၂. အရဟတ္တသုတ္တံ

၆၆. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော အရဟတ္တံ သစ္ဆိကာတုံ. ကတမေ ဆ? ထိနံ [ထီနံ (သီ. သျာ. ကံ. ပီ.)]၊ မိဒ္ဓံ၊ ဥဒ္ဓစ္စံ၊ ကုက္ကုစ္စံ၊ အဿဒ္ဓိယံ၊ ပမာဒံ – ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော အရဟတ္တံ သစ္ဆိကာတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော အရဟတ္တံ သစ္ဆိကာတုံ. ကတမေ ဆ? ထိနံ၊ မိဒ္ဓံ၊ ဥဒ္ဓစ္စံ၊ ကုက္ကုစ္စံ၊ အဿဒ္ဓိယံ၊ ပမာဒံ – ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော အရဟတ္တံ သစ္ဆိကာတု’’န္တိ. ဒုတိယံ.