတန္တိ ဝုစ္စတေ.

ကေဝလဿာ ပ္ပယောဂတ္တာ၊ အကာရော သန္နိဓီယတေ.

၁၀. အ၊ ကဝဂ္ဂ၊ ဟာ ကဏ္ဍဇာ၊ ဣ၊ စဝဂ္ဂ၊ ယာ တာလုဇာ၊ ဥ၊ ပဝဂ္ဂါ ဩဋ္ဌဇာ၊ ဋဝဂ္ဂ၊ ရ၊ ဠာ မုဒ္ဓဇာ၊ တဝဂ္ဂ၊ လ၊ သာ ဒန္တဇာ၊ ဧ ကဏ္ဌတာလုဇော၊ ဩ ကဏ္ဌောဋ္ဌဇော၊ ဝေါ ဒန္တောဋ္ဌဇော.

သညာ

သရသန္ဓိ

၁၁. လောက အဂ္ဂေါဣတျသ္မိံ – ‘‘ပုဗ္ဗမဓောဌိတ မဿရံ သရေန ဝိယောဇယေ’’တိ ပုဗ္ဗဗျဉ္ဇနံ သရတော ပုထက္ကာတဗ္ဗံ.

သရာ သရေ လောပံ.

အနန္တရေ သရေ ပရေ သရာ လောပံ ပပ္ပေါန္တိ.

‘‘နရေ ပရံ ယုတ္တေ’’တိ အဿရော ဗျဉ္ဇနော ပရက္ခရံ နေတဗ္ဗော လောကဂ္ဂေါ.

သရေတျသ္မိံ ဩပသိလေသိကော ကာသသတ္တမီ၊ တတော ဝဏ္ဏကာလဗျဝဓာနေ ကာရိယံ န ဟောတိ. ယထာ-မံ အဟာ သီတိ၊ ‘‘ပမာဒမနုယုဉ္ဇန္တီ’’တျာဒိဂါထာယံ ‘ဇနာ အပ္ပမာဒ’န္တိ စ. ဧဝံ သဗ္ဗသန္ဓီသု.

အနန္တရံ ပရဿ သရဿ လောပံ ဝက္ခတိ၊ တသ္မာနေန ပုဗ္ဗဿ လောပေါ ဉာယတိ၊ တေနေဝ သတ္တမီနိဒ္ဒိဋ္ဌဿ ပရတာပိ ဂမျတေ.

၁၂. သရေတျဓိကာရော. ပန ဣမေ ပန ဣမေတီဟ-သရာ လောပံ ဣတွေဝ.

ဝါ ပရော အသရူပေါ.

အသမာနရူပါသရမှာ ပရော သရော ဝါ လုပျတေ၊ ပနမေ၊ ပနိမေ.

၁၃. ဗန္ဓုဿ ဣဝ၊ န ဥပေတီတီဓ –

ကွစာသဝဏ္ဏံ လုတ္တေ.

သရေ လုတ္တေ ပရသရဿ ကွစိ အသဝဏ္ဏော ဟောတီတိ ဣ ဥ ဣစ္စေတေသံ ဌာနာသန္နာ ဧ ဩ. ဗန္ဓုဿေဝ. နောပေတိ.

၁၄. တတြ အယံ၊ ယာနိ ဣဓ၊ ဗဟု ဥပကာရံ၊ သဒ္ဓါ ဣဓ၊ တထာ ဥပမန္တျေတသ္မိံ –

ဒီဃံ.

သရေ လုတ္တေ ပရော သရော ကွစိ ဌာနာသန္နံ ဒီဃံ ယာတိ. တတြာယံ၊ ယာနီဓ၊ ဗဟူပကာရံ၊ သဒ္ဓီဓ၊ တထူပမံ.

၁၅. ကိံသု ဣဓေတျတြ –

ပုဗ္ဗော စ.

သရေ လုတ္တေ ပုဗ္ဗော စ ကွစိ ဒီဃံ ယာတိ. ကိံ သူဓ.

၁၆. တေ အဇ္ဇ၊ တေ အဟံတေတ္ထ –

ယမေဒန္တဿာဒေသော.

သရေ ပရေ အန္တဿ ဧကာရဿ ကွစိ ယော အာဒေသော ဟောတိ၊ တျဇ္ဇ၊ ‘‘ဒီဃ’’န္တိ ဗျဉ္ဇနေ ပရေ ကွစိ ဒီဃော၊ တျာဟံ.

ကွစီတိ ကိံ. နေတ္ထ.

၁၇. သော အဿ၊ အနု ဧတိတျေတ္ထ –

ဝမောဒုဒန္တာနံ.

သရေ ပရေ အန္တော ကာရုကာရာနံ ကွစိ ဝေါ အာဒေသော ဟောတိ. သွဿ၊ အနွေတိ.

ကွစီတိ ကိံ. တယဿု၊ သမေတာယသ္မာ.

၁၈. ဣဓ အဟံ တီဓ –

ဒေါ ဓဿ စ.

သရေ ပရေ ဓဿ ကွစိ ဒေါ ဟောတိ. ဒီဃေ – ဣဒါဟံ. ကွစီတိ ကိံ. ဣဓေဝ. စကာရေန ဗျဉ္ဇနေပိ၊ ဣဓ ဘိက္ခဝေ.

၁၉. ပတိ အန္တုံ၊ ဝုတ္တိ အဿေတီဟ –

ဣဝဏ္ဏော ယန္နဝါ.

သရေ ပရေ ဣဝဏ္ဏဿ ယော နဝါ ဟောတိ. ကတ ယကာရဿ တိဿ ‘‘သဗ္ဗော စန္တီ’’တိ ကွစိ စာဒေသေ ‘‘ပရဒွေဘာဝေါ ဌာနေ’’တိ သရတော ပရဗျဉ္ဇနဿ ဌာနာသန္နဝသာ ဒွိတ္တံ. ပစ္စန္တံ၊ ဝုတျဿ.

နဝါတိ ကိံ. ပဋဂ္ဂိ၊

ဧတ္ထ ‘‘ကွစိ ပဋိ ပတိဿေ’’တိ ပတိဿ ပဋိ၊ ဝဏ္ဏဂ္ဂဟဏံ သဗ္ဗတ္ထ ရဿဒီဃ သင်္ဂဟဏတ္ထံ.

၂၀. ယထာ ဧဝေတီဟ –

ဧဝါဒိဿ ရိ ပုဗ္ဗော စ ရဿော.

သရတော ပရဿ ဧဝဿာဒိဧကာရော ရိတ္တံ နဝါ ယာတိ. ပုဗ္ဗော စ ဌာနာသန္နံ ရဿံ. ယထရိဝ. ယထေဝ.

၂၁. န ဣမဿ၊ တိ အင်္ဂိကံ၊ လဟု ဧဿတိ၊ အတ္ထ အတ္ထံ၊ ဣတော အာယတိ၊ တသ္မာ ဣဟ၊ သဗ္ဘိ ဧဝ၊ ဆ အဘိညာ၊ ပုထ ဧဝ၊ ပါ ဧဝတီဟ ဝါ တွေဝ –

ယ ဝ မ ဒ န တ ရ ဠာ စာဂမာ.

သရေ ပရေ ယာဒယော အာဂမာ ဝါ ဟောန္တိ၊ စကာရေန ဂေါ စ. နယိမဿ၊ တိဝင်္ဂိကံ၊ လဟုမေဿတိ၊ အတ္တဒတ္ထံ၊ ဣတောနာယတိ၊ တသ္မာတိဟ၊ သဗ္ဘိရေဝ၊ ဆဠဘိဉာ၊ ပုထဂေဝ၊ ‘‘ရဿ’’န္တိ ဗျဉ္ဇနေ ပရေ ကွစိ ရဿော. ပဂေဝ.

ဝါတိ ကိံ. ဆ အဘိညာ၊ ပုထ ဧဝ၊ ပါ ဧဝ.

ဧတ္ထ ‘‘သရေ ကွစီ’’တိ သရာနံ ပကတိ ဟောတိ၊ သဿရူပမေဝ၊ န ဝိကာရောတျတ္ထော.

၂၂. အဘိ ဥဂ္ဂတောတျတြ –

‘‘အဗ္ဘော အဘီ’’တိ အဘိဿ အဗ္ဘော. အဗ္ဘုဂ္ဂတော.

သရသန္ဓိ

ဗျဉ္ဇနသန္ဓိ

၂၃. ဗျဉ္ဇနေတျဓိကာရော. ကွစီတွေဝ. သော ဘိက္ခု၊ ကစ္စိ နု တွံ၊ ဇာနေမ တန္တီဟ –

လောပဉ္စ တတြာကာရော.

ဗျဉ္ဇနေ ပရေ သရာနံ ကွစိ လောပေါဟောတိ၊ တတြ လုတ္တေ ဌာနေ အကာရာဂမော၊ စကာရေန ဩကာရုကာရာပိ. သဘိက္ခု ကစ္စိနော တွံ၊ ဇာနေမု တံ.

ကွစီတိ ကိံ၊ သောမုနိ.

၂၄. ဥဃောသော၊ အာခါတန္တီဟ – ဒွေဘာဝေ ဌာနေ ဣတွေဝ.

ဝဂ္ဂေ ဃောသာဃောသာနံ တတိယပဌမာ.

ဝဂ္ဂေ ဃောသာဃောသာနံ စတုတ္ထဒုတိယာနံ တဗ္ဗဂ္ဂေ တတိယပဌမာ ဟောန္တိ ယထာသင်္ချံ ယုတ္တေ ဌာနေ၊ ဥဂ္ဃေါသော၊ ရဿေ အက္ခာတံ.

၂၅. ပရ သဟဿံ၊ အတိပ္ပခေါတီဟ – ‘‘ကွစိ ဩ ဗျဉ္ဇနေ’’တိ ဩကာရာဂမော. ပရောသဟဿံ. ဂါဂမေ စ၊ အတိပ္ပဂေါခေါ.

၂၆. အဝ နဒ္ဓါတျတြ – ‘‘ဩ အဝဿေ’’တိ ကွစိ အဝဿ ဩ. ဩနဒ္ဓါ.

ကွစီတိ ကိံ. အဝသုဿတု.

ဗျဉ္ဇနသန္ဓိ.

နိဂ္ဂဟီတသန္ဓိ

၂၇. နိဂ္ဂဟီတန္တျဓိကာရော. ကိံ ကတော၊ သံ ဇာတော၊ သံ ဌိတော၊ တံ ဓနံ၊ တံ မိတ္တန္တိဟ –

ဝဂ္ဂန္တံ ဝါ ဝဂ္ဂေ.

ဝဂ္ဂဗျဉ္ဇနေ ပရေ ဗိန္ဒုဿ တဗ္ဗဂ္ဂန္တော ဝါ ဟောတိ. ကိင်္ကတော၊ သဉ္ဇာတော၊ သဏ္ဌိတော၊ တန္ဓနံ၊ တမ္မိတ္တံ.

ဝါတိ ကိံ. န တံ ကမ္မံ.

ဝါကာရေနေဝ လေ လော စ. ပုလ္လိင်္ဂံ.

၂၈. ဝါတျဓိကာရော. ဧဝံ အဿ၊ ဧတံ အဝေါစေတီဟ –

မဒါ သရေ.

သရေ ပရေ ဗိန္ဒုနော မ ဒါ ဝါ ဟောန္တိ. ဧဝမဿ၊ ဧတဒဝေါစ.

ဝါတိ ကိံ. မံ အဇိနိ.

၂၉. တံ ဧဝ၊ တံ ဟီတီဟ –

ဧဟေဉံ.

ဧကာရေ၊ ဟေ စ ပရေ ဗိန္ဒုနော ဉော ဝါ ဟောတိ. ဒွိတ္တေ – တညေဝ၊ တမေဝ. တဉှိ၊ တံ ဟိ.

၃၀. သံယောဂေါတီဟ –

သယေ စ.

ယကာရေ ပရေ တေန သဟ ဗိန္ဒုနော ဉော ဝါ ဟောတိ. ဒွိတ္တေ – သညောဂေါ၊ သံယောဂေါ.

၃၁. စက္ခု အနိစ္စံ၊ အဝ သိရောတီဟ - အာဂမော၊ ကွစိတွေဝ.

နိဂ္ဂဟီတဉ္စ.

သရေ၊ ဗျဉ္ဇနေ ဝါ ပရေ ကွစိ ဗိန္ဒွါဂမော ဟောတိ. စက္ခုံအနိစ္စံ၊ အဝံသိရော.

၃၂. ဝိဒူနံ အဂ္ဂံ၊ တာသံ အဟံတီဟ –

‘‘ကွစိ လောပံ’’တိ သရေ ဗိန္ဒုလောပေါ၊ ဝိဒူနဂ္ဂံ. ဒီဃေတာသာဟံ.

၃၃. ဗုဒ္ဓါနံ သာသနံ၊ သံ ရာဂေါတီဟ –

‘‘ဗျဉ္ဇနေ စေ’’တိ ဗိန္ဒုလောပေါ၊ ဗုဒ္ဓါနသာသနံ. ဒီဃေသာရာဂေါ.

၃၄. ဗီဇံ ဣဝေတီဟ –

ပရော ဝါ သရော.

ဗိန္ဒုတော ပရော သရော ဝါ လုပျတေ၊ ဗီဇံဝ.

၃၅. ဧဝံ အဿေတီဟ –

ဗျဉ္ဇနော စ ဝိသညောဂေါ.

ဗိန္ဒုတော ပရေ သရေ လုတ္တေ သံယောဂေါ ဗျဉ္ဇနော ဝိနဋ္ဌသံယောဂေါ ဟောတီတိ ပုဗ္ဗသလောပေါ. ဧဝံသ.

နိဂ္ဂဟီတသန္ဓိ.

ဝေါမိဿက သန္ဓီ

၃၆. အနုပဒိဋ္ဌာနံ ဝုတ္တယောဂတော.

ဣဓာနိဒ္ဒိဋ္ဌာ သန္ဓယော ဝုတ္တာနုသာရေန ဉေ ယျာ၊ ယထာ – ယဒိ ဧဝံ၊ ဗောဓိ အင်္ဂါတီဟ – ယာဒေသေ ဣမိနာ သုတ္တေန ဒယကာရသံယောဂဿ ဇော၊ ဓယကာရသံယောဂဿ ဈော၊ ဒွိတ္တေ – ယဇ္ဇေဝံ၊ ဗောဇ္ဈင်္ဂါ.

၃၇. အသဒိသသံယောဂေ ဧကသရူပတာ စ.

ပရိ ဧသနာတီဟ – ယာဒေသေ ရကာရဿ ယော၊ ပယျေသ နာ.

၃၈. ဝဏ္ဏာနံ ဗဟုတ္တံ၊ ဝိပရီတတာ စ.

သရတိ၊ ဣတိ ဧဝ၊ သာ ဣတ္ထီ၊ ဗုသံ ဧဝ၊ ဗဟု အာဗာဓော၊ အဓိ အဘဝိ၊ သုခံ၊ ဒုက္ခံ၊ ဇီဝေါတီဟ –

မာဂမော သကာရေ အကာရဿ ဥ စ၊ သုမရတိ.

ဣဿ ဝေါ၊ ဣတွေဝ.

ပရလောပေ အာကာရဿ ဩ၊ သောတ္ထီ.

မာဒေသေ၊ ပုဗ္ဗဒီဃေ စ ဧကာရဿ ဣ. ဗုသာမိဝ.

ဝါဒေသေ ဟဝကာရဝိပရိယယော. ဗဟွာဗာဓော.

အဓိဿ ကွစိ အဒ္ဓေါ၊ ဒီဃေ-အဒ္ဓါဘဝိ.

ဗိန္ဒုနော၊ ဩကာရဿ စ ဧ. သုခေ၊ ဒုက္ခေ၊ ဇီဝေ.

၃၉. ရဒါနံ ဠော၊ ပဋိဗောဓော၊ ပရိဠာဟော.

၄၀. သရေ၊ ဗျဉ္ဇနေ ဝါ ပရေ ဗိန္ဒုနော ကွစိ မော. မမ အဘာသိ၊ ဗုဒ္ဓမ သရဏံ၊ ပုဗ္ဗေ မော ပရံ န နေတဗ္ဗော အယုတ္တတ္တာ.

၄၁. ဗိန္ဒုတော ပရသရာန မညဿရတာပိ.

တံ ဣမိနာ၊ ဧဝံ ဣမံ၊ ကိံ အဟံ တီဟ-ဣဿ အ. တဒမိနာ.

ဣဿ ဥ၊ အကာရဿ စ ဧ၊ ဗိန္ဒုလောပါဒေါ. ဧဝုမံ၊ ကေဟံ.

၄၂. ဝါကျသုခုစ္စာရဏတ္ထံ၊ ဆန္ဒဟာနိတ္ထဉ္စ ဝဏ္ဏလောပေါပိ.

ပဋိသင်္ခါယ ယောနိသောတီဟ – ပုဗ္ဗယလောပေါ၊ ပဋိသင်္ခါယောနိသော.

၄၃. အလာဗူနိတျာဒေါ အကာရလောပေါ. လာဗူနိ သီဒန္တိ၊ သိလာ ပ္လဝန္တိ.

၄၄. ဝုတျဘေဒါယ ဝိကာရောပိ.

အကရမှသေ တေတျာဒေါ သကာရေ ဂရုနော ဧကာရဿ ဣမိနာ လဟုအကာရော၊ အကရမှသ တေ ကိစ္စံ.

၄၅. အက္ခရနိယမော ဆန္ဒံ၊ ဂရုလဟုနိယမော ဘဝေ ဝုတ္တိ၊

ဒီဃော၊ သံယောဂါဒိပုဗ္ဗော ရဿော စ ဂရု၊ လဟု တု ရဿော. ယထာ- အာ၊ အဿ၊ အံ၊ အ.

၄၆. ဧဝမညာပိ ဝိညေယျာ၊ သံဟိတာ တန္တိယာ ဟိတာ၊

သံဟိတာတိ စ ဝဏ္ဏာနံ၊ သန္နိဓဗျဝဓာနတော.

ဝေါမိဿကသန္ဓိ.