၉. ပဌမမစ္ဆရိယသုတ္တံ

၂၃၉. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော အာဝါသိကော ဘိက္ခု ယထာဘတံ နိက္ခိတ္တော ဧဝံ နိရယေ. ကတမေဟိ ပဉ္စဟိ? အာဝါသမစ္ဆရီ ဟောတိ၊ ကုလမစ္ဆရီ ဟောတိ၊ လာဘမစ္ဆရီ ဟောတိ၊ ဝဏ္ဏမစ္ဆရီ [ဓမ္မမစ္ဆရီ (က.)] ဟောတိ၊ သဒ္ဓါဒေယျံ ဝိနိပါတေတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော အာဝါသိကော ဘိက္ခု ယထာဘတံ နိက္ခိတ္တော ဧဝံ နိရယေ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော အာဝါသိကော ဘိက္ခု ယထာဘတံ နိက္ခိတ္တော ဧဝံ သဂ္ဂေ. ကတမေဟိ ပဉ္စဟိ? န အာဝါသမစ္ဆရီ ဟောတိ၊ န ကုလမစ္ဆရီ ဟောတိ၊ န လာဘမစ္ဆရီ ဟောတိ၊ န ဝဏ္ဏမစ္ဆရီ ဟောတိ၊ သဒ္ဓါဒေယျံ န ဝိနိပါတေတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော အာဝါသိကော ဘိက္ခု ယထာဘတံ နိက္ခိတ္တော ဧဝံ သဂ္ဂေ’’တိ. နဝမံ.