၅. ပဌမဝိနယဓရသောဘနသုတ္တံ

၇၉. ‘‘သတ္တဟိ၊ ဘိက္ခဝေ၊ ဓမ္မေဟိ သမန္နာဂတော [သမန္နာဂတော ဘိက္ခု (သီ. သျာ. က.) အနန္တရသုတ္တဒွေယေ ပန ဣဒံ ပါဌနာနတ္တံ နတ္ထိ. ပရိ. ၃၂၇] ဝိနယဓရော သောဘတိ. ကတမေဟိ သတ္တဟိ? အာပတ္တိံ ဇာနာတိ၊ အနာပတ္တိံ ဇာနာတိ၊ လဟုကံ အာပတ္တိံ ဇာနာတိ၊ ဂရုကံ အာပတ္တိံ ဇာနာတိ၊ သီလဝါ ဟောတိ။ပေ။ သမာဒါယ သိက္ခတိ သိက္ခာပဒေသု၊ စတုန္နံ ဈာနာနံ အာဘိစေတသိကာနံ နိကာမလာဘီ ဟောတိ အကိစ္ဆလာဘီ အကသိရလာဘီ၊ အာသဝါနံ ခယာ။ပေ။ သစ္ဆိကတွာ ဥပသမ္ပဇ္ဇ ဝိဟရတိ. ဣမေဟိ ခေါ၊ ဘိက္ခဝေ၊ သတ္တဟိ ဓမ္မေဟိ သမန္နာဂတော ဝိနယဓရော သောဘတီ’’တိ. ပဉ္စမံ.