၇. အနဝတ္ထိတသုတ္တံ

၁၀၂. ‘‘ဆ၊ ဘိက္ခဝေ၊ အာနိသံသေ သမ္ပဿမာနေန အလမေဝ ဘိက္ခုနာ သဗ္ဗသင်္ခါရေသု အနောဓိံ ကရိတွာ အနိစ္စသညံ ဥပဋ္ဌာပေတုံ. ကတမေ ဆ? ‘သဗ္ဗသင်္ခါရာ စ မေ အနဝတ္ထိတာ [အနဝဋ္ဌိတတော (သီ. သျာ. ပီ.)] ခါယိဿန္တိ၊ သဗ္ဗလောကေ စ မေ မနော နာဘိရမိဿတိ [န ရမိဿတိ (က.)]၊ သဗ္ဗလောကာ စ မေ မနော ဝုဋ္ဌဟိဿတိ၊ နိဗ္ဗာနပေါဏဉ္စ မေ မာနသံ ဘဝိဿတိ၊ သံယောဇနာ စ မေ ပဟာနံ ဂစ္ဆိဿန္တိ [ဂစ္ဆန္တိ (သျာ. ပီ. က.)]၊ ပရမေန စ သာမညေန သမန္နာဂတော ဘဝိဿာမီ’တိ. ဣမေ ခေါ၊ ဘိက္ခဝေ၊ ဆ အာနိသံသေ သမ္ပဿမာနေန အလမေဝ ဘိက္ခုနာ သဗ္ဗသင်္ခါရေသု အနောဓိံ ကရိတွာ အနိစ္စသညံ ဥပဋ္ဌာပေတု’’န္တိ. သတ္တမံ.