၄. သမိဒ္ဓိသုတ္တံ

၁၄. အထ ခေါ အာယသ္မာ သမိဒ္ဓိ ယေနာယသ္မာ သာရိပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ သာရိပုတ္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ သမိဒ္ဓိံ အာယသ္မာ သာရိပုတ္တော ဧတဒဝေါစ – ‘‘ကိမာရမ္မဏာ၊ သမိဒ္ဓိ၊ ပုရိသဿ သင်္ကပ္ပဝိတက္ကာ ဥပ္ပဇ္ဇန္တီ’’တိ? ‘‘နာမရူပါရမ္မဏာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကွ နာနတ္တံ ဂစ္ဆန္တီ’’တိ? ‘‘ဓာတူသု၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံသမုဒယာ’’တိ? ‘‘ဖဿသမုဒယာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံသမောသရဏာ’’တိ? ‘‘ဝေဒနာသမောသရဏာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံပမုခါ’’တိ? ‘‘သမာဓိပ္ပမုခါ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံအဓိပတေယျာ’’တိ? ‘‘သတာဓိပတေယျာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံဥတ္တရာ’’တိ? ‘‘ပညုတ္တရာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံသာရာ’’တိ? ‘‘ဝိမုတ္တိသာရာ၊ ဘန္တေ’’တိ. ‘‘တေ ပန၊ သမိဒ္ဓိ၊ ကိံဩဂဓာ’’တိ? ‘‘အမတောဂဓာ၊ ဘန္တေ’’တိ.

‘‘‘ကိမာရမ္မဏာ၊ သမိဒ္ဓိ၊ ပုရိသဿ သင်္ကပ္ပဝိတက္ကာ ဥပ္ပဇ္ဇန္တီ’တိ၊ ဣတိ ပုဋ္ဌော သမာနော ‘နာမရူပါရမ္မဏာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကွ နာနတ္တံ ဂစ္ဆန္တီ’တိ၊ ဣတိ ပုဋ္ဌော သမာနော ‘ဓာတူသု၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံသမုဒယာ’တိ၊ ဣတိ ပုဋ္ဌော သမာနော ‘ဖဿသမုဒယာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံသမောသရဏာ’တိ၊ ဣတိ ပုဋ္ဌော သမာနော ‘ဝေဒနာသမောသရဏာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံပမုခါ’တိ၊ ဣတိ ပုဋ္ဌော သမာနော ‘သမာဓိပ္ပမုခါ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံအဓိပတေယျာ’တိ၊ ဣတိ ပုဋ္ဌော သမာနော ‘သတာဓိပတေယျာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံဥတ္တရာ’တိ၊ ဣတိ ပုဋ္ဌော သမာနော ‘ပညုတ္တရာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံသာရာ’တိ၊ ဣတိ ပုဋ္ဌော သမာနော ‘ဝိမုတ္တိသာရာ၊ ဘန္တေ’တိ ဝဒေသိ. ‘တေ ပန၊ သမိဒ္ဓိ၊ ကိံဩဂဓာ’တိ၊ ဣတိ ပုဋ္ဌော သမာနော ‘အမတောဂဓာ၊ ဘန္တေ’တိ ဝဒေသိ. သာဓု သာဓု၊ သမိဒ္ဓိ! သာဓု ခေါ တွံ၊ သမိဒ္ဓိ၊ ပုဋ္ဌော [ပဉှံ (သီ. သျာ. ပီ.)] ပုဋ္ဌော ဝိဿဇ္ဇေသိ၊ တေန စ မာ မညီ’’တိ. စတုတ္ထံ.