၁. ကုလူပကသုတ္တံ

၁၁၁. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ကုလူပကော ဘိက္ခု ကုလေသု အပ္ပိယော စ ဟောတိ အမနာပေါ စ အဂရု စ အဘာဝနီယော စ. ကတမေဟိ ပဉ္စဟိ? အသန္ထဝဝိဿာသီ [အသန္ထုတဝိဿာသီ (သီ.)၊ အသန္ဓဝဝိဿာသီ (က.)] စ ဟောတိ၊ အနိဿရဝိကပ္ပီ စ၊ ဝိဿဋ္ဌုပသေဝီ [ဝိယတ္ထုပသေဝီ (သီ.)၊ ဗျတ္ထုပသေဝီ (သျာ. ကံ.)၊ ဝျတ္တူပသေဝီ (ပီ.)] စ၊ ဥပကဏ္ဏကဇပ္ပီ စ၊ အတိယာစနကော စ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ကုလူပကော ဘိက္ခု ကုလေသု အပ္ပိယော စ ဟောတိ အမနာပေါ စ အဂရု စ အဘာဝနီယော စ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ကုလူပကော ဘိက္ခု ကုလေသု ပိယော စ ဟောတိ မနာပေါ စ ဂရု စ ဘာဝနီယော စ. ကတမေဟိ ပဉ္စဟိ? န အသန္ထဝဝိဿာသီ စ ဟောတိ၊ န အနိဿရဝိကပ္ပီ စ၊ န ဝိဿဋ္ဌုပသေဝီ စ၊ န ဥပကဏ္ဏကဇပ္ပီ စ၊ န အတိယာစနကော စ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ကုလူပကော ဘိက္ခု ကုလေသု ပိယော စ ဟောတိ မနာပေါ စ ဂရု စ ဘာဝနီယော စာ’’တိ. ပဌမံ.