၉. ပဌမဝသသုတ္တံ

၄၀. ‘‘သတ္တဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု စိတ္တံ ဝသေ [ဝသံ (က.)] ဝတ္တေတိ၊ နော စ ဘိက္ခု စိတ္တဿ ဝသေန ဝတ္တတိ. ကတမေဟိ သတ္တဟိ? ဣဓ၊ ဘိက္ခဝေ၊ ဘိက္ခု သမာဓိကုသလော ဟောတိ၊ သမာဓိဿ သမာပတ္တိကုသလော ဟောတိ၊ သမာဓိဿ ဌိတိကုသလော ဟောတိ၊ သမာဓိဿ ဝုဋ္ဌာနကုသလော ဟောတိ၊ သမာဓိဿ ကလျာဏကုသလော ဟောတိ၊ သမာဓိဿ ဂေါစရကုသလော ဟောတိ၊ သမာဓိဿ အဘိနီဟာရကုသလော ဟောတိ. ဣမေဟိ ခေါ၊ ဘိက္ခဝေ၊ သတ္တဟိ ဓမ္မေဟိ သမန္နာဂတော ဘိက္ခု စိတ္တံ ဝသေ ဝတ္တေတိ၊ နော စ ဘိက္ခု စိတ္တဿ ဝသေန ဝတ္တတီ’’တိ. နဝမံ.