၉. အက္ခမသုတ္တံ

၁၃၉. ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတော ရညော နာဂေါ န ရာဇာရဟော ဟောတိ န ရာဇဘောဂ္ဂေါ၊ န ရညော အင်္ဂံတွေဝ သင်္ခံ ဂစ္ဆတိ. ကတမေဟိ ပဉ္စဟိ? ဣဓ၊ ဘိက္ခဝေ၊ ရညော နာဂေါ အက္ခမော ဟောတိ ရူပါနံ၊ အက္ခမော သဒ္ဒါနံ၊ အက္ခမော ဂန္ဓာနံ၊ အက္ခမော ရသာနံ၊ အက္ခမော ဖောဋ္ဌဗ္ဗာနံ.

‘‘ကထဉ္စ၊ ဘိက္ခဝေ၊ ရညော နာဂေါ အက္ခမော ဟောတိ ရူပါနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဟတ္ထိကာယံ ဝါ ဒိသွာ အဿကာယံ ဝါ ဒိသွာ ရထကာယံ ဝါ ဒိသွာ ပတ္တိကာယံ ဝါ ဒိသွာ သံသီဒတိ ဝိသီဒတိ၊ န သန္ထမ္ဘတိ န သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ အက္ခမော ဟောတိ ရူပါနံ.

‘‘ကထဉ္စ၊ ဘိက္ခဝေ၊ ရညော နာဂေါ အက္ခမော ဟောတိ သဒ္ဒါနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဟတ္ထိသဒ္ဒံ ဝါ သုတွာ အဿသဒ္ဒံ ဝါ သုတွာ ရထသဒ္ဒံ ဝါ သုတွာ ပတ္တိသဒ္ဒံ ဝါ သုတွာ ဘေရိပဏဝသင်္ခတိဏဝနိန္နာဒသဒ္ဒံ ဝါ သုတွာ သံသီဒတိ ဝိသီဒတိ၊ န သန္ထမ္ဘတိ န သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ အက္ခမော ဟောတိ သဒ္ဒါနံ.

‘‘ကထဉ္စ၊ ဘိက္ခဝေ၊ ရညော နာဂေါ အက္ခမော ဟောတိ ဂန္ဓာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ယေ တေ ရညော နာဂါ အဘိဇာတာ သင်္ဂါမာဝစရာ တေသံ မုတ္တကရီသဿ ဂန္ဓံ ဃာယိတွာ သံသီဒတိ ဝိသီဒတိ၊ န သန္ထမ္ဘတိ န သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ အက္ခမော ဟောတိ ဂန္ဓာနံ.

‘‘ကထဉ္စ၊ ဘိက္ခဝေ၊ ရညော နာဂေါ အက္ခမော ဟောတိ ရသာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဧကိဿာ ဝါ တိဏောဒကဒတ္တိယာ ဝိမာနိတော [ဝိဟနီတော (သျာ.)၊ ဝိဟာနိတော (ကတ္ထစိ)] ဒွီဟိ ဝါ တီဟိ ဝါ စတူဟိ ဝါ ပဉ္စဟိ ဝါ တိဏောဒကဒတ္တီဟိ ဝိမာနိတော သံသီဒတိ ဝိသီဒတိ၊ န သန္ထမ္ဘတိ န သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ အက္ခမော ဟောတိ ရသာနံ.

‘‘ကထဉ္စ၊ ဘိက္ခဝေ၊ ရညော နာဂေါ အက္ခမော ဟောတိ ဖောဋ္ဌဗ္ဗာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဧကေန ဝါ သရဝေဂေန ဝိဒ္ဓေါ၊ ဒွီဟိ ဝါ တီဟိ ဝါ စတူဟိ ဝါ ပဉ္စဟိ ဝါ သရဝေဂေဟိ ဝိဒ္ဓေါ သံသီဒတိ ဝိသီဒတိ၊ န သန္ထမ္ဘတိ န သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ အက္ခမော ဟောတိ ဖောဋ္ဌဗ္ဗာနံ.

‘‘ဣမေဟိ ခေါ၊ ဘိက္ခဝေ၊ ပဉ္စဟိ အင်္ဂေဟိ သမန္နာဂတော ရညော နာဂေါ န ရာဇာရဟော ဟောတိ န ရာဇဘောဂ္ဂေါ န ရညော အင်္ဂံတွေဝ သင်္ခံ ဂစ္ဆတိ.

‘‘ဧဝမေဝံ ခေါ၊ ဘိက္ခဝေ၊ ပဉ္စဟိ အင်္ဂေဟိ သမန္နာဂတော ဘိက္ခု န အာဟုနေယျော ဟောတိ န ပါဟုနေယျော န ဒက္ခိဏေယျော န အဉ္ဇလိကရဏီယော န အနုတ္တရံ ပုညက္ခေတ္တံ လောကဿ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု အက္ခမော ဟောတိ ရူပါနံ၊ အက္ခမော သဒ္ဒါနံ၊ အက္ခမော ဂန္ဓာနံ၊ အက္ခမော ရသာနံ၊ အက္ခမော ဖောဋ္ဌဗ္ဗာနံ.

‘‘ကထဉ္စ၊ ဘိက္ခဝေ၊ ဘိက္ခု အက္ခမော ဟောတိ ရူပါနံ? ဣဓ၊ ဘိက္ခဝေ၊ ဘိက္ခု စက္ခုနာ ရူပံ ဒိသွာ ရဇနီယေ ရူပေ သာရဇ္ဇတိ၊ န သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု အက္ခမော ဟောတိ ရူပါနံ.

‘‘ကထဉ္စ၊ ဘိက္ခဝေ၊ ဘိက္ခု အက္ခမော ဟောတိ သဒ္ဒါနံ? ဣဓ၊ ဘိက္ခဝေ၊ ဘိက္ခု သောတေန သဒ္ဒံ သုတွာ ရဇနီယေ သဒ္ဒေ သာရဇ္ဇတိ၊ န သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု အက္ခမော ဟောတိ သဒ္ဒါနံ.

‘‘ကထဉ္စ၊ ဘိက္ခဝေ၊ ဘိက္ခု အက္ခမော ဟောတိ ဂန္ဓာနံ? ဣဓ၊ ဘိက္ခဝေ၊ ဘိက္ခု ဃာနေန ဂန္ဓံ ဃာယိတွာ ရဇနီယေ ဂန္ဓေ သာရဇ္ဇတိ၊ န သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု အက္ခမော ဟောတိ ဂန္ဓာနံ.

‘‘ကထဉ္စ၊ ဘိက္ခဝေ၊ ဘိက္ခု အက္ခမော ဟောတိ ရသာနံ? ဣဓ၊ ဘိက္ခဝေ၊ ဘိက္ခု ဇိဝှါယ ရသံ သာယိတွာ ရဇနီယေ ရသေ သာရဇ္ဇတိ၊ န သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု အက္ခမော ဟောတိ ရသာနံ.

‘‘ကထဉ္စ၊ ဘိက္ခဝေ၊ ဘိက္ခု အက္ခမော ဟောတိ ဖောဋ္ဌဗ္ဗာနံ? ဣဓ၊ ဘိက္ခဝေ၊ ဘိက္ခု ကာယေန ဖောဋ္ဌဗ္ဗံ ဖုသိတွာ ရဇနီယေ ဖောဋ္ဌဗ္ဗေ သာရဇ္ဇတိ၊ န သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု အက္ခမော ဟောတိ ဖောဋ္ဌဗ္ဗာနံ.

‘‘ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု န အာဟုနေယျော ဟောတိ န ပါဟုနေယျော န ဒက္ခိဏေယျော န အဉ္ဇလိကရဏီယော န အနုတ္တရံ ပုညက္ခေတ္တံ လောကဿ.

‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတော ရညော နာဂေါ ရာဇာရဟော ဟောတိ ရာဇဘောဂ္ဂေါ၊ ရညော အင်္ဂံတွေဝ သင်္ခံ ဂစ္ဆတိ. ကတမေဟိ ပဉ္စဟိ? ဣဓ၊ ဘိက္ခဝေ၊ ရညော နာဂေါ ခမော ဟောတိ ရူပါနံ၊ ခမော သဒ္ဒါနံ၊ ခမော ဂန္ဓာနံ၊ ခမော ရသာနံ၊ ခမော ဖောဋ္ဌဗ္ဗာနံ.

‘‘ကထဉ္စ၊ ဘိက္ခဝေ၊ ရညော နာဂေါ ခမော ဟောတိ ရူပါနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဟတ္ထိကာယံ ဝါ ဒိသွာ အဿကာယံ ဝါ ဒိသွာ ရထကာယံ ဝါ ဒိသွာ ပတ္တိကာယံ ဝါ ဒိသွာ န သံသီဒတိ န ဝိသီဒတိ၊ သန္ထမ္ဘတိ သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ ခမော ဟောတိ ရူပါနံ.

‘‘ကထဉ္စ၊ ဘိက္ခဝေ၊ ရညော နာဂေါ ခမော ဟောတိ သဒ္ဒါနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဟတ္ထိသဒ္ဒံ ဝါ သုတွာ အဿသဒ္ဒံ ဝါ သုတွာ ရထသဒ္ဒံ ဝါ သုတွာ ပတ္တိသဒ္ဒံ ဝါ သုတွာ ဘေရိပဏဝသင်္ခတိဏဝနိန္နာဒသဒ္ဒံ ဝါ သုတွာ န သံသီဒတိ န ဝိသီဒတိ၊ သန္ထမ္ဘတိ သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ ခမော ဟောတိ သဒ္ဒါနံ.

‘‘ကထဉ္စ၊ ဘိက္ခဝေ၊ ရညော နာဂေါ ခမော ဟောတိ ဂန္ဓာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ယေ တေ ရညော နာဂါ အဘိဇာတာ သင်္ဂါမာဝစရာ တေသံ မုတ္တကရီသဿ ဂန္ဓံ ဃာယိတွာ န သံသီဒတိ န ဝိသီဒတိ၊ သန္ထမ္ဘတိ သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ ခမော ဟောတိ ဂန္ဓာနံ.

‘‘ကထဉ္စ၊ ဘိက္ခဝေ၊ ရညော နာဂေါ ခမော ဟောတိ ရသာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဧကိဿာ ဝါ တိဏောဒကဒတ္တိယာ ဝိမာနိတော ဒွီဟိ ဝါ တီဟိ ဝါ စတူဟိ ဝါ ပဉ္စဟိ ဝါ တိဏောဒကဒတ္တီဟိ ဝိမာနိတော န သံသီဒတိ န ဝိသီဒတိ၊ သန္ထမ္ဘတိ သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ ခမော ဟောတိ ရသာနံ.

‘‘ကထဉ္စ၊ ဘိက္ခဝေ၊ ရညော နာဂေါ ခမော ဟောတိ ဖောဋ္ဌဗ္ဗာနံ? ဣဓ၊ ဘိက္ခဝေ၊ ရညော နာဂေါ သင်္ဂါမဂတော ဧကေန ဝါ သရဝေဂေန ဝိဒ္ဓေါ၊ ဒွီဟိ ဝါ တီဟိ ဝါ စတူဟိ ဝါ ပဉ္စဟိ ဝါ သရဝေဂေဟိ ဝိဒ္ဓေါ န သံသီဒတိ န ဝိသီဒတိ၊ သန္ထမ္ဘတိ သက္ကောတိ သင်္ဂါမံ ဩတရိတုံ. ဧဝံ ခေါ၊ ဘိက္ခဝေ၊ ရညော နာဂေါ ခမော ဟောတိ ဖောဋ္ဌဗ္ဗာနံ.

‘‘ဣမေဟိ ခေါ၊ ဘိက္ခဝေ၊ ပဉ္စဟိ အင်္ဂေဟိ သမန္နာဂတော ရညော နာဂေါ ရာဇာရဟော ဟောတိ ရာဇဘောဂ္ဂေါ၊ ရညော အင်္ဂံတွေဝ သင်္ခံ ဂစ္ဆတိ.

‘‘ဧဝမေဝံ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု အာဟုနေယျော ဟောတိ ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု ခမော ဟောတိ ရူပါနံ၊ ခမော သဒ္ဒါနံ၊ ခမော ဂန္ဓာနံ၊ ခမော ရသာနံ၊ ခမော ဖောဋ္ဌဗ္ဗာနံ.

‘‘ကထဉ္စ၊ ဘိက္ခဝေ၊ ဘိက္ခု ခမော ဟောတိ ရူပါနံ? ဣဓ၊ ဘိက္ခဝေ၊ ဘိက္ခု စက္ခုနာ ရူပံ ဒိသွာ ရဇနီယေ ရူပေ န သာရဇ္ဇတိ၊ သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု ခမော ဟောတိ ရူပါနံ.

‘‘ကထဉ္စ၊ ဘိက္ခဝေ၊ ဘိက္ခု ခမော ဟောတိ သဒ္ဒါနံ? ဣဓ၊ ဘိက္ခဝေ၊ ဘိက္ခု သောတေန သဒ္ဒံ သုတွာ ရဇနီယေ သဒ္ဒေ န သာရဇ္ဇတိ၊ သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု ခမော ဟောတိ သဒ္ဒါနံ.

‘‘ကထဉ္စ၊ ဘိက္ခဝေ၊ ဘိက္ခု ခမော ဟောတိ ဂန္ဓာနံ. ဣဓ၊ ဘိက္ခဝေ၊ ဘိက္ခု ဃာနေန ဂန္ဓံ ဃာယိတွာ ရဇနီယေ ဂန္ဓေ န သာရဇ္ဇတိ၊ သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု ခမော ဟောတိ ဂန္ဓာနံ.

‘‘ကထဉ္စ၊ ဘိက္ခဝေ၊ ဘိက္ခု ခမော ဟောတိ ရသာနံ? ဣဓ၊ ဘိက္ခဝေ၊ ဘိက္ခု ဇိဝှါယ ရသံ သာယိတွာ ရဇနီယေ ရသေ န သာရဇ္ဇတိ၊ သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု ခမော ဟောတိ ရသာနံ.

‘‘ကထဉ္စ၊ ဘိက္ခဝေ၊ ဘိက္ခု ခမော ဟောတိ ဖောဋ္ဌဗ္ဗာနံ? ဣဓ၊ ဘိက္ခဝေ၊ ဘိက္ခု ကာယေန ဖောဋ္ဌဗ္ဗံ ဖုသိတွာ ရဇနီယေ ဖောဋ္ဌဗ္ဗေ န သာရဇ္ဇတိ၊ သက္ကောတိ စိတ္တံ သမာဒဟိတုံ. ဧဝံ ခေါ၊ ဘိက္ခဝေ၊ ဘိက္ခု ခမော ဟောတိ ဖောဋ္ဌဗ္ဗာနံ.

‘‘ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု အာဟုနေယျော ဟောတိ ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿာ’’တိ. နဝမံ.