၈. ဒုတိယအပါသာဒိကသုတ္တံ

၂၁၈. ‘‘ပဉ္စိမေ၊ ဘိက္ခဝေ၊ အာဒီနဝါ အပါသာဒိကေ. ကတမေ ပဉ္စ? အပ္ပသန္နာ နပ္ပသီဒန္တိ၊ ပသန္နာနဉ္စ ဧကစ္စာနံ အညထတ္တံ ဟောတိ၊ သတ္ထုသာသနံ အကတံ [န ကတံ (သျာ. ကံ. က.)] ဟောတိ၊ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇတိ၊ စိတ္တမဿ နပ္ပသီဒတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ အပါသာဒိကေ.

‘‘ပဉ္စိမေ၊ ဘိက္ခဝေ၊ အာနိသံသာ ပါသာဒိကေ. ကတမေ ပဉ္စ? အပ္ပသန္နာ ပသီဒန္တိ၊ ပသန္နာနဉ္စ ဘိယျောဘာဝေါ ဟောတိ၊ သတ္ထုသာသနံ ကတံ ဟောတိ၊ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇတိ၊ စိတ္တမဿ ပသီဒတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ ပါသာဒိကေ’’တိ. အဋ္ဌမံ.