၃. တိဿဗြဟ္မာသုတ္တံ

၅၆. ဧဝံ မေ သုတံ – ဧကံ သမယံ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. အထ ခေါ ဒွေ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဂိဇ္ဈကူဋံ ဩဘာသေတွာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌံသု. ဧကမန္တံ ဌိတာ ခေါ ဧကာ ဒေဝတာ ဘဂဝန္တံ ဧတဒဝေါစ – ‘‘ဧတာ၊ ဘန္တေ၊ ဘိက္ခုနိယော ဝိမုတ္တာ’’တိ. အပရာ ဒေဝတာ ဘဂဝန္တံ ဧတဒဝေါစ – ‘‘ဧတာ၊ ဘန္တေ၊ ဘိက္ခုနိယော အနုပါဒိသေသာ သုဝိမုတ္တာ’’တိ. ဣဒမဝေါစုံ တာ ဒေဝတာ. သမနုညော သတ္ထာ အဟောသိ. အထ ခေါ တာ ဒေဝတာ ‘‘သမနုညော သတ္ထာ’’တိ ဘဂဝန္တံ အဘိဝါဒေတွာ ပဒက္ခိဏံ ကတွာ တတ္ထေဝန္တရဓာယိံသု.

အထ ခေါ ဘဂဝါ တဿာ ရတ္တိယာ အစ္စယေန ဘိက္ခူ အာမန္တေသိ – ‘‘ဣမံ၊ ဘိက္ခဝေ၊ ရတ္တိံ ဒွေ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဂိဇ္ဈကူဋံ ဩဘာသေတွာ ယေနာဟံ တေနုပသင်္ကမိံသု၊ ဥပသင်္ကမိတွာ မံ အဘိဝါဒေတွာ ဧကမန္တံ အဋ္ဌံသု. ဧကမန္တံ ဌိတာ ခေါ၊ ဘိက္ခဝေ၊ ဧကာ ဒေဝတာ မံ ဧတဒဝေါစ – ‘ဧတာ၊ ဘန္တေ၊ ဘိက္ခုနိယော ဝိမုတ္တာ’တိ. အပရာ ဒေဝတာ မံ ဧတဒဝေါစ – ‘ဧတာ၊ ဘန္တေ၊ ဘိက္ခုနိယော အနုပါဒိသေသာ သုဝိမုတ္တာ’တိ. ဣဒမဝေါစုံ၊ ဘိက္ခဝေ၊ တာ ဒေဝတာ. ဣဒံ ဝတွာ မံ အဘိဝါဒေတွာ ပဒက္ခိဏံ ကတွာ တတ္ထေဝန္တရဓာယိံသူ’’တိ.

တေန ခေါ ပန သမယေန အာယသ္မာ မဟာမောဂ္ဂလ္လာနော ဘဂဝတော အဝိဒူရေ နိသိန္နော ဟောတိ. အထ ခေါ အာယသ္မတော မဟာမောဂ္ဂလ္လာနဿ ဧတဒဟောသိ – ‘‘ကတမေသာနံ ခေါ ဒေဝါနံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ? တေန ခေါ ပန သမယေန တိဿော နာမ ဘိက္ခု အဓုနာကာလင်္ကတော အညတရံ ဗြဟ္မလောကံ ဥပပန္နော ဟောတိ. တတြာပိ နံ ဧဝံ ဇာနန္တိ – ‘‘တိဿော ဗြဟ္မာ မဟိဒ္ဓိကော မဟာနုဘာဝေါ’’တိ.

အထ ခေါ အာယသ္မာ မဟာမောဂ္ဂလ္လာနော – သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝံ – ဂိဇ္ဈကူဋေ ပဗ္ဗတေ အန္တရဟိတော တသ္မိံ ဗြဟ္မလောကေ ပါတုရဟောသိ. အဒ္ဒသာ ခေါ တိဿော ဗြဟ္မာ အာယသ္မန္တံ မဟာမောဂ္ဂလ္လာနံ ဒူရတောဝ အာဂစ္ဆန္တံ. ဒိသွာ အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ဧဟိ ခေါ၊ မာရိသ မောဂ္ဂလ္လာန၊ သွာဂတံ၊ မာရိသ မောဂ္ဂလ္လာန! စိရဿံ ခေါ၊ မာရိသ မောဂ္ဂလ္လာန၊ ဣမံ ပရိယာယမကာသိ၊ ယဒိဒံ ဣဓာဂမနာယ. နိသီဒ၊ မာရိသ မောဂ္ဂလ္လာန၊ ဣဒမာသနံ ပညတ္တ’’န္တိ. နိသီဒိ ခေါ အာယသ္မာ မဟာမောဂ္ဂလ္လာနော ပညတ္တေ အာသနေ. တိဿောပိ ခေါ ဗြဟ္မာ အာယသ္မန္တံ မဟာမောဂ္ဂလ္လာနံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ တိဿံ ဗြဟ္မာနံ အာယသ္မာ မဟာမောဂ္ဂလ္လာနော ဧတဒဝေါစ – ‘‘ကတမေသာနံ ခေါ၊ တိဿ၊ ဒေဝါနံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ? ‘‘ဗြဟ္မကာယိကာနံ ခေါ၊ မာရိသ မောဂ္ဂလ္လာန၊ ဒေဝါနံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘သဗ္ဗေသညေဝ ခေါ၊ တိဿ၊ ဗြဟ္မကာယိကာနံ ဒေဝါနံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ? ‘‘န ခေါ၊ မာရိသ မောဂ္ဂလ္လာန၊ သဗ္ဗေသံ ဗြဟ္မကာယိကာနံ ဒေဝါနံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘ယေ ခေါ တေ၊ မာရိသ မောဂ္ဂလ္လာန၊ ဗြဟ္မကာယိကာ ဒေဝါ ဗြဟ္မေန အာယုနာ သန္တုဋ္ဌာ ဗြဟ္မေန ဝဏ္ဏေန ဗြဟ္မေန သုခေန ဗြဟ္မေန ယသေန ဗြဟ္မေန အာဓိပတေယျေန သန္တုဋ္ဌာ၊ တေ ဥတ္တရိ နိဿရဏံ ယထာဘူတံ နပ္ပဇာနန္တိ. တေသံ န ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’တိ. ယေ စ ခေါ တေ၊ မာရိသ မောဂ္ဂလ္လာန၊ ဗြဟ္မကာယိကာ ဒေဝါ ဗြဟ္မေန အာယုနာ အသန္တုဋ္ဌာ၊ ဗြဟ္မေန ဝဏ္ဏေန ဗြဟ္မေန သုခေန ဗြဟ္မေန ယသေန ဗြဟ္မေန အာဓိပတေယျေန အသန္တုဋ္ဌာ၊ တေ စ ဥတ္တရိ နိဿရဏံ ယထာဘူတံ ပဇာနန္တိ. တေသံ ဧဝံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘ဣဓ၊ မာရိသ မောဂ္ဂလ္လာန၊ ဘိက္ခု ဥဘတောဘာဂဝိမုတ္တော ဟောတိ. တမေနံ တေ ဒေဝါ ဧဝံ ဇာနန္တိ – ‘အယံ ခေါ အာယသ္မာ ဥဘတောဘာဂဝိမုတ္တော. ယာဝဿ ကာယော ဌဿတိ တာဝ နံ ဒက္ခန္တိ ဒေဝမနုဿာ. ကာယဿ ဘေဒါ န နံ ဒက္ခန္တိ ဒေဝမနုဿာ’တိ. ဧဝမ္ပိ ခေါ၊ မာရိသ မောဂ္ဂလ္လာန၊ တေသံ ဒေဝါနံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘ဣဓ ပန၊ မာရိသ မောဂ္ဂလ္လာန၊ ဘိက္ခု ပညာဝိမုတ္တော ဟောတိ. တမေနံ တေ ဒေဝါ ဧဝံ ဇာနန္တိ – ‘အယံ ခေါ အာယသ္မာ ပညာဝိမုတ္တော. ယာဝဿ ကာယော ဌဿတိ တာဝ နံ ဒက္ခန္တိ ဒေဝမနုဿာ. ကာယဿ ဘေဒါ န နံ ဒက္ခန္တိ ဒေဝမနုဿာ’တိ. ဧဝမ္ပိ ခေါ၊ မာရိသ မောဂ္ဂလ္လာန၊ တေသံ ဒေဝါနံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘ဣဓ ပန၊ မာရိသ မောဂ္ဂလ္လာန၊ ဘိက္ခု ကာယသက္ခီ ဟောတိ. တမေနံ ဒေဝါ ဧဝံ ဇာနန္တိ – ‘အယံ ခေါ အာယသ္မာ ကာယသက္ခီ. အပ္ပေဝ နာမ အယမာယသ္မာ အနုလောမိကာနိ သေနာသနာနိ ပဋိသေဝမာနော ကလျာဏမိတ္တေ ဘဇမာနော ဣန္ဒြိယာနိ သမန္နာနယမာနော – ယဿတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ တဒနုတ္တရံ – ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရေယျာ’တိ. ဧဝမ္ပိ ခေါ၊ မာရိသ မောဂ္ဂလ္လာန၊ တေသံ ဒေဝါနံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

‘‘ဣဓ ပန၊ မာရိသ မောဂ္ဂလ္လာန၊ ဘိက္ခု ဒိဋ္ဌိပ္ပတ္တော ဟောတိ။ပေ။ သဒ္ဓါဝိမုတ္တော ဟောတိ။ပေ။ ဓမ္မာနုသာရီ ဟောတိ. တမေနံ တေ ဒေဝါ ဧဝံ ဇာနန္တိ – ‘အယံ ခေါ အာယသ္မာ ဓမ္မာနုသာရီ. အပ္ပေဝ နာမ အယမာယသ္မာ အနုလောမိကာနိ သေနာသနာနိ ပဋိသေဝမာနော ကလျာဏမိတ္တေ ဘဇမာနော ဣန္ဒြိယာနိ သမန္နာနယမာနော – ယဿတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ တဒနုတ္တရံ – ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရေယျာ’တိ. ဧဝမ္ပိ ခေါ၊ မာရိသ မောဂ္ဂလ္လာန၊ တေသံ ဒေဝါနံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ.

အထ ခေါ အာယသ္မာ မဟာမောဂ္ဂလ္လာနော တိဿဿ ဗြဟ္မုနော ဘာသိတံ အဘိနန္ဒိတွာ အနုမောဒိတွာ – သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝံ – ဗြဟ္မလောကေ အန္တရဟိတော ဂိဇ္ဈကူဋေ ပဗ္ဗတေ ပါတုရဟောသိ. အထ ခေါ အာယသ္မာ မဟာမောဂ္ဂလ္လာနော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ မဟာမောဂ္ဂလ္လာနော ယာဝတကော အဟောသိ တိဿေန ဗြဟ္မုနာ သဒ္ဓိံ ကထာသလ္လာပေါ တံ သဗ္ဗံ ဘဂဝတော အာရောစေသိ.

‘‘န ဟိ ပန တေ၊ မောဂ္ဂလ္လာန၊ တိဿော ဗြဟ္မာ သတ္တမံ အနိမိတ္တဝိဟာရိံ ပုဂ္ဂလံ ဒေသေတိ’’. ‘‘ဧတဿ၊ ဘဂဝါ၊ ကာလော၊ ဧတဿ၊ သုဂတ၊ ကာလော! ယံ ဘဂဝါ သတ္တမံ အနိမိတ္တဝိဟာရိံ ပုဂ္ဂလံ ဒေသေယျ. ဘဂဝတော သုတွာ ဘိက္ခူ ဓာရေဿန္တီ’’တိ. ‘‘တေန ဟိ၊ မောဂ္ဂလ္လာန၊ သုဏာဟိ၊ သာဓုကံ မနသိ ကရောဟိ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ အာယသ္မာ မဟာမောဂ္ဂလ္လာနော ဘဂဝတော ပစ္စဿောသိ. ဘဂဝါ ဧတဒဝေါစ –

‘‘ဣဓ၊ မောဂ္ဂလ္လာန၊ ဘိက္ခု သဗ္ဗနိမိတ္တာနံ အမနသိကာရာ အနိမိတ္တံ စေတောသမာဓိံ ဥပသမ္ပဇ္ဇ ဝိဟရတိ. တမေနံ တေ ဒေဝါ ဧဝံ ဇာနန္တိ – ‘အယံ ခေါ အာယသ္မာ သဗ္ဗနိမိတ္တာနံ အမနသိကာရာ အနိမိတ္တံ စေတောသမာဓိံ ဥပသမ္ပဇ္ဇ ဝိဟရတိ. အပ္ပေဝ နာမ အယမာယသ္မာ အနုလောမိကာနိ သေနာသနာနိ ပဋိသေဝမာနော ကလျာဏမိတ္တေ ဘဇမာနော ဣန္ဒြိယာနိ သမန္နာနယမာနော – ယဿတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ တဒနုတ္တရံ – ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရေယျာ’တိ. ဧဝံ ခေါ၊ မောဂ္ဂလ္လာန၊ တေသံ ဒေဝါနံ ဉာဏံ ဟောတိ – ‘သဥပါဒိသေသေ ဝါ သဥပါဒိသေသောတိ၊ အနုပါဒိသေသေ ဝါ အနုပါဒိသေသော’’’တိ. တတိယံ.