၁. သာရဇ္ဇသုတ္တံ

၁၀၁. ‘‘ပဉ္စိမေ၊ ဘိက္ခဝေ၊ သေခဝေသာရဇ္ဇကရဏာ ဓမ္မာ. ကတမေ ပဉ္စ? ဣဓ၊ ဘိက္ခဝေ၊ ဘိက္ခု သဒ္ဓေါ ဟောတိ၊ သီလဝါ ဟောတိ၊ ဗဟုဿုတော ဟောတိ၊ အာရဒ္ဓဝီရိယော ဟောတိ၊ ပညဝါ ဟောတိ.

‘‘ယံ၊ ဘိက္ခဝေ၊ အဿဒ္ဓဿ သာရဇ္ဇံ ဟောတိ၊ သဒ္ဓဿ တံ သာရဇ္ဇံ န ဟောတိ. တသ္မာယံ ဓမ္မော သေခဝေသာရဇ္ဇကရဏော.

‘‘ယံ၊ ဘိက္ခဝေ၊ ဒုဿီလဿ သာရဇ္ဇံ ဟောတိ၊ သီလဝတော တံ သာရဇ္ဇံ န ဟောတိ. တသ္မာယံ ဓမ္မော သေခဝေသာရဇ္ဇကရဏော.

‘‘ယံ၊ ဘိက္ခဝေ၊ အပ္ပဿုတဿ သာရဇ္ဇံ ဟောတိ၊ ဗဟုဿုတဿ တံ သာရဇ္ဇံ န ဟောတိ. တသ္မာယံ ဓမ္မော သေခဝေသာရဇ္ဇကရဏော.

‘‘ယံ၊ ဘိက္ခဝေ၊ ကုသီတဿ သာရဇ္ဇံ ဟောတိ၊ အာရဒ္ဓဝီရိယဿ တံ သာရဇ္ဇံ န ဟောတိ. တသ္မာယံ ဓမ္မော သေခဝေသာရဇ္ဇကရဏော.

‘‘ယံ၊ ဘိက္ခဝေ၊ ဒုပ္ပညဿ သာရဇ္ဇံ ဟောတိ၊ ပညဝတော တံ သာရဇ္ဇံ န ဟောတိ. တသ္မာယံ ဓမ္မော သေခဝေသာရဇ္ဇကရဏော. ဣမေ ခေါ၊ ဘိက္ခဝေ၊ ပဉ္စ သေခဝေသာရဇ္ဇကရဏာ ဓမ္မာ’’တိ. ပဌမံ.