၁. အနာဂါမိဖလသုတ္တံ

၆၅. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော အနာဂါမိဖလံ သစ္ဆိကာတုံ. ကတမေ ဆ? အဿဒ္ဓိယံ၊ အဟိရိကံ၊ အနောတ္တပ္ပံ၊ ကောသဇ္ဇံ၊ မုဋ္ဌဿစ္စံ၊ ဒုပ္ပညတံ – ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော အနာဂါမိဖလံ သစ္ဆိကာတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော အနာဂါမိဖလံ သစ္ဆိကာတုံ. ကတမေ ဆ? အဿဒ္ဓိယံ၊ အဟိရိကံ၊ အနောတ္တပ္ပံ၊ ကောသဇ္ဇံ၊ မုဋ္ဌဿစ္စံ၊ ဒုပ္ပညတံ – ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော အနာဂါမိဖလံ သစ္ဆိကာတု’’န္တိ. ပဌမံ.