၁၀. အရကသုတ္တံ

၇၄. ‘‘ဘူတပုဗ္ဗံ၊ ဘိက္ခဝေ၊ အရကော နာမ သတ္ထာ အဟောသိ တိတ္ထကရော ကာမေသု ဝီတရာဂေါ. အရကဿ ခေါ ပန၊ ဘိက္ခဝေ၊ သတ္ထုနော အနေကာနိ သာဝကသတာနိ အဟေသုံ. အရကော သတ္ထာ သာဝကာနံ ဧဝံ ဓမ္မံ ဒေသေတိ – အပ္ပကံ၊ ဗြာဟ္မဏ၊ ဇီဝိတံ မနုဿာနံ ပရိတ္တံ လဟုကံ [လဟုသံ (ဋီကာ)] ဗဟုဒုက္ခံ ဗဟုပါယာသံ မန္တာယံ [မန္တာယ (သဗ္ဗတ္ထ) ဋီကာ ပဿိတဗ္ဗာ] ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ တိဏဂ္ဂေ ဥဿာဝဗိန္ဒု သူရိယေ ဥဂ္ဂစ္ဆန္တေ ခိပ္ပံယေဝ ပဋိဝိဂစ္ဆတိ၊ န စိရဋ္ဌိတိကံ ဟောတိ၊ ဧဝမေဝံ ခေါ၊ ဗြာဟ္မဏ၊ ဥဿာဝဗိန္ဒူပမံ ဇီဝိတံ မနုဿာနံ ပရိတ္တံ လဟုကံ ဗဟုဒုက္ခံ ဗဟုပါယာသံ မန္တာယံ ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ ထုလ္လဖုသိတကေ ဒေဝေ ဝဿန္တေ ဥဒကဗုဗ္ဗုဠံ [ဥဒကပုပ္ဖုဠံ (က.)] ခိပ္ပံယေဝ ပဋိဝိဂစ္ဆတိ၊ န စိရဋ္ဌိတိကံ ဟောတိ၊ ဧဝမေဝံ ခေါ၊ ဗြာဟ္မဏ၊ ဥဒကဗုဗ္ဗုဠူပမံ ဇီဝိတံ မနုဿာနံ ပရိတ္တံ လဟုကံ ဗဟုဒုက္ခံ ဗဟုပါယာသံ မန္တာယံ ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ ဥဒကေ ဒဏ္ဍရာဇိ ခိပ္ပံယေဝ ပဋိဝိဂစ္ဆတိ၊ န စိရဋ္ဌိတိကာ ဟောတိ၊ ဧဝမေဝံ ခေါ၊ ဗြာဟ္မဏ၊ ဥဒကေ ဒဏ္ဍရာဇူပမံ ဇီဝိတံ မနုဿာနံ ပရိတ္တံ။ပေ။ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ နဒီ ပဗ္ဗတေယျာ ဒူရင်္ဂမာ သီဃသောတာ ဟာရဟာရိနီ၊ နတ္ထိ သော ခဏော ဝါ လယော ဝါ မုဟုတ္တော ဝါ ယံ သာ [ယာယ (က.)] အာဝတ္တတိ [ထရတိ (သီ.)၊ ဓရတိ (သျာ.)၊ အဝတိဋ္ဌေယျ (?)]၊ အထ ခေါ သာ ဂစ္ဆတေဝ ဝတ္တတေဝ သန္ဒတေဝ၊ ဧဝမေဝံ ခေါ၊ ဗြာဟ္မဏ၊ နဒီပဗ္ဗတေယျူပမံ ဇီဝိတံ မနုဿာနံ ပရိတ္တံ လဟုကံ။ပေ။ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ ဗလဝါ ပုရိသော ဇိဝှဂ္ဂေ ခေဠပိဏ္ဍံ သံယူဟိတွာ အကသိရေနေဝ ဝမေယျ [ပတာပေယျ (က.)]၊ ဧဝမေဝံ ခေါ၊ ဗြာဟ္မဏ၊ ခေဠပိဏ္ဍူပမံ ဇီဝိတံ မနုဿာနံ ပရိတ္တံ။ပေ။ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ ဒိဝသံသန္တတ္တေ အယောကဋာဟေ မံသပေသိ [မံသပေသီ (သီ. သျာ.)] ပက္ခိတ္တာ ခိပ္ပံယေဝ ပဋိဝိဂစ္ဆတိ၊ န စိရဋ္ဌိတိကာ ဟောတိ၊ ဧဝမေဝံ ခေါ၊ ဗြာဟ္မဏ၊ မံသပေသူပမံ ဇီဝိတံ မနုဿာနံ ပရိတ္တံ။ပေ။ နတ္ထိ ဇာတဿ အမရဏံ.

‘‘သေယျထာပိ၊ ဗြာဟ္မဏ၊ ဂါဝီ ဝဇ္ဈာ အာဃာတနံ နီယမာနာ ယံ ယဒေဝ ပါဒံ ဥဒ္ဓရတိ၊ သန္တိကေဝ ဟောတိ ဝဓဿ သန္တိကေဝ မရဏဿ၊ ဧဝမေဝံ ခေါ၊ ဗြာဟ္မဏ၊ ဂေါဝဇ္ဈူပမံ [ဂါဝီဝဇ္ဈူပမံ (သီ. သျာ.)] ဇီဝိတံ မနုဿာနံ ပရိတ္တံ လဟုကံ ဗဟုဒုက္ခံ ဗဟုပါယာသံ မန္တာယံ ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏ’’န္တိ.

‘‘တေန ခေါ ပန၊ ဘိက္ခဝေ၊ သမယေန မနုဿာနံ သဋ္ဌိဝဿသဟဿာနိ အာယုပ္ပမာဏံ အဟောသိ၊ ပဉ္စဝဿသတိကာ ကုမာရိကာ အလံပတေယျာ အဟောသိ. တေန ခေါ ပန၊ ဘိက္ခဝေ၊ သမယေန မနုဿာနံ ဆဠေဝ အာဗာဓာ အဟေသုံ – သီတံ၊ ဥဏှံ၊ ဇိဃစ္ဆာ၊ ပိပါသာ၊ ဥစ္စာရော၊ ပဿာဝေါ. သော ဟိ နာမ၊ ဘိက္ခဝေ၊ အရကော သတ္ထာ ဧဝံ ဒီဃာယုကေသု မနုဿေသု ဧဝံ စိရဋ္ဌိတိကေသု ဧဝံ အပ္ပါဗာဓေသု သာဝကာနံ ဧဝံ ဓမ္မံ ဒေသေဿတိ – ‘အပ္ပကံ၊ ဗြာဟ္မဏ၊ ဇီဝိတံ မနုဿာနံ ပရိတ္တံ လဟုကံ ဗဟုဒုက္ခံ ဗဟုပါယာသံ မန္တာယံ ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏ’’’န္တိ.

‘‘ဧတရဟိ တံ၊ ဘိက္ခဝေ၊ သမ္မာ ဝဒမာနော ဝဒေယျ – ‘အပ္ပကံ ဇီဝိတံ မနုဿာနံ ပရိတ္တံ လဟုကံ ဗဟုဒုက္ခံ ဗဟုပါယာသံ မန္တာယံ ဗောဒ္ဓဗ္ဗံ၊ ကတ္တဗ္ဗံ ကုသလံ၊ စရိတဗ္ဗံ ဗြဟ္မစရိယံ၊ နတ္ထိ ဇာတဿ အမရဏ’န္တိ. ဧတရဟိ၊ ဘိက္ခဝေ၊ ယော စိရံ ဇီဝတိ သော ဝဿသတံ အပ္ပံ ဝါ ဘိယျော. ဝဿသတံ ခေါ ပန၊ ဘိက္ခဝေ၊ ဇီဝန္တော တီဏိယေဝ ဥတုသတာနိ ဇီဝတိ – ဥတုသတံ ဟေမန္တာနံ၊ ဥတုသတံ ဂိမှာနံ၊ ဥတုသတံ ဝဿာနံ. တီဏိ ခေါ ပန၊ ဘိက္ခဝေ၊ ဥတုသတာနိ ဇီဝန္တော ဒွါဒသ [ဒွါဒသံ (သီ. က.)] ယေဝ မာသသတာနိ ဇီဝတိ – စတ္တာရိ မာသသတာနိ ဟေမန္တာနံ၊ စတ္တာရိ မာသသတာနိ ဂိမှာနံ၊ စတ္တာရိ မာသသတာနိ ဝဿာနံ. ဒွါဒသ ခေါ ပန၊ ဘိက္ခဝေ၊ မာသသတာနိ ဇီဝန္တော စတုဝီသတိယေဝ အဒ္ဓမာသသတာနိ ဇီဝတိ – အဋ္ဌဒ္ဓမာသသတာနိ ဟေမန္တာနံ၊ အဋ္ဌဒ္ဓမာသသတာနိ ဂိမှာနံ၊ အဋ္ဌဒ္ဓမာသသတာနိ ဝဿာနံ. စတုဝီသတိ ခေါ ပန၊ ဘိက္ခဝေ၊ အဒ္ဓမာသသတာနိ ဇီဝန္တော ဆတ္တိံသံယေဝ ရတ္တိသဟဿာနိ ဇီဝတိ – ဒွါဒသ ရတ္တိသဟဿာနိ ဟေမန္တာနံ၊ ဒွါဒသ ရတ္တိသဟဿာနိ ဂိမှာနံ၊ ဒွါဒသ ရတ္တိသဟဿာနိ ဝဿာနံ. ဆတ္တိံသံ ခေါ ပန၊ ဘိက္ခဝေ၊ ရတ္တိသဟဿာနိ ဇီဝန္တော ဒွေသတ္တတိယေဝ [ဒွေသတ္တတိညေဝ (သျာ.)၊ ဒွေသတ္တတိဉ္စေဝ (က.)] ဘတ္တသဟဿာနိ ဘုဉ္ဇတိ – စတုဝီသတိ ဘတ္တသဟဿာနိ ဟေမန္တာနံ၊ စတုဝီသတိ ဘတ္တသဟဿာနိ ဂိမှာနံ၊ စတုဝီသတိ ဘတ္တသဟဿာနိ ဝဿာနံ သဒ္ဓိံ မာတုထညာယ သဒ္ဓိံ ဘတ္တန္တရာယေန.

‘‘တတြိမေ ဘတ္တန္တရာယာ ကပိမိဒ္ဓေါပိ ဘတ္တံ န ဘုဉ္ဇတိ၊ ဒုက္ခိတောပိ ဘတ္တံ န ဘုဉ္ဇတိ၊ ဗျာဓိတောပိ ဘတ္တံ န ဘုဉ္ဇတိ၊ ဥပေါသထိကောပိ ဘတ္တံ န ဘုဉ္ဇတိ၊ အလာဘကေနပိ ဘတ္တံ န ဘုဉ္ဇတိ. ဣတိ ခေါ၊ ဘိက္ခဝေ၊ မယာ ဝဿသတာယုကဿ မနုဿဿ အာယုပိ သင်္ခါတော [သင်္ခါတံ (?)]၊ အာယုပ္ပမာဏမ္ပိ သင်္ခါတံ၊ ဥတူပိ သင်္ခါတာ၊ သံဝစ္ဆရာပိ သင်္ခါတာ၊ မာသာပိ သင်္ခါတာ၊ အဒ္ဓမာသာပိ သင်္ခါတာ၊ ရတ္တိပိ သင်္ခါတာ၊ ဒိဝါပိ သင်္ခါတာ၊ ဘတ္တာပိ သင်္ခါတာ၊ ဘတ္တန္တရာယာပိ သင်္ခါတာ. ယံ၊ ဘိက္ခဝေ၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ၊ ကတံ ဝေါ တံ မယာ ဧတာနိ၊ ဘိက္ခဝေ၊ ရုက္ခမူလာနိ ဧတာနိ သုညာဂါရာနိ. ဈာယထ၊ ဘိက္ခဝေ၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. ဒသမံ.

မဟာဝဂ္ဂေါ သတ္တမော.