၈. ဥက္ခိတ္တာသိကသုတ္တံ

၁၀၃. ‘‘ဆ၊ ဘိက္ခဝေ၊ အာနိသံသေ သမ္ပဿမာနေန အလမေဝ ဘိက္ခုနာ သဗ္ဗသင်္ခါရေသု အနောဓိံ ကရိတွာ ဒုက္ခသညံ ဥပဋ္ဌာပေတုံ. ကတမေ ဆ? ‘သဗ္ဗသင်္ခါရေသု စ မေ နိဗ္ဗိဒသညာ ပစ္စုပဋ္ဌိတာ ဘဝိဿတိ၊ သေယျထာပိ ဥက္ခိတ္တာသိကေ ဝဓကေ. သဗ္ဗလောကာ စ မေ မနော ဝုဋ္ဌဟိဿတိ၊ နိဗ္ဗာနေ စ သန္တဒဿာဝီ ဘဝိဿာမိ၊ အနုသယာ စ မေ သမုဂ္ဃါတံ ဂစ္ဆိဿန္တိ [ဂစ္ဆန္တိ (ပီ. က.)]၊ ကိစ္စကာရီ စ ဘဝိဿာမိ၊ သတ္ထာ စ မေ ပရိစိဏ္ဏော ဘဝိဿတိ မေတ္တာဝတာယာ’တိ. ဣမေ ခေါ၊ ဘိက္ခဝေ၊ ဆ အာနိသံသေ သမ္ပဿမာနေန အလမေဝ ဘိက္ခုနာ သဗ္ဗသင်္ခါရေသု အနောဓိံ ကရိတွာ ဒုက္ခသညံ ဥပဋ္ဌာပေတု’’န္တိ. အဋ္ဌမံ.