၁. ကာယာနုပဿီသုတ္တံ

၁၁၇. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော ကာယေ ကာယာနုပဿီ ဝိဟရိတုံ. ကတမေ ဆ? ကမ္မာရာမတံ၊ ဘဿာရာမတံ၊ နိဒ္ဒါရာမတံ၊ သင်္ဂဏိကာရာမတံ၊ ဣန္ဒြိယေသု အဂုတ္တဒွါရတံ၊ ဘောဇနေ အမတ္တညုတံ. ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော ကာယေ ကာယာနုပဿီ ဝိဟရိတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော ကာယေ ကာယာနုပဿီ ဝိဟရိတုံ. ကတမေ ဆ? ကမ္မာရာမတံ၊ ဘဿာရာမတံ၊ နိဒ္ဒါရာမတံ၊ သင်္ဂဏိကာရာမတံ၊ ဣန္ဒြိယေသု အဂုတ္တဒွါရတံ၊ ဘောဇနေ အမတ္တညုတံ – ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော ကာယေ ကာယာနုပဿီ ဝိဟရိတု’’န္တိ. ပဌမံ.