၁. အဝဇာနာတိသုတ္တံ

၁၄၁. ‘‘ပဉ္စိမေ၊ ဘိက္ခဝေ၊ ပုဂ္ဂလာ သန္တော သံဝိဇ္ဇမာနာ လောကသ္မိံ. ကတမေ ပဉ္စ? ဒတွာ အဝဇာနာတိ၊ သံဝါသေန အဝဇာနာတိ၊ အာဓေယျမုခေါ [အာဒိယျမုခေါ (သီ.)၊ အာဒေယျမုခေါ (သျာ. ကံ.)၊ အာဒိယမုခေါ (ပီ.) အဋ္ဌကထာယ ပဌမသံဝဏ္ဏနာနုရူပံ. ပု. ပ. ၁၉၃ ပဿိတဗ္ဗံ] ဟောတိ၊ လောလော ဟောတိ၊ မန္ဒော မောမူဟော ဟောတိ [မန္ဒော ဟောတိ မောမူဟော (သီ.)].

‘‘ကထဉ္စ၊ ဘိက္ခဝေ၊ ပုဂ္ဂလော ဒတွာ အဝဇာနာတိ? ဣဓ၊ ဘိက္ခဝေ၊ ပုဂ္ဂလော ပုဂ္ဂလဿ ဒေတိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရံ. တဿ ဧဝံ ဟောတိ – ‘အဟံ ဒေမိ၊ အယံ ပဋိဂ္ဂဏှာတီ’တိ. တမေနံ ဒတွာ အဝဇာနာတိ. ဧဝံ ခေါ၊ ဘိက္ခဝေ၊ ပုဂ္ဂလော ဒတွာ အဝဇာနာတိ.

‘‘ကထဉ္စ၊ ဘိက္ခဝေ၊ ပုဂ္ဂလော သံဝါသေန အဝဇာနာတိ? ဣဓ၊ ဘိက္ခဝေ၊ ပုဂ္ဂလော ပုဂ္ဂလေန သဒ္ဓိံ သံဝသတိ ဒွေ ဝါ တီဏိ ဝါ ဝဿာနိ. တမေနံ သံဝါသေန အဝဇာနာတိ. ဧဝံ ခေါ၊ ဘိက္ခဝေ၊ ပုဂ္ဂလော သံဝါသေန အဝဇာနာတိ.

‘‘ကထဉ္စ၊ ဘိက္ခဝေ၊ ပုဂ္ဂလော အာဓေယျမုခေါ ဟောတိ? ဣဓ၊ ဘိက္ခဝေ၊ ဧကစ္စော ပုဂ္ဂလော ပရဿ ဝဏ္ဏေ ဝါ အဝဏ္ဏေ ဝါ ဘာသိယမာနေ တံ ခိပ္ပညေဝ အဓိမုစ္စိတာ [အဓိမုစ္စိတော (သျာ.)] ဟောတိ. ဧဝံ ခေါ၊ ဘိက္ခဝေ၊ ပုဂ္ဂလော အာဓေယျမုခေါ ဟောတိ.

‘‘ကထဉ္စ၊ ဘိက္ခဝေ၊ ပုဂ္ဂလော လောလော ဟောတိ? ဣဓ၊ ဘိက္ခဝေ၊ ဧကစ္စော ပုဂ္ဂလော ဣတ္တရသဒ္ဓေါ ဟောတိ ဣတ္တရဘတ္တီ ဣတ္တရပေမော ဣတ္တရပ္ပသာဒေါ. ဧဝံ ခေါ၊ ဘိက္ခဝေ၊ ပုဂ္ဂလော လောလော ဟောတိ.

‘‘ကထဉ္စ၊ ဘိက္ခဝေ၊ ပုဂ္ဂလော မန္ဒော မောမူဟော ဟောတိ? ဣဓ၊ ဘိက္ခဝေ၊ ဧကစ္စော ပုဂ္ဂလော ကုသလာကုသလေ ဓမ္မေ န ဇာနာတိ၊ သာဝဇ္ဇာနဝဇ္ဇေ ဓမ္မေ န ဇာနာတိ၊ ဟီနပ္ပဏီတေ ဓမ္မေ န ဇာနာတိ၊ ကဏှသုက္ကသပ္ပဋိဘာဂေ ဓမ္မေ န ဇာနာတိ. ဧဝံ ခေါ၊ ဘိက္ခဝေ၊ ပုဂ္ဂလော မန္ဒော မောမူဟော ဟောတိ. ဣမေ ခေါ၊ ဘိက္ခဝေ၊ ပဉ္စ ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ. ပဌမံ.