၁၀. ဘဝသုတ္တံ

၁၀၅. ‘‘တယောမေ၊ ဘိက္ခဝေ၊ ဘဝါ ပဟာတဗ္ဗာ၊ တီသု သိက္ခာသု သိက္ခိတဗ္ဗံ. ကတမေ တယော ဘဝါ ပဟာတဗ္ဗာ? ကာမဘဝေါ၊ ရူပဘဝေါ၊ အရူပဘဝေါ – ဣမေ တယော ဘဝါ ပဟာတဗ္ဗာ. ကတမာသု တီသု သိက္ခာသု သိက္ခိတဗ္ဗံ? အဓိသီလသိက္ခာယ၊ အဓိစိတ္တသိက္ခာယ၊ အဓိပညာသိက္ခာယ – ဣမာသု တီသု သိက္ခာသု သိက္ခိတဗ္ဗံ. ယတော ခေါ၊ ဘိက္ခဝေ၊ ဘိက္ခုနော ဣမေ တယော ဘဝါ ပဟီနာ ဟောန္တိ၊ ဣမာသု စ တီသု သိက္ခာသု သိက္ခိတသိက္ခော ဟောတိ – အယံ ဝုစ္စတိ၊ ဘိက္ခဝေ၊ ဘိက္ခု အစ္ဆေစ္ဆိ တဏှံ၊ ဝိဝတ္တယိ သံယောဇနံ၊ သမ္မာ မာနာဘိသမယာ အန္တမကာသိ ဒုက္ခဿာ’’တိ. ဒသမံ.