၈. ဒေဝါသုရသင်္ဂါမသုတ္တံ

၃၉. ‘‘ဘူတပုဗ္ဗံ၊ ဘိက္ခဝေ၊ ဒေဝါသုရသင်္ဂါမော သမုပဗျူဠှော [သမုပဗ္ဗူဠှော (သီ. ပီ.)] အဟောသိ. တသ္မိံ ခေါ ပန၊ ဘိက္ခဝေ၊ သင်္ဂါမေ အသုရာ ဇိနိံသု၊ ဒေဝါ ပရာဇယိံသု [ပရာဇိယိံသု (သီ. သျာ. က.)]. ပရာဇိတာ စ၊ ဘိက္ခဝေ၊ ဒေဝါ [ဒေဝါ ဘီတာ (ပီ.)] အပယိံသုယေဝ [အပယံသွေဝ (သီ.)] ဥတ္တရေနာဘိမုခါ၊ အဘိယိံသု [အဘိယံသု (သီ.)] အသုရာ. အထ ခေါ၊ ဘိက္ခဝေ၊ ဒေဝါနံ ဧတဒဟောသိ – ‘အဘိယန္တေဝ ခေါ အသုရာ. ယံနူန မယံ ဒုတိယမ္ပိ အသုရေဟိ သင်္ဂါမေယျာမာ’တိ. ဒုတိယမ္ပိ ခေါ၊ ဘိက္ခဝေ၊ ဒေဝါ အသုရေဟိ သင်္ဂါမေသုံ. ဒုတိယမ္ပိ ခေါ၊ ဘိက္ခဝေ၊ အသုရာဝ ဇိနိံသု၊ ဒေဝါ ပရာဇယိံသု. ပရာဇိတာ စ၊ ဘိက္ခဝေ၊ ဒေဝါ အပယိံသုယေဝ ဥတ္တရေနာဘိမုခါ၊ အဘိယိံသု အသုရာ’’.

အထ ခေါ၊ ဘိက္ခဝေ၊ ဒေဝါနံ ဧတဒဟောသိ – ‘အဘိယန္တေဝ ခေါ အသုရာ. ယံနူန မယံ တတိယမ္ပိ အသုရေဟိ သင်္ဂါမေယျာမာ’တိ. တတိယမ္ပိ ခေါ၊ ဘိက္ခဝေ၊ ဒေဝါ အသုရေဟိ သင်္ဂါမေသုံ. တတိယမ္ပိ ခေါ၊ ဘိက္ခဝေ၊ အသုရာဝ ဇိနိံသု၊ ဒေဝါ ပရာဇယိံသု. ပရာဇိတာ စ၊ ဘိက္ခဝေ၊ ဒေဝါ ဘီတာ ဒေဝပုရံယေဝ ပဝိသိံသု. ဒေဝပုရဂတာနဉ္စ ပန [ပုန (က.)]၊ ဘိက္ခဝေ၊ ဒေဝါနံ ဧတဒဟောသိ – ‘ဘီရုတ္တာနဂတေန ခေါ ဒါနိ မယံ ဧတရဟိ အတ္တနာ ဝိဟရာမ အကရဏီယာ အသုရေဟီ’တိ. အသုရာနမ္ပိ၊ ဘိက္ခဝေ၊ ဧတဒဟောသိ – ‘ဘီရုတ္တာနဂတေန ခေါ ဒါနိ ဒေဝါ ဧတရဟိ အတ္တနာ ဝိဟရန္တိ အကရဏီယာ အမှေဟီ’တိ.

‘‘ဘူတပုဗ္ဗံ၊ ဘိက္ခဝေ၊ ဒေဝါသုရသင်္ဂါမော သမုပဗျူဠှော အဟောသိ. တသ္မိံ ခေါ ပန၊ ဘိက္ခဝေ၊ သင်္ဂါမေ ဒေဝါ ဇိနိံသု၊ အသုရာ ပရာဇယိံသု. ပရာဇိတာ စ၊ ဘိက္ခဝေ၊ အသုရာ အပယိံသုယေဝ ဒက္ခိဏေနာဘိမုခါ၊ အဘိယိံသု ဒေဝါ. အထ ခေါ၊ ဘိက္ခဝေ၊ အသုရာနံ ဧတဒဟောသိ – ‘အဘိယန္တေဝ ခေါ ဒေဝါ. ယံနူန မယံ ဒုတိယမ္ပိ ဒေဝေဟိ သင်္ဂါမေယျာမာ’တိ. ဒုတိယမ္ပိ ခေါ၊ ဘိက္ခဝေ၊ အသုရာ ဒေဝေဟိ သင်္ဂါမေသုံ. ဒုတိယမ္ပိ ခေါ၊ ဘိက္ခဝေ၊ ဒေဝါ ဇိနိံသု၊ အသုရာ ပရာဇယိံသု. ပရာဇိတာ စ၊ ဘိက္ခဝေ၊ အသုရာ အပယိံသုယေဝ ဒက္ခိဏေနာဘိမုခါ၊ အဘိယိံသု ဒေဝါ’’.

အထ ခေါ၊ ဘိက္ခဝေ၊ အသုရာနံ ဧတဒဟောသိ – ‘အဘိယန္တေဝ ခေါ ဒေဝါ. ယံနူန မယံ တတိယမ္ပိ ဒေဝေဟိ သင်္ဂါမေယျာမာ’တိ. တတိယမ္ပိ ခေါ၊ ဘိက္ခဝေ၊ အသုရာ ဒေဝေဟိ သင်္ဂါမေသုံ. တတိယမ္ပိ ခေါ၊ ဘိက္ခဝေ၊ ဒေဝါ ဇိနိံသု၊ အသုရာ ပရာဇယိံသု. ပရာဇိတာ စ၊ ဘိက္ခဝေ၊ အသုရာ ဘီတာ အသုရပုရံယေဝ ပဝိသိံသု. အသုရပုရဂတာနဉ္စ ပန၊ ဘိက္ခဝေ၊ အသုရာနံ ဧတဒဟောသိ – ‘ဘီရုတ္တာနဂတေန ခေါ ဒါနိ မယံ ဧတရဟိ အတ္တနာ ဝိဟရာမ အကရဏီယာ ဒေဝေဟီ’တိ. ဒေဝါနမ္ပိ၊ ဘိက္ခဝေ၊ ဧတဒဟောသိ – ‘ဘီရုတ္တာနဂတေန ခေါ ဒါနိ အသုရာ ဧတရဟိ အတ္တနာ ဝိဟရန္တိ အကရဏီယာ အမှေဟီ’တိ.

‘‘ဧဝမေဝံ ခေါ၊ ဘိက္ခဝေ၊ ယသ္မိံ သမယေ ဘိက္ခု ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ သဝိတက္ကံ သဝိစာရံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟရတိ၊ တသ္မိံ၊ ဘိက္ခဝေ၊ သမယေ ဘိက္ခုဿ ဧဝံ ဟောတိ – ‘ဘီရုတ္တာနဂတေန ခေါ ဒါနာဟံ ဧတရဟိ အတ္တနာ ဝိဟရာမိ အကရဏီယော မာရဿာ’တိ. မာရဿာပိ၊ ဘိက္ခဝေ၊ ပါပိမတော ဧဝံ ဟောတိ – ‘ဘီရုတ္တာနဂတေန ခေါ ဒါနိ ဘိက္ခု ဧတရဟိ အတ္တနာ ဝိဟရတိ အကရဏီယော မယှ’’’န္တိ.

‘‘ယသ္မိံ၊ ဘိက္ခဝေ၊ သမယေ ဘိက္ခု ဝိတက္ကဝိစာရာနံ ဝူပသမာ။ပေ။ ဒုတိယံ ဈာနံ။ တတိယံ ဈာနံ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ၊ ဘိက္ခဝေ၊ သမယေ ဘိက္ခုဿ ဧဝံ ဟောတိ – ‘ဘီရုတ္တာနဂတေန ခေါ ဒါနာဟံ ဧတရဟိ အတ္တနာ ဝိဟရာမိ အကရဏီယော မာရဿာ’တိ. မာရဿာပိ၊ ဘိက္ခဝေ၊ ပါပိမတော ဧဝံ ဟောတိ – ‘ဘီရုတ္တာနဂတေန ခေါ ဒါနိ ဘိက္ခု ဧတရဟိ အတ္တနာ ဝိဟရတိ၊ အကရဏီယော မယှ’’’န္တိ.

‘‘ယသ္မိံ၊ ဘိက္ခဝေ၊ သမယေ ဘိက္ခု သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ ‘အနန္တော အာကာသော’တိ အာကာသာနဉ္စာယတနံ ဥပသမ္ပဇ္ဇ ဝိဟရတိ. အယံ ဝုစ္စတိ၊ ဘိက္ခဝေ၊ ‘ဘိက္ခု အန္တမကာသိ မာရံ၊ အပဒံ ဝဓိတွာ မာရစက္ခုံ အဒဿနံ ဂတော ပါပိမတော တိဏ္ဏော လောကေ ဝိသတ္တိက’’’န္တိ.

‘‘ယသ္မိံ၊ ဘိက္ခဝေ၊ သမယေ ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ ‘အနန္တံ ဝိညာဏ’န္တိ ဝိညာဏဉ္စာယတနံ ဥပသမ္ပဇ္ဇ ဝိဟရတိ။ သဗ္ဗသော ဝိညာဏဉ္စာယတနံ သမတိက္ကမ္မ ‘နတ္ထိ ကိဉ္စီ’တိ အာကိဉ္စညာယတနံ ဥပသမ္ပဇ္ဇ ဝိဟရတိ။ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနံ ဥပသမ္ပဇ္ဇ ဝိဟရတိ။ သဗ္ဗသော နေဝသညာနာသညာယတနံ သမတိက္ကမ္မ သညာဝေဒယိတနိရောဓံ ဥပသမ္ပဇ္ဇ ဝိဟရတိ၊ ပညာယ စဿ ဒိသွာ အာသဝါ ပရိက္ခီဏာ ဟောန္တိ. အယံ ဝုစ္စတိ၊ ဘိက္ခဝေ၊ ‘ဘိက္ခု အန္တမကာသိ မာရံ၊ အပဒံ ဝဓိတွာ မာရစက္ခုံ အဒဿနံ ဂတော ပါပိမတော တိဏ္ဏော လောကေ ဝိသတ္တိက’’’န္တိ. အဋ္ဌမံ.