၆. ဒုတိယကုလူပကသုတ္တံ

၂၂၆. ‘‘ပဉ္စိမေ၊ ဘိက္ခဝေ၊ အာဒီနဝါ ကုလူပကဿ ဘိက္ခုနော အတိဝေလံ ကုလေသု သံသဋ္ဌဿ ဝိဟရတော. ကတမေ ပဉ္စ? မာတုဂါမဿ အဘိဏှဒဿနံ၊ ဒဿနေ သတိ သံသဂ္ဂေါ၊ သံသဂ္ဂေ သတိ ဝိဿာသော၊ ဝိဿာသေ သတိ ဩတာရော၊ ဩတိဏ္ဏစိတ္တဿေတံ ပါဋိကင်္ခံ – ‘အနဘိရတော ဝါ ဗြဟ္မစရိယံ စရိဿတိ အညတရံ ဝါ သံကိလိဋ္ဌံ အာပတ္တိံ အာပဇ္ဇိဿတိ သိက္ခံ ဝါ ပစ္စက္ခာယ ဟီနာယာဝတ္တိဿတိ’. ဣမေ ခေါ၊ ဘိက္ခဝေ၊ ပဉ္စ အာဒီနဝါ ကုလူပကဿ ဘိက္ခုနော အတိဝေလံ ကုလေသု သံသဋ္ဌဿ ဝိဟရတော’’တိ. ဆဋ္ဌံ.