၈. ဝါစာသုတ္တံ

၁၉၈. ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတာ ဝါစာ သုဘာသိတာ ဟောတိ၊ နော ဒုဗ္ဘာသိတာ၊ အနဝဇ္ဇာ စ အနနုဝဇ္ဇာ စ ဝိညူနံ [အနနုဝဇ္ဇာ ဝိညူနံ (သျာ. ကံ.)]. ကတမေဟိ ပဉ္စဟိ? ကာလေန စ ဘာသိတာ ဟောတိ၊ သစ္စာ စ ဘာသိတာ ဟောတိ၊ သဏှာ စ ဘာသိတာ ဟောတိ၊ အတ္ထသံဟိတာ စ ဘာသိတာ ဟောတိ၊ မေတ္တစိတ္တေန စ ဘာသိတာ ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ အင်္ဂေဟိ သမန္နာဂတာ ဝါစာ သုဘာသိတာ ဟောတိ၊ နော ဒုဗ္ဘာသိတာ၊ အနဝဇ္ဇာ စ အနနုဝဇ္ဇာ စ ဝိညူန’’န္တိ. အဋ္ဌမံ.