၅. ပဌမမိတ္တသုတ္တံ

၃၆. ‘‘သတ္တဟိ၊ ဘိက္ခဝေ၊ အင်္ဂေဟိ သမန္နာဂတော မိတ္တော သေဝိတဗ္ဗော. ကတမေဟိ သတ္တဟိ? ဒုဒ္ဒဒံ ဒဒါတိ၊ ဒုက္ကရံ ကရောတိ၊ ဒုက္ခမံ ခမတိ၊ ဂုယှမဿ [ဂုယှဿ (က.)] အာဝိ ကရောတိ၊ ဂုယှမဿ [ဂုယှံ အဿ (သီ.)၊ ဂုယှဿ (က.)] ပရိဂုဟတိ [ပရိဂူဟတိ (သီ. သျာ.)၊ ပရိဂုယှတိ (က.)]၊ အာပဒါသု န ဇဟတိ၊ ခီဏေန [ခီဏေ (က.)] နာတိမညတိ. ဣမေဟိ ခေါ၊ ဘိက္ခဝေ၊ သတ္တဟိ အင်္ဂေဟိ သမန္နာဂတော မိတ္တော သေဝိတဗ္ဗော’’တိ.

‘‘ဒုဒ္ဒဒံ ဒဒါတိ မိတ္တော၊ ဒုက္ကရဉ္စာပိ ကုဗ္ဗတိ၊

အထောပိဿ ဒုရုတ္တာနိ၊ ခမတိ ဒုက္ခမာနိ စ [ဒုက္ခမာနိပိ (သီ. သျာ.)].

‘‘ဂုယှဉ္စ တဿ [ဂုယှမဿ စ (သျာ.)] အက္ခာတိ၊ ဂုယှဿ ပရိဂူဟတိ၊

အာပဒါသု န ဇဟာတိ၊ ခီဏေန နာတိမညတိ.

‘‘ယမှိ ဧတာနိ ဌာနာနိ၊ သံဝိဇ္ဇန္တီဓ [သံဝိဇ္ဇန္တိ စ (က.)] ပုဂ္ဂလေ၊

သော မိတ္တော မိတ္တကာမေန၊ ဘဇိတဗ္ဗော တထာဝိဓော’’တိ. ပဉ္စမံ၊