၇. ဥဂ္ဂသုတ္တံ

၇. အထ ခေါ ဥဂ္ဂေါ ရာဇမဟာမတ္တော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဥဂ္ဂေါ ရာဇမဟာမတ္တော ဘဂဝန္တံ ဧတဒဝေါစ –

‘‘အစ္ဆရိယံ၊ ဘန္တေ၊ အဗ္ဘုတံ၊ ဘန္တေ! ယာဝ အဍ္ဎော စာယံ၊ ဘန္တေ၊ မိဂါရော ရောဟဏေယျော ယာဝ မဟဒ္ဓနော ယာဝ မဟာဘောဂေါ’’တိ. ‘‘ကီဝ အဍ္ဎော ပနုဂ္ဂ၊ မိဂါရော ရောဟဏေယျော၊ ကီဝ မဟဒ္ဓနော၊ ကီဝ မဟာဘောဂေါ’’တိ? ‘‘သတံ၊ ဘန္တေ၊ သတသဟဿာနံ [သဟဿာနံ (သီ.)၊ သဟဿာနိ (သျာ.)၊ သတသဟဿာနိ (?)] ဟိရညဿ၊ ကော ပန ဝါဒေါ ရူပိယဿာ’’တိ! ‘‘အတ္ထိ ခေါ ဧတံ၊ ဥဂ္ဂ၊ ဓနံ နေတံ ‘နတ္ထီ’တိ ဝဒါမီတိ. တဉ္စ ခေါ ဧတံ၊ ဥဂ္ဂ၊ ဓနံ သာဓာရဏံ အဂ္ဂိနာ ဥဒကေန ရာဇူဟိ စောရေဟိ အပ္ပိယေဟိ ဒါယာဒေဟိ. သတ္တ ခေါ ဣမာနိ၊ ဥဂ္ဂ၊ ဓနာနိ အသာဓာရဏာနိ အဂ္ဂိနာ ဥဒကေန ရာဇူဟိ စောရေဟိ အပ္ပိယေဟိ ဒါယာဒေဟိ. ကတမာနိ သတ္တ? သဒ္ဓါဓနံ၊ သီလဓနံ၊ ဟိရီဓနံ၊ ဩတ္တပ္ပဓနံ၊ သုတဓနံ၊ စာဂဓနံ၊ ပညာဓနံ. ဣမာနိ ခေါ၊ ဥဂ္ဂ၊ သတ္တ ဓနာနိ အသာဓာရဏာနိ အဂ္ဂိနာ ဥဒကေန ရာဇူဟိ စောရေဟိ အပ္ပိယေဟိ ဒါယာဒေဟီတိ.

‘‘သဒ္ဓါဓနံ သီလဓနံ၊ ဟိရီ ဩတ္တပ္ပိယံ ဓနံ၊

သုတဓနဉ္စ စာဂေါ စ၊ ပညာ ဝေ သတ္တမံ ဓနံ.

‘‘ယဿ ဧတေ ဓနာ အတ္ထိ၊ ဣတ္ထိယာ ပုရိသဿ ဝါ၊

သ ဝေ မဟဒ္ဓနော လောကေ၊ အဇေယျော ဒေဝမာနုသေ.

‘‘တသ္မာ သဒ္ဓဉ္စ သီလဉ္စ၊ ပသာဒံ ဓမ္မဒဿနံ၊

အနုယုဉ္ဇေထ မေဓာဝီ၊ သရံ ဗုဒ္ဓါန သာသန’’န္တိ. သတ္တမံ၊