၉. သမဏဝဂ္ဂေါ

၁. ဘိက္ခုသုတ္တံ

၈၅. [မဟာနိ. ၁၈၊ စူဠနိ. အဇိတမာဏဝပုစ္ဆာနိဒ္ဒေသ ၈] ‘‘သတ္တန္နံ၊ ဘိက္ခဝေ၊ ဓမ္မာနံ ဘိန္နတ္တာ ဘိက္ခု ဟောတိ. ကတမေသံ သတ္တန္နံ? သက္ကာယဒိဋ္ဌိ ဘိန္နာ ဟောတိ၊ ဝိစိကိစ္ဆာ ဘိန္နာ ဟောတိ၊ သီလဗ္ဗတပရာမာသော ဘိန္နော ဟောတိ၊ ရာဂေါ ဘိန္နော ဟောတိ၊ ဒေါသော ဘိန္နော ဟောတိ၊ မောဟော ဘိန္နော ဟောတိ၊ မာနော ဘိန္နော ဟောတိ. ဣမေသံ ခေါ၊ ဘိက္ခဝေ၊ သတ္တန္နံ ဓမ္မာနံ ဘိန္နတ္တာ ဘိက္ခု ဟောတီ’’တိ. ပဌမံ.

၂. သမဏသုတ္တံ

၈၆. သတ္တန္နံ၊ ဘိက္ခဝေ၊ ဓမ္မာနံ သမိတတ္တာ သမဏော ဟောတိ။ပေ။. ဒုတိယံ.

၃. ဗြာဟ္မဏသုတ္တံ

၈၇. ဗာဟိတတ္တာ ဗြာဟ္မဏော ဟောတိ။ပေ။. တတိယံ.

၄. သောတ္တိယသုတ္တံ

၈၈. နိဿုတတ္တာ [နိဿုတ္တတ္တာ (သျာ.) မ. နိ. ၁.၄၃၄ ပဿိတဗ္ဗံ] သောတ္တိယော [သောတ္ထိကော (သီ.)၊ သောတ္တိကော (သျာ.)] ဟောတိ။ပေ။. စတုတ္ထံ.

၅. နှာတကသုတ္တံ

၈၉. နှာတတ္တာ နှာတကော [နဟာတတ္တော နဟာတကော (သီ. သျာ.)] ဟောတိ။ပေ။. ပဉ္စမံ.

၆. ဝေဒဂူသုတ္တံ

၉၀. ဝိဒိတတ္တာ ဝေဒဂူ ဟောတိ။ပေ။. ဆဋ္ဌံ.

၇. အရိယသုတ္တံ

၉၁. အာရကတ္တာ [အရဟတ္တာ (သီ.)၊ အရီ ဟတတ္တာ (က.) မ. နိ. ၁.၄၃၄ ပါဠိ အဋ္ဌကထာဋီကာ ပဿိတဗ္ဗာ. သျာမပေါတ္ထကေ ပန သကလမ္ပိ ဣဒံ သတ္တမသုတ္တံ နတ္ထိ] အရိယော ဟောတိ။ပေ။. သတ္တမံ.

၈. အရဟာသုတ္တံ

၉၂. ‘‘အာရကတ္တာ အရဟာ ဟောတိ. ကတမေသံ သတ္တန္နံ? သက္ကာယဒိဋ္ဌိ အာရကာ ဟောတိ၊ ဝိစိကိစ္ဆာ အာရကာ ဟောတိ၊ သီလဗ္ဗတပရာမာသော အာရကော ဟောတိ၊ ရာဂေါ အာရကော ဟောတိ၊ ဒေါသော အာရကော ဟောတိ၊ မောဟော အာရကော ဟောတိ၊ မာနော အာရကော ဟောတိ. ဣမေသံ ခေါ၊ ဘိက္ခဝေ၊ သတ္တန္နံ ဓမ္မာနံ အာရကတ္တာ အရဟာ ဟောတီ’’တိ. အဋ္ဌမံ.

၉. အသဒ္ဓမ္မသုတ္တံ

၉၃. ‘‘သတ္တိမေ၊ ဘိက္ခဝေ၊ အသဒ္ဓမ္မာ. ကတမေ သတ္တ? အဿဒ္ဓေါ ဟောတိ၊ အဟိရိကော ဟောတိ၊ အနောတ္တပ္ပီ ဟောတိ၊ အပ္ပဿုတော ဟောတိ၊ ကုသီတော ဟောတိ၊ မုဋ္ဌဿတိ ဟောတိ၊ ဒုပ္ပညော ဟောတိ. ဣမေ ခေါ၊ ဘိက္ခဝေ၊ သတ္တ အသဒ္ဓမ္မာ’’တိ. နဝမံ.

၁၀. သဒ္ဓမ္မသုတ္တံ

၉၄. ‘‘သတ္တိမေ၊ ဘိက္ခဝေ၊ သဒ္ဓမ္မာ. ကတမေ သတ္တ? သဒ္ဓေါ ဟောတိ၊ ဟိရီမာ ဟောတိ၊ ဩတ္တပ္ပီ ဟောတိ၊ ဗဟုဿုတော ဟောတိ၊ အာရဒ္ဓဝီရိယော ဟောတိ၊ သတိမာ ဟောတိ၊ ပညဝါ ဟောတိ. ဣမေ ခေါ၊ ဘိက္ခဝေ၊ သတ္တ သဒ္ဓမ္မာ’’တိ. ဒသမံ.

သမဏဝဂ္ဂေါ နဝမော.