၃. နိဗ္ဗာနသုခသုတ္တံ

၃၄. ဧကံ သမယံ အာယသ္မာ သာရိပုတ္တော ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တတြ ခေါ အာယသ္မာ သာရိပုတ္တော ဘိက္ခူ အာမန္တေသိ – ‘‘သုခမိဒံ၊ အာဝုသော၊ နိဗ္ဗာနံ. သုခမိဒံ၊ အာဝုသော၊ နိဗ္ဗာန’’န္တိ. ဧဝံ ဝုတ္တေ အာယသ္မာ ဥဒါယီ အာယသ္မန္တံ သာရိပုတ္တံ ဧတဒဝေါစ – ‘‘ကိံ ပနေတ္ထ၊ အာဝုသော သာရိပုတ္တ၊ သုခံ ယဒေတ္ထ နတ္ထိ ဝေဒယိတ’’န္တိ? ‘‘ဧတဒေဝ ခွေတ္ထ၊ အာဝုသော၊ သုခံ ယဒေတ္ထ နတ္ထိ ဝေဒယိတံ. ပဉ္စိမေ၊ အာဝုသော၊ ကာမဂုဏာ. ကတမေ ပဉ္စ? စက္ခုဝိညေယျာ ရူပါ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ၊ သောတဝိညေယျာ သဒ္ဒါ။ပေ။ ဃာနဝိညေယျာ ဂန္ဓာ။ ဇိဝှါဝိညေယျာ ရသာ။ ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ – ဣမေ ခေါ၊ အာဝုသော၊ ပဉ္စ ကာမဂုဏာ. ယံ ခေါ၊ အာဝုသော၊ ဣမေ ပဉ္စ ကာမဂုဏေ ပဋိစ္စ ဥပ္ပဇ္ဇတိ သုခံ သောမနဿံ၊ ဣဒံ ဝုစ္စတာဝုသော၊ ကာမသုခံ.

‘‘ဣဓာဝုသော၊ ဘိက္ခု ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ကာမသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ကာမသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု ဝိတက္ကဝိစာရာနံ ဝူပသမာ။ပေ။ ဒုတိယံ ဈာနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ဝိတက္ကသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ဝိတက္ကသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု ပီတိယာ စ ဝိရာဂါ။ပေ။ တတိယံ ဈာနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ပီတိသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ပီတိသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ဥပေက္ခာသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ဥပေက္ခာသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အနန္တော အာကာသောတိ အာကာသာနဉ္စာယတနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ရူပသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ရူပသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ အနန္တံ ဝိညာဏန္တိ ဝိညာဏဉ္စာယတနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော အာကာသာနဉ္စာယတနသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ အာကာသာနဉ္စာယတနသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သဗ္ဗသော ဝိညာဏဉ္စာယတနံ သမတိက္ကမ္မ၊ နတ္ထိ ကိဉ္စီတိ အာကိဉ္စညာယတနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော ဝိညာဏဉ္စာယတနသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ ဝိညာဏဉ္စာယတနသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနံ ဥပသမ္ပဇ္ဇ ဝိဟရတိ. တဿ စေ၊ အာဝုသော၊ ဘိက္ခုနော ဣမိနာ ဝိဟာရေန ဝိဟရတော အာကိဉ္စညာယတနသဟဂတာ သညာမနသိကာရာ သမုဒါစရန္တိ၊ သွဿ ဟောတိ အာဗာဓော. သေယျထာပိ၊ အာဝုသော၊ သုခိနော ဒုက္ခံ ဥပ္ပဇ္ဇေယျ ယာဝဒေဝ အာဗာဓာယ၊ ဧဝမေဝဿ တေ အာကိဉ္စညာယတနသဟဂတာ သညာမနသိကာရာ သမုဒါစရန္တိ. သွဿ ဟောတိ အာဗာဓော. ယော ခေါ ပနာဝုသော၊ အာဗာဓော ဒုက္ခမေတံ ဝုတ္တံ ဘဂဝတာ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာနံ.

‘‘ပုန စပရံ၊ အာဝုသော၊ ဘိက္ခု သဗ္ဗသော နေဝသညာနာသညာယတနံ သမတိက္ကမ္မ သညာဝေဒယိတနိရောဓံ ဥပသမ္ပဇ္ဇ ဝိဟရတိ၊ ပညာယ စဿ ဒိသွာ အာသဝါ ပရိက္ခီဏာ ဟောန္တိ. ဣမိနာပိ ခေါ ဧတံ၊ အာဝုသော၊ ပရိယာယေန ဝေဒိတဗ္ဗံ ယထာ သုခံ နိဗ္ဗာန’’န္တိ. တတိယံ.