၈. သံယောဂသုတ္တံ

၅၁. ‘‘သံယောဂဝိသံယောဂံ ဝေါ၊ ဘိက္ခဝေ၊ ဓမ္မပရိယာယံ ဒေသေဿာမိ. တံ သုဏာထ။ပေ။ ကတမော စ သော၊ ဘိက္ခဝေ၊ သံယောဂေါ ဝိသံယောဂေါ ဓမ္မပရိယာယော?

‘‘ဣတ္ထီ၊ ဘိက္ခဝေ၊ အဇ္ဈတ္တံ ဣတ္ထိန္ဒြိယံ မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိဿရံ ဣတ္ထာလင်္ကာရံ. သာ တတ္ထ ရဇ္ဇတိ တတြာဘိရမတိ. သာ တတ္ထ ရတ္တာ တတြာဘိရတာ ဗဟိဒ္ဓါ ပုရိသိန္ဒြိယံ မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသဿရံ ပုရိသာလင်္ကာရံ. သာ တတ္ထ ရဇ္ဇတိ တတြာဘိရမတိ. သာ တတ္ထ ရတ္တာ တတြာဘိရတာ ဗဟိဒ္ဓါ သံယောဂံ အာကင်္ခတိ. ယဉ္စဿာ သံယောဂပစ္စယာ ဥပ္ပဇ္ဇတိ သုခံ သောမနဿံ တဉ္စ အာကင်္ခတိ. ဣတ္ထတ္တေ၊ ဘိက္ခဝေ၊ အဘိရတာ သတ္တာ ပုရိသေသု သံယောဂံ ဂတာ. ဧဝံ ခေါ၊ ဘိက္ခဝေ၊ ဣတ္ထီ ဣတ္ထတ္တံ နာတိဝတ္တတိ.

‘‘ပုရိသော၊ ဘိက္ခဝေ၊ အဇ္ဈတ္တံ ပုရိသိန္ဒြိယံ မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသဿရံ ပုရိသာလင်္ကာရံ. သော တတ္ထ ရဇ္ဇတိ တတြာဘိရမတိ. သော တတ္ထ ရတ္တော တတြာဘိရတော ဗဟိဒ္ဓါ ဣတ္ထိန္ဒြိယံ မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိဿရံ ဣတ္ထာလင်္ကာရံ. သော တတ္ထ ရဇ္ဇတိ တတြာဘိရမတိ. သော တတ္ထ ရတ္တော တတြာဘိရတော ဗဟိဒ္ဓါ သံယောဂံ အာကင်္ခတိ. ယဉ္စဿ သံယောဂပစ္စယာ ဥပ္ပဇ္ဇတိ သုခံ သောမနဿံ တဉ္စ အာကင်္ခတိ. ပုရိသတ္တေ၊ ဘိက္ခဝေ၊ အဘိရတာ သတ္တာ ဣတ္ထီသု သံယောဂံ ဂတာ. ဧဝံ ခေါ၊ ဘိက္ခဝေ၊ ပုရိသော ပုရိသတ္တံ နာတိဝတ္တတိ. ဧဝံ ခေါ၊ ဘိက္ခဝေ၊ သံယောဂေါ ဟောတိ.

‘‘ကထဉ္စ၊ ဘိက္ခဝေ၊ ဝိသံယောဂေါ ဟောတိ? ဣတ္ထီ၊ ဘိက္ခဝေ၊ အဇ္ဈတ္တံ ဣတ္ထိန္ဒြိယံ န မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိဿရံ ဣတ္ထာလင်္ကာရံ. သာ တတ္ထ န ရဇ္ဇတိ၊ သာ တတြ နာဘိရမတိ. သာ တတ္ထ အရတ္တာ တတြ အနဘိရတာ ဗဟိဒ္ဓါ ပုရိသိန္ဒြိယံ န မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသဿရံ ပုရိသာလင်္ကာရံ. သာ တတ္ထ န ရဇ္ဇတိ၊ တတြ နာဘိရမတိ. သာ တတ္ထ အရတ္တာ တတြ အနဘိရတာ ဗဟိဒ္ဓါ သံယောဂံ နာကင်္ခတိ. ယဉ္စဿာ သံယောဂပစ္စယာ ဥပ္ပဇ္ဇတိ သုခံ သောမနဿံ တဉ္စ နာကင်္ခတိ. ဣတ္ထတ္တေ၊ ဘိက္ခဝေ၊ အနဘိရတာ သတ္တာ ပုရိသေသု ဝိသံယောဂံ ဂတာ. ဧဝံ ခေါ၊ ဘိက္ခဝေ၊ ဣတ္ထီ ဣတ္ထတ္တံ အတိဝတ္တတိ.

‘‘ပုရိသော၊ ဘိက္ခဝေ၊ အဇ္ဈတ္တံ ပုရိသိန္ဒြိယံ န မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသဿရံ ပုရိသာလင်္ကာရံ. သော တတ္ထ န ရဇ္ဇတိ၊ သော တတြ နာဘိရမတိ. သော တတ္ထ အရတ္တော တတြ အနဘိရတော ဗဟိဒ္ဓါ ဣတ္ထိန္ဒြိယံ န မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိဿရံ ဣတ္ထာလင်္ကာရံ. သော တတ္ထ န ရဇ္ဇတိ၊ တတြ နာဘိရမတိ. သော တတ္ထ အရတ္တော တတြ အနဘိရတော ဗဟိဒ္ဓါ သံယောဂံ နာကင်္ခတိ. ယဉ္စဿ သံယောဂပစ္စယာ ဥပ္ပဇ္ဇတိ သုခံ သောမနဿံ တဉ္စ နာကင်္ခတိ. ပုရိသတ္တေ၊ ဘိက္ခဝေ၊ အနဘိရတာ သတ္တာ ဣတ္ထီသု ဝိသံယောဂံ ဂတာ. ဧဝံ ခေါ၊ ဘိက္ခဝေ၊ ပုရိသော ပုရိသတ္တံ အတိဝတ္တတိ. ဧဝံ ခေါ၊ ဘိက္ခဝေ၊ ဝိသံယောဂေါ ဟောတိ. အယံ ခေါ၊ ဘိက္ခဝေ၊ သံယောဂေါ ဝိသံယောဂေါ ဓမ္မပရိယာယော’’တိ. အဋ္ဌမံ.