၃. သံခိတ္တဗလသုတ္တံ

၃. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ပေ။ သတ္တိမာနိ၊ ဘိက္ခဝေ၊ ဗလာနိ. ကတမာနိ သတ္တ? သဒ္ဓါဗလံ၊ ဝီရိယဗလံ၊ ဟိရီဗလံ၊ ဩတ္တပ္ပဗလံ၊ သတိဗလံ၊ သမာဓိဗလံ၊ ပညာဗလံ. ဣမာနိ ခေါ၊ ဘိက္ခဝေ၊ သတ္တ ဗလာနီတိ.

‘‘သဒ္ဓါဗလံ ဝီရိယဉ္စ၊ ဟိရီ [ဟိရိ (သီ. ပီ. က.)] ဩတ္တပ္ပိယံ ဗလံ၊

သတိဗလံ သမာဓိ စ၊ ပညာ ဝေ သတ္တမံ ဗလံ၊

ဧတေဟိ ဗလဝါ ဘိက္ခု၊ သုခံ ဇီဝတိ ပဏ္ဍိတော၊

‘‘ယောနိသော ဝိစိနေ ဓမ္မံ၊ ပညာယတ္ထံ ဝိပဿတိ၊

ပဇ္ဇောတဿေဝ နိဗ္ဗာနံ၊ ဝိမောက္ခော ဟောတိ စေတသော’’တိ. တတိယံ၊