၅. ဒုတိယဒုစ္စရိတသုတ္တံ

၂၄၅. ‘‘ပဉ္စိမေ၊ ဘိက္ခဝေ၊ အာဒီနဝါ ဒုစ္စရိတေ. ကတမေ ပဉ္စ? အတ္တာပိ အတ္တာနံ ဥပဝဒတိ၊ အနုဝိစ္စ ဝိညူ ဂရဟန္တိ၊ ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ၊ သဒ္ဓမ္မာ ဝုဋ္ဌာတိ၊ အသဒ္ဓမ္မေ ပတိဋ္ဌာတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဒုစ္စရိတေ.

‘‘ပဉ္စိမေ၊ ဘိက္ခဝေ၊ အာနိသံသာ သုစရိတေ. ကတမေ ပဉ္စ? အတ္တာပိ အတ္တာနံ န ဥပဝဒတိ၊ အနုဝိစ္စ ဝိညူ ပသံသန္တိ၊ ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ၊ အသဒ္ဓမ္မာ ဝုဋ္ဌာတိ၊ သဒ္ဓမ္မေ ပတိဋ္ဌာတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ သုစရိတေ’’တိ. ပဉ္စမံ.