၉. ပဟာနသုတ္တံ

၉. ‘‘သတ္တန္နံ၊ ဘိက္ခဝေ၊ သံယောဇနာနံ ပဟာနာယ သမုစ္ဆေဒါယ ဗြဟ္မစရိယံ ဝုဿတိ. ကတမေသံ သတ္တန္နံ? အနုနယသံယောဇနဿ ပဟာနာယ သမုစ္ဆေဒါယ ဗြဟ္မစရိယံ ဝုဿတိ၊ ပဋိဃသံယောဇနဿ။ပေ။ ဒိဋ္ဌိသံယောဇနဿ။ ဝိစိကိစ္ဆာသံယောဇနဿ။ မာနသံယောဇနဿ။ ဘဝရာဂသံယောဇနဿ ။ အဝိဇ္ဇာသံယောဇနဿ ပဟာနာယ သမုစ္ဆေဒါယ ဗြဟ္မစရိယံ ဝုဿတိ. ဣမေသံ ခေါ၊ ဘိက္ခဝေ၊ သတ္တန္နံ သံယောဇနာနံ ပဟာနာယ သမုစ္ဆေဒါယ ဗြဟ္မစရိယံ ဝုဿတိ. ယတော စ ခေါ၊ ဘိက္ခဝေ၊ ဘိက္ခုနော အနုနယသံယောဇနံ ပဟီနံ ဟောတိ ဥစ္ဆိန္နမူလံ တာလာဝတ္ထုကတံ အနဘာဝံ ကတံ အာယတိံ အနုပ္ပါဒဓမ္မံ. ပဋိဃသံယောဇနံ။ပေ။ ဒိဋ္ဌိသံယောဇနံ။ ဝိစိကိစ္ဆာသံယောဇနံ။ မာနသံယောဇနံ။ ဘဝရာဂသံယောဇနံ။ အဝိဇ္ဇာသံယောဇနံ ပဟီနံ ဟောတိ ဥစ္ဆိန္နမူလံ တာလာဝတ္ထုကတံ အနဘာဝံ ကတံ အာယတိံ အနုပ္ပါဒဓမ္မံ. အယံ ဝုစ္စတိ၊ ဘိက္ခဝေ၊ ဘိက္ခု အစ္ဆေစ္ဆိ တဏှံ၊ ဝိဝတ္တယိ သံယောဇနံ၊ သမ္မာ မာနာဘိသမယာ အန္တမကာသိ ဒုက္ခဿာ’’တိ. နဝမံ.