၆. ဒုတိယသညာသုတ္တံ

၄၉. ‘‘သတ္တိမာ၊ ဘိက္ခဝေ၊ သညာ ဘာဝိတာ ဗဟုလီကတာ မဟပ္ဖလာ ဟောန္တိ မဟာနိသံသာ အမတောဂဓာ အမတပရိယောသာနာ. ကတမာ သတ္တ? အသုဘသညာ၊ မရဏသညာ၊ အာဟာရေ ပဋိကူလသညာ၊ သဗ္ဗလောကေ အနဘိရတသညာ၊ အနိစ္စသညာ၊ အနိစ္စေ ဒုက္ခသညာ၊ ဒုက္ခေ အနတ္တသညာ. ဣမာ ခေါ၊ ဘိက္ခဝေ၊ သတ္တ သညာ ဘာဝိတာ ဗဟုလီကတာ မဟပ္ဖလာ ဟောန္တိ မဟာနိသံသာ အမတောဂဓာ အမတပရိယောသာနာတိ.

‘‘‘အသုဘသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ. ဣတိ ခေါ ပနေတံ ဝုတ္တံ. ကိဉ္စေတံ ပဋိစ္စ ဝုတ္တံ? အသုဘသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော မေထုနဓမ္မသမာပတ္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ. သေယျထာပိ၊ ဘိက္ခဝေ၊ ကုက္ကုဋပတ္တံ ဝါ နှာရုဒဒ္ဒုလံ ဝါ အဂ္ဂိမှိ ပက္ခိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ. ဧဝမေဝံ ခေါ၊ ဘိက္ခဝေ၊ ဘိက္ခုနော အသုဘသညာပရိစိတေန စေတသာ ဗဟုလံ ဝိဟရတော မေထုနဓမ္မသမာပတ္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ.

‘‘သစေ၊ ဘိက္ခဝေ၊ ဘိက္ခုနော အသုဘသညာပရိစိတေန စေတသာ ဗဟုလံ ဝိဟရတော မေထုနဓမ္မသမာပတ္တိယာ စိတ္တံ အနုသန္ဒဟတိ [အနုသဏ္ဌာတိ (သီ.)] အပ္ပဋိကုလျတာ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ အသုဘသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော အသုဘသညာပရိစိတေန စေတသာ ဗဟုလံ ဝိဟရတော မေထုနဓမ္မသမာပတ္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ အသုဘသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘အသုဘသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘မရဏသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ ကိဉ္စေတံ ပဋိစ္စ ဝုတ္တံ? မရဏသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော ဇီဝိတနိကန္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ. သေယျထာပိ၊ ဘိက္ခဝေ၊ ကုက္ကုဋပတ္တံ ဝါ နှာရုဒဒ္ဒုလံ ဝါ အဂ္ဂိမှိ ပက္ခိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ. ဧဝမေဝံ ခေါ၊ ဘိက္ခဝေ၊ ဘိက္ခုနော မရဏသညာပရိစိတေန စေတသာ ဗဟုလံ ဝိဟရတော ဇီဝိတနိကန္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ.

‘‘သစေ၊ ဘိက္ခဝေ၊ ဘိက္ခုနော မရဏသညာပရိစိတေန စေတသာ ဗဟုလံ ဝိဟရတော ဇီဝိတနိကန္တိယာ စိတ္တံ အနုသန္ဒဟတိ အပ္ပဋိကုလျတာ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ မရဏသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော မရဏသညာပရိစိတေန စေတသာ ဗဟုလံ ဝိဟရတော ဇီဝိတနိကန္တိယာ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ မရဏသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘မရဏသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘အာဟာရေ ပဋိကူလသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ၊ ကိဉ္စေတံ ပဋိစ္စ ဝုတ္တံ? အာဟာရေ ပဋိကူလသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော ရသတဏှာယ စိတ္တံ ပတိလီယတိ ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ. သေယျထာပိ၊ ဘိက္ခဝေ၊ ကုက္ကုဋပတ္တံ ဝါ နှာရုဒဒ္ဒုလံ ဝါ အဂ္ဂိမှိ ပက္ခိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ. ဧဝမေဝံ ခေါ၊ ဘိက္ခဝေ၊ ဘိက္ခုနော အာဟာရေ ပဋိကူလသညာပရိစိတေန စေတသာ ဗဟုလံ ဝိဟရတော ရသတဏှာယ စိတ္တံ ပတိလီယတိ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ.

‘‘သစေ၊ ဘိက္ခဝေ၊ ဘိက္ခုနော အာဟာရေ ပဋိကူလသညာပရိစိတေန စေတသာ ဗဟုလံ ဝိဟရတော ရသတဏှာယ စိတ္တံ အနုသန္ဒဟတိ အပ္ပဋိကုလျတာ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ အာဟာရေ ပဋိကူလသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော အာဟာရေ ပဋိကူလသညာပရိစိတေန စေတသာ ဗဟုလံ ဝိဟရတော ရသတဏှာယ စိတ္တံ ပတိလီယတိ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ အာဟာရေ ပဋိကူလသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘အာဟာရေ ပဋိကူလသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘သဗ္ဗလောကေ အနဘိရတသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ. ကိဉ္စေတံ ပဋိစ္စ ဝုတ္တံ? သဗ္ဗလောကေ အနဘိရတသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော လောကစိတြေသု စိတ္တံ ပတိလီယတိ။ပေ။ သေယျထာပိ ဘိက္ခဝေ။ပေ။ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ. ဧဝမေဝံ ခေါ၊ ဘိက္ခဝေ၊ ဘိက္ခုနော သဗ္ဗလောကေ အနဘိရတသညာပရိစိတေန စေတသာ ဗဟုလံ ဝိဟရတော လောကစိတြေသု စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ.

‘‘သစေ၊ ဘိက္ခဝေ၊ ဘိက္ခုနော သဗ္ဗလောကေ အနဘိရတသညာပရိစိတေန စေတသာ ဗဟုလံ ဝိဟရတော လောကစိတြေသု စိတ္တံ အနုသန္ဒဟတိ အပ္ပဋိကုလျတာ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ သဗ္ဗလောကေ အနဘိရတသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော သဗ္ဗလောကေ အနဘိရတသညာပရိစိတေန စေတသာ ဗဟုလံ ဝိဟရတော လောကစိတြေသု စိတ္တံ ပတိလီယတိ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ သဗ္ဗလောကေ အနဘိရတသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘သဗ္ဗလောကေ အနဘိရတသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘အနိစ္စသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ. ကိဉ္စေတံ ပဋိစ္စ ဝုတ္တံ? အနိစ္စသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော လာဘသက္ကာရသိလောကေ စိတ္တံ ပတိလီယတိ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ. သေယျထာပိ၊ ဘိက္ခဝေ၊ ကုက္ကုဋပတ္တံ ဝါ နှာရုဒဒ္ဒုလံ ဝါ အဂ္ဂိမှိ ပက္ခိတ္တံ ပတိလီယတိ ပတိကုဋတိ ပတိဝတ္တတိ န သမ္ပသာရိယတိ. ဧဝမေဝံ ခေါ၊ ဘိက္ခဝေ၊ ဘိက္ခုနော အနိစ္စသညာပရိစိတေန စေတသာ ဗဟုလံ ဝိဟရတော လာဘသက္ကာရသိလောကေ စိတ္တံ ပတိလီယတိ။ပေ။ ဥပေက္ခာ ဝါ ပါဋိကုလျတာ ဝါ သဏ္ဌာတိ.

‘‘သစေ၊ ဘိက္ခဝေ၊ ဘိက္ခုနော အနိစ္စသညာပရိစိတေန စေတသာ ဗဟုလံ ဝိဟရတော လာဘသက္ကာရသိလောကေ စိတ္တံ အနုသန္ဒဟတိ အပ္ပဋိကုလျတာ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ အနိစ္စသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော အနိစ္စသညာပရိစိတေန စေတသာ ဗဟုလံ ဝိဟရတော လာဘသက္ကာရသိလောကေ စိတ္တံ ပတိလီယတိ ပတိကုဋတိ ပတိဝတ္တတိ၊ န သမ္ပသာရိယတိ ဥပေက္ခာ ဝါ ပါဋိကုလျတာ ဝါ သဏ္ဌာတိ၊ ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ အနိစ္စသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘အနိစ္စသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘အနိစ္စေ ဒုက္ခသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ. ကိဉ္စေတံ ပဋိစ္စ ဝုတ္တံ? အနိစ္စေ ဒုက္ခသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော အာလသျေ ကောသဇ္ဇေ ဝိဿဋ္ဌိယေ ပမာဒေ အနနုယောဂေ အပစ္စဝေက္ခဏာယ တိဗ္ဗာ ဘယသညာ ပစ္စုပဋ္ဌိတာ ဟောတိ၊ သေယျထာပိ၊ ဘိက္ခဝေ၊ ဥက္ခိတ္တာသိကေ ဝဓကေ.

‘‘သစေ၊ ဘိက္ခဝေ၊ ဘိက္ခုနော အနိစ္စေ ဒုက္ခသညာပရိစိတေန စေတသာ ဗဟုလံ ဝိဟရတော အာလသျေ ကောသဇ္ဇေ ဝိဿဋ္ဌိယေ ပမာဒေ အနနုယောဂေ အပစ္စဝေက္ခဏာယ တိဗ္ဗာ ဘယသညာ၊ န ပစ္စုပဋ္ဌိတာ ဟောတိ၊ သေယျထာပိ၊ ဘိက္ခဝေ၊ ဥက္ခိတ္တာသိကေ ဝဓကေ. ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ အနိစ္စေ ဒုက္ခသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. သစေ ပန၊ ဘိက္ခဝေ၊ ဘိက္ခုနော အနိစ္စေ ဒုက္ခသညာပရိစိတေန စေတသာ ဗဟုလံ ဝိဟရတော အာလသျေ ကောသဇ္ဇေ ဝိဿဋ္ဌိယေ ပမာဒေ အနနုယောဂေ အပစ္စဝေက္ခဏာယ တိဗ္ဗာ ဘယသညာ ပစ္စုပဋ္ဌိတာ ဟောတိ၊ သေယျထာပိ၊ ဘိက္ခဝေ၊ ဥက္ခိတ္တာသိကေ ဝဓကေ. ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ အနိစ္စေ ဒုက္ခသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘အနိစ္စေ ဒုက္ခသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘‘ဒုက္ခေ အနတ္တသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ခေါ ပနေတံ ဝုတ္တံ. ကိဉ္စေတံ ပဋိစ္စ ဝုတ္တံ? ဒုက္ခေ အနတ္တသညာပရိစိတေန၊ ဘိက္ခဝေ၊ ဘိက္ခုနော စေတသာ ဗဟုလံ ဝိဟရတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာပဂတံ မာနသံ ဟောတိ ဝိဓာသမတိက္ကန္တံ သန္တံ သုဝိမုတ္တံ.

‘‘သစေ၊ ဘိက္ခဝေ၊ ဘိက္ခုနော ဒုက္ခေ အနတ္တသညာပရိစိတေန စေတသာ ဗဟုလံ ဝိဟရတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု န အဟင်္ကာရမမင်္ကာရမာနာပဂတံ မာနသံ ဟောတိ ဝိဓာသမတိက္ကန္တံ သန္တံ သုဝိမုတ္တံ. ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘အဘာဝိတာ မေ ဒုက္ခေ အနတ္တသညာ၊ နတ္ထိ မေ ပုဗ္ဗေနာပရံ ဝိသေသော၊ အပ္ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ.

‘‘သစေ ပန၊ ဘိက္ခဝေ၊ ဘိက္ခုနော ဒုက္ခေ အနတ္တသညာပရိစိတေန စေတသာ ဗဟုလံ ဝိဟရတော ဣမသ္မိဉ္စ သဝိညာဏကေ ကာယေ ဗဟိဒ္ဓါ စ သဗ္ဗနိမိတ္တေသု အဟင်္ကာရမမင်္ကာရမာနာပဂတံ မာနသံ ဟောတိ ဝိဓာသမတိက္ကန္တံ သန္တံ သုဝိမုတ္တံ. ဝေဒိတဗ္ဗမေတံ၊ ဘိက္ခဝေ၊ ဘိက္ခုနာ ‘သုဘာဝိတာ မေ ဒုက္ခေ အနတ္တသညာ၊ အတ္ထိ မေ ပုဗ္ဗေနာပရံ ဝိသေသော၊ ပတ္တံ မေ ဘာဝနာဗလ’န္တိ. ဣတိဟ တတ္ထ သမ္ပဇာနော ဟောတိ. ‘ဒုက္ခေ အနတ္တသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ အမတောဂဓာ အမတပရိယောသာနာ’တိ၊ ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ.

‘‘ဣမာ ခေါ၊ ဘိက္ခဝေ၊ သတ္တ သညာ ဘာဝိတာ ဗဟုလီကတာ မဟပ္ဖလာ ဟောန္တိ မဟာနိသံသာ အမတောဂဓာ အမတပရိယောသာနာ’’တိ. ဆဋ္ဌံ.