၉. ကုလသုတ္တံ

၁၉၉. ‘‘ယံ၊ ဘိက္ခဝေ၊ သီလဝန္တော ပဗ္ဗဇိတာ ကုလံ ဥပသင်္ကမန္တိ၊ တတ္ထ မနုဿာ ပဉ္စဟိ ဌာနေဟိ ဗဟုံ ပုညံ ပသဝန္တိ. ကတမေဟိ ပဉ္စဟိ? ယသ္မိံ၊ ဘိက္ခဝေ၊ သမယေ သီလဝန္တေ ပဗ္ဗဇိတေ ကုလံ ဥပသင်္ကမန္တေ မနုဿာ ဒိသွာ စိတ္တာနိ ပသာဒေန္တိ [ပသီဒန္တိ (သျာ. ကံ. က.)]၊ သဂ္ဂသံဝတ္တနိကံ၊ ဘိက္ခဝေ၊ တံ ကုလံ တသ္မိံ သမယေ ပဋိပဒံ ပဋိပန္နံ ဟောတိ.

‘‘ယသ္မိံ၊ ဘိက္ခဝေ၊ သမယေ သီလဝန္တေ ပဗ္ဗဇိတေ ကုလံ ဥပသင်္ကမန္တေ မနုဿာ ပစ္စုဋ္ဌေန္တိ အဘိဝါဒေန္တိ အာသနံ ဒေန္တိ၊ ဥစ္စာကုလီနသံဝတ္တနိကံ၊ ဘိက္ခဝေ၊ တံ ကုလံ တသ္မိံ သမယေ ပဋိပဒံ ပဋိပန္နံ ဟောတိ.

‘‘ယသ္မိံ၊ ဘိက္ခဝေ၊ သမယေ သီလဝန္တေ ပဗ္ဗဇိတေ ကုလံ ဥပသင်္ကမန္တေ မနုဿာ မစ္ဆေရမလံ ပဋိဝိနေန္တိ [ပဋိဝိနောဒေန္တိ (သီ. ပီ.)]၊ မဟေသက္ခသံဝတ္တနိကံ၊ ဘိက္ခဝေ၊ တံ ကုလံ တသ္မိံ သမယေ ပဋိပဒံ ပဋိပန္နံ ဟောတိ.

‘‘ယသ္မိံ၊ ဘိက္ခဝေ၊ သမယေ သီလဝန္တေ ပဗ္ဗဇိတေ ကုလံ ဥပသင်္ကမန္တေ မနုဿာ ယထာသတ္တိ ယထာဗလံ သံဝိဘဇန္တိ၊ မဟာဘောဂသံဝတ္တနိကံ၊ ဘိက္ခဝေ၊ တံ ကုလံ တသ္မိံ သမယေ ပဋိပဒံ ပဋိပန္နံ ဟောတိ.

‘‘ယသ္မိံ၊ ဘိက္ခဝေ၊ သမယေ သီလဝန္တေ ပဗ္ဗဇိတေ ကုလံ ဥပသင်္ကမန္တေ မနုဿာ ပရိပုစ္ဆန္တိ ပရိပဉှန္တိ ဓမ္မံ သုဏန္တိ၊ မဟာပညာသံဝတ္တနိကံ၊ ဘိက္ခဝေ၊ တံ ကုလံ တသ္မိံ သမယေ ပဋိပဒံ ပဋိပန္နံ ဟောတိ. ယံ၊ ဘိက္ခဝေ၊ သီလဝန္တော ပဗ္ဗဇိတာ ကုလံ ဥပသင်္ကမန္တိ၊ တတ္ထ မနုဿာ ဣမေဟိ ပဉ္စဟိ ဌာနေဟိ ဗဟုံ ပုညံ ပသဝန္တီ’’တိ. နဝမံ.