၃. ပဌမသောဝစဿတာသုတ္တံ

၃၄. ‘‘ဣမံ၊ ဘိက္ခဝေ၊ ရတ္တိံ အညတရာ ဒေဝတာ။ပေ။ မံ ဧတဒဝေါစ – ‘သတ္တိမေ၊ ဘန္တေ၊ ဓမ္မာ ဘိက္ခုနော အပရိဟာနာယ သံဝတ္တန္တိ. ကတမေ သတ္တ? သတ္ထုဂါရဝတာ၊ ဓမ္မဂါရဝတာ၊ သံဃဂါရဝတာ၊ သိက္ခာဂါရဝတာ၊ သမာဓိဂါရဝတာ၊ သောဝစဿတာ၊ ကလျာဏမိတ္တတာ. ဣမေ ခေါ၊ ဘန္တေ၊ သတ္တ ဓမ္မာ ဘိက္ခုနော အပရိဟာနာယ သံဝတ္တန္တီ’တိ. ဣဒမဝေါစ၊ ဘိက္ခဝေ၊ သာ ဒေဝတာ. ဣဒံ ဝတွာ မံ အဘိဝါဒေတွာ ပဒက္ခိဏံ ကတွာ တတ္ထေဝန္တရဓာယီ’’တိ.

‘‘သတ္ထုဂရု ဓမ္မဂရု၊ သံဃေ စ တိဗ္ဗဂါရဝေါ၊

သမာဓိဂရု အာတာပီ၊ သိက္ခာယ တိဗ္ဗဂါရဝေါ.

‘‘ကလျာဏမိတ္တော သုဝစော၊ သပ္ပတိဿော သဂါရဝေါ၊

အဘဗ္ဗော ပရိဟာနာယ၊ နိဗ္ဗာနဿေဝ သန္တိကေ’’တိ. တတိယံ၊