၁၁. တဏှာသုတ္တံ

၁၀၆. ‘‘တိဿော ဣမာ၊ ဘိက္ခဝေ၊ တဏှာ ပဟာတဗ္ဗာ၊ တယော စ မာနာ. ကတမာ တိဿော တဏှာ ပဟာတဗ္ဗာ? ကာမတဏှာ၊ ဘဝတဏှာ၊ ဝိဘဝတဏှာ – ဣမာ တိဿော တဏှာ ပဟာတဗ္ဗာ. ကတမေ တယော မာနာ ပဟာတဗ္ဗာ? မာနော၊ ဩမာနော၊ အတိမာနော – ဣမေ တယော မာနာ ပဟာတဗ္ဗာ. ယတော ခေါ၊ ဘိက္ခဝေ၊ ဘိက္ခုနော ဣမာ တိဿော တဏှာ ပဟီနာ ဟောန္တိ၊ ဣမေ စ တယော မာနာ၊ အယံ ဝုစ္စတိ၊ ဘိက္ခဝေ၊ ဘိက္ခု အစ္ဆေစ္ဆိ တဏှံ၊ ဝိဝတ္တယိ သံယောဇနံ၊ သမ္မာ မာနာဘိသမယာ အန္တမကာသိ ဒုက္ခဿာ’’တိ. ဧကာဒသမံ.

အာနိသံသဝဂ္ဂေါ ဒသမော. [ပဉ္စမော (သျာ. က.)]