၂. ဒုတိယအနုသယသုတ္တံ

၁၂. ‘‘သတ္တန္နံ၊ ဘိက္ခဝေ၊ အနုသယာနံ ပဟာနာယ သမုစ္ဆေဒါယ ဗြဟ္မစရိယံ ဝုဿတိ. ကတမေသံ သတ္တန္နံ? ကာမရာဂါနုသယဿ ပဟာနာယ သမုစ္ဆေဒါယ ဗြဟ္မစရိယံ ဝုဿတိ၊ ပဋိဃာနုသယဿ။ပေ။ ဒိဋ္ဌာနုသယဿ။ ဝိစိကိစ္ဆာနုသယဿ။ မာနာနုသယဿ။ ဘဝရာဂါနုသယဿ။ အဝိဇ္ဇာနုသယဿ ပဟာနာယ သမုစ္ဆေဒါယ ဗြဟ္မစရိယံ ဝုဿတိ. ဣမေသံ ခေါ၊ ဘိက္ခဝေ၊ သတ္တန္နံ အနုသယာနံ ပဟာနာယ သမုစ္ဆေဒါယ ဗြဟ္မစရိယံ ဝုဿတိ.

‘‘ယတော စ ခေါ၊ ဘိက္ခဝေ၊ ဘိက္ခုနော ကာမရာဂါနုသယော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပါဒဓမ္မော. ပဋိဃာနုသယော။ပေ။ ဒိဋ္ဌာနုသယော။ ဝိစိကိစ္ဆာနုသယော။ မာနာနုသယော။ ဘဝရာဂါနုသယော။ အဝိဇ္ဇာနုသယော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပါဒဓမ္မော. အယံ ဝုစ္စတိ၊ ဘိက္ခဝေ၊ ဘိက္ခု အစ္ဆေစ္ဆိ တဏှံ၊ ဝိဝတ္တယိ သံယောဇနံ၊ သမ္မာ မာနာဘိသမယာ အန္တမကာသိ ဒုက္ခဿာ’’တိ. ဒုတိယံ.