၉. သိဝထိကသုတ္တံ

၂၄၉. ‘‘ပဉ္စိမေ၊ ဘိက္ခဝေ၊ အာဒီနဝါ သိဝထိကာယ [သီဝထိကာယ (သီ. သျာ. ကံ. ပီ.)]. ကတမေ ပဉ္စ? အသုစိ၊ ဒုဂ္ဂန္ဓာ၊ သပ္ပဋိဘယာ၊ ဝါဠာနံ အမနုဿာနံ အာဝါသော၊ ဗဟုနော ဇနဿ အာရောဒနာ – ဣမေ ခေါ၊ ဘိက္ခဝေ၊ ပဉ္စ အာဒီနဝါ သိဝထိကာယ.

‘‘ဧဝမေဝံ ခေါ၊ ဘိက္ခဝေ၊ ပဉ္စိမေ အာဒီနဝါ သိဝထိကူပမေ ပုဂ္ဂလေ. ကတမေ ပဉ္စ? ဣဓ၊ ဘိက္ခဝေ၊ ဧကစ္စော ပုဂ္ဂလော အသုစိနာ ကာယကမ္မေန သမန္နာဂတော ဟောတိ၊ အသုစိနာ ဝစီကမ္မေန သမန္နာဂတော ဟောတိ၊ အသုစိနာ မနောကမ္မေန သမန္နာဂတော ဟောတိ. ဣဒမဿ အသုစိတာယ ဝဒါမိ. သေယျထာပိ သာ၊ ဘိက္ခဝေ၊ သိဝထိကာ အသုစိ၊ တထူပမာဟံ၊ ဘိက္ခဝေ၊ ဣမံ ပုဂ္ဂလံ ဝဒါမိ.

‘‘တဿ အသုစိနာ ကာယကမ္မေန သမန္နာဂတဿ၊ အသုစိနာ ဝစီကမ္မေန သမန္နာဂတဿ၊ အသုစိနာ မနောကမ္မေန သမန္နာဂတဿ ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ. ဣဒမဿ ဒုဂ္ဂန္ဓတာယ ဝဒါမိ. သေယျထာပိ သာ၊ ဘိက္ခဝေ၊ သိဝထိကာ ဒုဂ္ဂန္ဓာ၊ တထူပမာဟံ၊ ဘိက္ခဝေ၊ ဣမံ ပုဂ္ဂလံ ဝဒါမိ.

‘‘တမေနံ အသုစိနာ ကာယကမ္မေန သမန္နာဂတံ၊ အသုစိနာ ဝစီကမ္မေန သမန္နာဂတံ၊ အသုစိနာ မနောကမ္မေန သမန္နာဂတံ ပေသလာ သဗြဟ္မစာရီ အာရကာ ပရိဝဇ္ဇန္တိ. ဣဒမဿ သပ္ပဋိဘယသ္မိံ ဝဒါမိ. သေယျထာပိ သာ၊ ဘိက္ခဝေ၊ သိဝထိကာ သပ္ပဋိဘယာ၊ တထူပမာဟံ၊ ဘိက္ခဝေ၊ ဣမံ ပုဂ္ဂလံ ဝဒါမိ.

‘‘သော အသုစိနာ ကာယကမ္မေန သမန္နာဂတော၊ အသုစိနာ ဝစီကမ္မေန သမန္နာဂတော၊ အသုစိနာ မနောကမ္မေန သမန္နာဂတော သဘာဂေဟိ ပုဂ္ဂလေဟိ သဒ္ဓိံ သံဝသတိ. ဣဒမဿ ဝါဠာဝါသသ္မိံ ဝဒါမိ. သေယျထာပိ သာ၊ ဘိက္ခဝေ၊ သိဝထိကာ ဝါဠာနံ အမနုဿာနံ အာဝါသော၊ တထူပမာဟံ၊ ဘိက္ခဝေ၊ ဣမံ ပုဂ္ဂလံ ဝဒါမိ.

‘‘တမေနံ အသုစိနာ ကာယကမ္မေန သမန္နာဂတံ၊ အသုစိနာ ဝစီကမ္မေန သမန္နာဂတံ၊ အသုစိနာ မနောကမ္မေန သမန္နာဂတံ ပေသလာ သဗြဟ္မစာရီ ဒိသွာ ခီယဓမ္မံ [ခီယနဓမ္မံ (သီ.)] အာပဇ္ဇန္တိ – ‘အဟော ဝတ နော ဒုက္ခံ ယေ မယံ ဧဝရူပေဟိ ပုဂ္ဂလေဟိ သဒ္ဓိံ သံဝသာမာ’တိ! ဣဒမဿ အာရောဒနာယ ဝဒါမိ. သေယျထာပိ သာ၊ ဘိက္ခဝေ၊ သိဝထိကာ ဗဟုနော ဇနဿ အာရောဒနာ၊ တထူပမာဟံ၊ ဘိက္ခဝေ၊ ဣမံ ပုဂ္ဂလံ ဝဒါမိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ သိဝထိကူပမေ ပုဂ္ဂလေ’’တိ. နဝမံ.