၂. နာမကဏ္ဍ

ပုလ္လိင်္ဂ

၄၇. ‘‘ဇိနဝစနယုတ္တံ ဟီ’’တိ သဗ္ဗတ္ထာဓိကာရော.

လိင်္ဂဉ္စ နိပစ္စတေ.

ဓာတုပ္ပစ္စယဝိဘတ္တိဝဇ္ဇိတမတ္ထယုတ္တံ သဒ္ဒရူပံ လိင်္ဂံ နာမ၊ ဇိနဝစနယောဂ္ဂံ လိင်္ဂံ ဣဓ ဌပီယတိ နိပ္ဖါဒီယတိ စ.

၄၈. ဗုဒ္ဓဣတိ ဌိတေ –

တတော စ ဝိဘတ္တိယော.

တသ္မာ လိင်္ဂါ ပရာ ဝိဘတ္တိယော ဟောန္တိ. စကာရေန တာသံ ဧကဝစနာဒိပဌမာဒိသညာ စ.

‘‘သိ ယော အံ ယော နာ ဟိ သ နံ သ္မာ ဟိ သ နံ သ္မိံ သူ’’ တိ ဝိဘတ္တိယော. သိ ယော ဣတိ ပဌမာ၊ အံ ယော ဣတိ ဒုတိယာ၊ နာ ဟိ ဣတိ တတိယာ၊ သ နံ ဣတိ စတုတ္ထီ၊ သ္မာ ဟိ ဣတိ ပဉ္စမီ၊ သ နံ ဣတိ ဆဋ္ဌီ၊ သ္မိံ သု ဣတိ သတ္တမီ.

လိင်္ဂတ္ထေ ပဌမာ.

ယော ကမ္မကတ္တာဒိဝတ္တန္တရမပ္ပတ္တော သဿရူပဋ္ဌော သုဒ္ဓေါ၊ သော လိင်္ဂတ္ထော နာမ၊ တဿာဘိဓာနမတ္တေ ပဌမာဝိဘတ္တိ ဟောတိ. တဿာပနိယမေ ဧကမှိ ဝတ္တဗ္ဗေ ဧကဝစနံ သိ၊ ဝုစ္စတေ နေနေတိဝစနံ၊ ဧကဿတ္ထဿ ဝစနံ ဧကဝစနံ. ဧဝံ ဗဟုဝစနံ.

အတောတွေဝ.

သော.

အကာရန္တာ ပရဿ သိဿ ဩ ဟောတိ.

သရလောပေါ မာဒေသပ္ပစ္စယာဒိမှိ သရလောပေ တု ပကတိ.

အံအာဒီသု ပရေသု သရဿ လောပေါ ဟောတိ၊ တသ္မိံ ကတေ တု ကွစာဒိနာ အသဝဏ္ဏေ ပတ္တေ ပကတိ ဟောတိ.

နယေ ပရံ ယုတ္တေ. ဧဝမုပရိ သရလောပါဒိ. ဗုဒ္ဓေါ.

ဗဟုမှိ ဝတ္တဗ္ဗေ ဗဟုဝစနံ ယော.

အတော ဝါတွေဝ.

သဗ္ဗယောနီနမာဧ.

အကာရန္တာ ပရေသံ ပဌမဒုတိယာယောနီနံ ယထာသင်္ချံ အာဧ ဝါ ဟောန္တိ. ဗုဒ္ဓါ.

ဝါတိ ကိံ. အဂ္ဂယော.

၄၉. လိင်္ဂတ္ထေ ပဌမာတွေဝ.

အာလပနေ စ.

အဘိမုခီကရဏမာလပနံ၊ တဒဓိကေ လိင်္ဂတ္ထေ ပဌမာ ဟောတိ.

‘‘အာလပနေ သိ ဂသညော’’တိ သိဿ ဂသညာ. ဂေဣတွေဝ.

အကာရာ ပိတာဒျန္တာနမာ.

ဂေ ပရေ အကာရော ပိတုသတ္ထုအတ္တရာဇာဒီနမန္တော စ အာတ္တံ ယာတိ.

‘‘အာကာရော ဝါ’’တိ ဂေ ပရေ အာကာရဿ ရဿော ဝါ.

သေသတော လောပံ ဂသီပိ.

သော သိံ သျာ စ သခါတော ဂဿေဝါတျာဒိနိဒ္ဒိဋ္ဌေဟညေ အဝဏ္ဏိဝဏ္ဏုဝဏ္ဏောကာရန္တာ သေသာ၊ တေဟိ ပရေ ဂသီ လုပျန္တေ. ဟေ - ဗုဒ္ဓ၊ ဗုဒ္ဓါ. ယော - ဗုဒ္ဓါ.

၅၀. ကမ္မတ္ထေ ဒုတိယာ.

ယံ ကရောတိ၊ တံ ကမ္မံ နာမ. တတ္ထ ဒုတိယာ ဟောတိ. အံဗုဒ္ဓံ. ယောဿ ဧ-ဗုဒ္ဓေ.

၅၁. တတိယာတွေဝ.

ကတ္တရိ စ.

ယော ကရောတိ၊ သ ကတ္တာ နာမ. တတ္ထ တတိယာ ဟောတိ. နာ.

အတော နေန.

အကာရာ ပရော နာ ဧနံ ယာတိ. ဗုဒ္ဓေန.

ဟိ.

သုဟိသွကာရော ဧ.

သုဟိသု ပရေသွကာရဿ ဧ ဟောတိ.

သ္မာဟိသ္မိန္နံ မှာဘိမှိ ဝါ.

သဗ္ဗသဒ္ဒေဟိ ပရေသံ သ္မာဟိသ္မိန္နံ ယထာသင်္ချံ မှာဘိမှိဣစ္စေတေ ဝါ ဟောန္တိ. ဗုဒ္ဓေဘိ၊ ဗုဒ္ဓေဟိ.

၅၂. ကရဏေ တတိယာ.

ယေန ဝါ ကယိရတေ၊ တံ ကရဏံ နာမ. တတ္ထ တတိယာ ဟောတိ. သဗ္ဗံ ကတ္တုသမံ.

၅၃. သမ္ပဒါနေ စတုတ္ထီ.

ယဿ ဒါတုကာမော ရောစတေ၊ ဓာရယတေ ဝါ၊ တံ သမ္ပဒါနံ နာမ. တတ္ထ စတုတ္ထီ ဟောတိ. သ.

အတော ဝါတွေဝ.

အာယ စတုတ္ထေကဝစနဿ တု.

အကာရာ ပရဿ စတုတ္ထေကဝစနဿ အာယော ဝါ ဟောတိ. ဗုဒ္ဓါယ.

‘‘သာဂမော သေ’’တိ သေ သကာရာဂမော. ဗုဒ္ဓဿ. နံ.

ဒီဃန္တွေဝ.

သုနံဟိသု စ.

သုနံဟိသု ပရေသု သရာဒီနံ ဒီဃော ဟောတိ. စသဒ္ဒေန ကွစိ န. ဗုဒ္ဓါနံ.

၅၄. အပါဒါနေ ပဉ္စမီ.

ယသ္မာဒပေတိ၊ ဘယမာဒတ္တေ ဝါ၊ တဒပါဒါနံ နာမ၊ တတ္ထ ပဉ္စမီ ဟောတိ. သ္မာ.

အတော အာဧတွေဝ.

၅၅. သ္မာသ္မိန္နံ ဝါ.

အကာရာ ပရေသံ သ္မာသ္မိန္နံ အာဧ ဝါ ဟောန္တိ. ဗုဒ္ဓါ၊ ဗုဒ္ဓမှာ၊ ဗုဒ္ဓသ္မာ. ဗုဒ္ဓေဘိ၊ ဗုဒ္ဓေဟိ.

၅၆. သာမိသ္မိံ ဆဋ္ဌီ.

ယဿ ဝါ ပရိဂ္ဂဟော၊ တံ သာမီ နာမ. တတ္ထ ဆဋ္ဌီ ဟောတိ. ဗုဒ္ဓဿ. ဗုဒ္ဓါနံ.

၅၇. ဩကာသေ သတ္တမီ.

ယောဓာရော၊ တမောကာသံ နာမ. တတ္ထ သတ္တမီ ဟောတိ. သ္မိံ-ဗုဒ္ဓေ၊ ဗုဒ္ဓမှိ၊ ဗုဒ္ဓသ္မိံ. သု-ဗုဒ္ဓေသု.

၅၈. ဗုဒ္ဓေါ ဗုဒ္ဓ သုခံ ဒဒါတိ သရတော ဗုဒ္ဓံ တတော ဒုက္ကရံ၊

ကိံ ဗုဒ္ဓေန မဟိဒ္ဓယောပိ မုနယော ဗုဒ္ဓေန ဇာတာသုခီ၊

ဗုဒ္ဓဿေဝ မနံ ဒဒေ ပဒမဟံ ဗုဒ္ဓါ လဘေယျာစ္စုတံ၊

ဗုဒ္ဓဿိဒ္ဓိ န ကိံ ကရေ ဘဝဘဝေ ဘတ္တျတ္ထု ဗုဒ္ဓေ မမ.

၅၉. ဣတော ပရံ တတိယာပဉ္စမီနဉ္စ စတုတ္ထီဆဋ္ဌီနဉ္စ သရူပတ္တာ ပဉ္စမီဆဋ္ဌိယော ဘီယော ဥပေက္ခန္တေ.

၆၀. အတ္တ၊ သိ.

ဗြဟ္မတ္တသခရာဇာဒိတော တွေဝ.

သျာ စ.

ဗြဟ္မာဒိတော သိဿ အာ ဟောတိ. အတ္တာ.

‘‘ယောနမာနော’’တိ ဗြဟ္မာဒိတော ယောနံ အာနောတ္တံ. အတ္တာနော.

၆၁. ဟေ - အတ္တ၊ အတ္တာ. ယော၊ အတ္တာနော.

၆၂. ‘‘ဗြဟ္မတ္တသခရာဇာဒိတော အမာန’’န္တိ ဗြဟ္မာဒိတော အံဝစနဿ အာနံ ဝါ ဟောတိ. အတ္တာနံ၊ အတ္တံ. အတ္တာနော.

၆၃. အတ္တေန၊ အတ္တနာ. ပက္ခေ-ဇိနဝစနာနုရောဓေန ဧနာဘာဝေါ.

‘‘အတ္တာန္တော ဟိသ္မိမနတ္တံ’’တိ ဟိမှိ အတ္တန္တဿ အနော. အတ္တနေဟိ. ဧဝံ ကရဏေ.

၆၄. ‘‘သဿ နော’’တိ နောကာရော. အတ္တနော. အတ္တာနံ.

၆၅. အမှတုမှန္တု ရာဇဗြဟ္မတ္တသခ သတ္ထုပိတာဒီဟိ သ္မာ နာဝ.

အမှာဒိတော သ္မာ နာ ဣဝ ဟောတိ. အတ္တနာ.

၆၆. ‘‘တတော သ္မိန္နီ’’တိ သ္မိနော နိ. အတ္တနိ. ‘‘အနတ္တ’’န္တိ ဘာဝနိဒ္ဒေသေန သုမှိ စ အနော. အတ္တနေသု.

၆၇. ရာဇာ အတ္တာဝ. နာ.

သဝိဘတ္တိဿ ရာဇဿေတွေဝ.

နာမှိ ရညာ ဝါ.

နာမှိ သဝိဘတ္တိဿ ရာဇသဒ္ဒဿ ရညာ ဝါ ဟောတိ. ရညာ၊ ရာဇေန.

ရာဇဿ ရာဇု သုနံဟိသု စ.

သုနံ ဟိသု ပရေသု ရာဇဿ ရာဇု ဟောတိ၊ စကာရေန ကွစိ န.

‘‘သုနံဟိသု စေတိ’’ ဒီဃေ - ရာဇူဘိ၊ ရာဇူဟိ၊ ရာဇေဘိ၊ ရာဇေဟိ.

၆၈. သဝိဘတ္တိဿေတျဓိကာရော.

‘‘ရာဇဿ ရညော ရာဇိနော သေ’’တိ သေ ရညော ရာဇိနော ဟောန္တိ. ရညော၊ ရာဇိနော.

‘‘ရညံ နမှိ ဝါ’’တိ နမှိ ရညံ ဝါ. ရညံ၊ ရာဇူနံ၊ ရာဇာနံ.

၆၉. သ္မာဿနာတုလျတ္တာ-နာမှိ ရညာ ဝါ. ရညာ၊ ရာဇမှာ၊ ရာဇသ္မာ.

၇၀. ‘‘သ္မိမှိ ရညေ ရာဇိနီ’’တိ သ္မိမှိ ရညေ ရာဇိနိ ဟောန္တိ. ရညေ၊ ရာဇိနိ. ရာဇူသု၊ ရာဇေသု.

၇၁. ဂုဏဝန္တု၊ သိ.

သဝိဘတ္တိဿ န္တုဿေတွေဝ.

‘‘အာ သိမှီ’’တိ သိမှိ သဝိဘတ္တိဿ န္တုဿ အာ. ဂုဏဝါ.

ယောမှိ ပဌမေတွေဝ.

န္တုဿ န္တော.

ပဌမေ ယောမှိ သဝိဘတ္တိဿ န္တုဿ န္တောကာရော ဟောတိ. ဂုဏဝန္တော.

သုနံဟိသု အတ္တံတွေဝ.

န္တုဿန္တော ယောသု စ.

သုနံဟိသု၊ ယောသု၊ စကာရေန အညေသုပိ ပရေသု န္တုဿန္တော အတ္တံ ယာတိ. ဂုဏဝန္တာ.

၇၂. သဝိဘတ္တိဿေတျဓိကာရော. အံဣတွေဝ.

အဝဏ္ဏော စ ဂေ.

ဂေ ပရေ သဝိဘတ္တိဿ န္တုဿ အံအအာ ဟောန္တိ. ဟေဂုဏဝံ၊ဂုဏဝ၊ ဂုဏဝါ. ယော - ဂုဏဝန္တော၊ ဂုဏဝန္တာ.

၇၃. အတ္တံ – ဂုဏဝန္တံ. ဂုဏဝန္တေ.

၇၄. ‘‘တောတိတာ သသ္မိံ နာသွီ’’တိ သဝိဘတ္တိဿ န္တုဿ နာမှိ တာ၊ သေ တောကာရော၊ သ္မိမှိ တိ စ ဝါ. ဂုဏဝတာ၊ ဂုဏဝန္တေန. ဂုဏဝန္တေဘိ၊ ဂုဏဝန္တေဟိ.

၇၅. ဂုဏဝတော၊ ဂုဏဝန္တဿ.

‘‘နမှိ တံ ဝါ’’တိ နမှိ န္တုဿ တံ ဝါ. ဂုဏဝတံ၊ ဂုဏဝန္တာနံ. သ္မာ နာဝ.

၇၆. ဂုဏဝတိ၊ ဂုဏဝန္တေ၊ ဂုဏဝန္တမှိ၊ ဂုဏဝန္တသ္မိံ၊ ဂုဏဝန္တေသု.

၇၇. ဂစ္ဆန္တ၊ သိ.

‘‘သိမှိ ဂစ္ဆန္တာဒီနံ န္တသဒ္ဒေါ အ’’န္တိ န္တသဒ္ဒဿ အံဝါ၊ သိလောပေါ. ဂစ္ဆံ၊ သိဿ ဩ – ဂစ္ဆန္တော.

ဂစ္ဆန္တာဒီနံ န္တသဒ္ဒေါတွေဝ.

သေသေသုန္တုဝ.

ဝုတ္တံ ဟိတွာ သေသေသု ဂစ္ဆန္တာဒီနံ န္တသဒ္ဒေါ န္တု ဣဝ ဒဋ္ဌဗ္ဗော. ဂစ္ဆန္တော၊ ဂစ္ဆန္တာဣစ္စာဒိ.

သေသံ ဂုဏဝန္တုသမံ.

၇၈. ဂစ္ဆန္တာဒယော နာမ အန္တပ္ပစ္စယန္တာ.

၇၉. အဂ္ဂိ၊ သိလောပေါ.

‘‘ဣဝဏ္ဏုဝဏ္ဏာ ဈလာ’’တိ ဣဝဏ္ဏုဝဏ္ဏာနံ ယထာသင်္ချံ ဈလသညာ.

ဈလတော ဝါတွေဝ.

ဃပတော စ ယောနံ လောပေါ.

ဃပဈလတော ယောနံ လောပေါ ဝါ ဟောတိ.

ယောသု ကတနိကာရလောပေသု ဒီဃံ.

ကတော နိကာရော လောပေါ စ ယေသံ တေသု ယောသု သရာနံ ဒီဃော ဟောတိ. အဂ္ဂီ. ပက္ခေ-အတ္တန္တွေဝ.

ယော သွကတရဿော ဈော.

ယောသု အကတရဿော ဈော အတ္တံ ယာတိ. အဂ္ဂယော. တထာလပနေ.

၈၀. အံ မော နိဂ္ဂဟီတံ ဈလပေဟိ.

ဈလပတော အံ မော စ ဗိန္ဒုံ ယန္တိ. အဂ္ဂိံ. အဂ္ဂီ၊ အဂ္ဂယော.

၈၁. အဂ္ဂိနာ. ဒီဃေ-အဂ္ဂီဘိ၊ အဂ္ဂီဟိ.

၈၂. ‘‘ဈလတော သဿ နော ဝါ’’တိ သဿ နောတ္တံ ဝါ. အဂ္ဂိနော၊ အဂ္ဂိဿ. အဂ္ဂီနံ.

၈၃. ‘‘ဈလတော စေ’’တိ သ္မာဿ နာ. အဂ္ဂိနာ.

၈၄. အဂ္ဂိမှိ၊ အဂ္ဂိသ္မိံ. အဂ္ဂီသု.

၈၅. အာဒိ အဂ္ဂီဝ. သ္မိံနော ပန ‘‘အာဒိတော ဩ စေ’’တိ အံ၊ ဩ စ ဝါ. အာဒိ၊ အာဒေါ၊ အာဒိမှိ၊ အာဒိသ္မိံ. အာဒီသု.

၈၆. ဒဏ္ဍီ၊ သိ.

‘‘အဃော ရဿ’’မာဒိနာ ရဿေ သမ္ပတ္တေ ‘‘န သိသ္မိမနပုံသကာနီ’’တိ သိမှိ အနပုံသကာနံ န ရဿော. သိလောပေါ၊ ဒဏ္ဍီ၊ ယောလောပေ – ဒဏ္ဍီ. ပက္ခေ –

အဃော ရဿမေကဝစနယောသွပိ စ.

ဧကဝစနယောသု ဈလပါ ရဿံ ယန္တိ.

ဈတော ကတရဿာတွေဝ.

ယောနံ နော.

ကတဿာ ဈတော ယောနံ နောတ္တံ ဟောတိ. ဒဏ္ဍိနော.

၈၇. ‘‘ဈလပါ ရဿ’’န္တိ ဂေ ပရေ ဈလပါနံ ရဿော. ဟေဒဏ္ဍိ. ဒဏ္ဍီ၊ ဒဏ္ဍိနော.

၈၈. ဝါ အံဣတွေဝ.

‘‘နံ ဈတော ကတရဿာ’’တိ အံဣစ္စဿ နံ ဝါ. ဒဏ္ဍိနံ၊ ဒဏ္ဍိံ. ဒဏ္ဍီ၊ ဒဏ္ဍိနော.

၈၉. ဒဏ္ဍိနာ. ဒဏ္ဍီဘိ၊ ဒဏ္ဍီဟိ.

၉၀. ဒဏ္ဍိနော၊ ဒဏ္ဍိဿ. ဒဏ္ဍီနံ.

၉၁. ဈတော ကတရဿာတွေဝ.

‘‘သ္မိန္နီ’’တိ သ္မိနော နိ. ဒဏ္ဍိနိ. ဒဏ္ဍီသု.

၉၂. ဘိက္ခု၊ သိလောပေါ.

ဝါ ယောနံတွေဝ.

‘‘လတော ဝေါ ကာရော စေ’’တိ လတော ယောနံ ဝေါတ္တံ ဝါ.