၂. နိဿယသုတ္တံ

၂. အထ ခေါ အညတရော ဘိက္ခု ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ။ပေ။ ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ – ‘‘‘နိဿယသမ္ပန္နော နိဿယသမ္ပန္နော’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ ဘိက္ခု နိဿယသမ္ပန္နော ဟောတီ’’တိ? ‘‘သဒ္ဓံ စေ၊ ဘိက္ခု၊ ဘိက္ခု နိဿာယ အကုသလံ ပဇဟတိ ကုသလံ ဘာဝေတိ၊ ပဟီနမေဝဿ တံ အကုသလံ ဟောတိ. ဟိရိံ စေ၊ ဘိက္ခု၊ ဘိက္ခု နိဿာယ။ပေ။ ဩတ္တပ္ပံ စေ၊ ဘိက္ခု၊ ဘိက္ခု နိဿာယ။ပေ။ ဝီရိယံ စေ၊ ဘိက္ခု၊ ဘိက္ခု နိဿာယ။ပေ။ ပညံ စေ၊ ဘိက္ခု၊ ဘိက္ခု နိဿာယ အကုသလံ ပဇဟတိ ကုသလံ ဘာဝေတိ၊ ပဟီနမေဝဿ တံ အကုသလံ ဟောတိ. တံ ဟိဿ ဘိက္ခုနော အကုသလံ ပဟီနံ ဟောတိ သုပ္ပဟီနံ၊ ယံသ အရိယာယ ပညာယ ဒိသွာ ပဟီနံ’’.

‘‘တေန စ ပန၊ ဘိက္ခု၊ ဘိက္ခုနာ ဣမေသု ပဉ္စသု ဓမ္မေသု ပတိဋ္ဌာယ စတ္တာရော ဥပနိဿာယ ဝိဟာတဗ္ဗာ. ကတမေ စတ္တာရော? ဣဓ၊ ဘိက္ခု၊ ဘိက္ခု သင်္ခါယေကံ ပဋိသေဝတိ၊ သင်္ခါယေကံ အဓိဝါသေတိ၊ သင်္ခါယေကံ ပရိဝဇ္ဇေတိ၊ သင်္ခါယေကံ ဝိနောဒေတိ. ဧဝံ ခေါ၊ ဘိက္ခု၊ ဘိက္ခု နိဿယသမ္ပန္နော ဟောတီ’’တိ. ဒုတိယံ.