၃. ပဌမဝဍ္ဎိသုတ္တံ

၆၃. ‘‘ပဉ္စဟိ၊ ဘိက္ခဝေ၊ ဝဍ္ဎီဟိ ဝဍ္ဎမာနော အရိယသာဝကော အရိယာယ ဝဍ္ဎိယာ ဝဍ္ဎတိ၊ သာရာဒါယီ စ ဟောတိ ဝရာဒါယီ စ ကာယဿ. ကတမာဟိ ပဉ္စဟိ? သဒ္ဓါယ ဝဍ္ဎတိ၊ သီလေန ဝဍ္ဎတိ၊ သုတေန ဝဍ္ဎတိ၊ စာဂေန ဝဍ္ဎတိ၊ ပညာယ ဝဍ္ဎတိ – ဣမာဟိ ခေါ၊ ဘိက္ခဝေ၊ ပဉ္စဟိ ဝဍ္ဎီဟိ ဝဍ္ဎမာနော အရိယသာဝကော အရိယာယ ဝဍ္ဎိယာ ဝဍ္ဎတိ၊ သာရာဒါယီ စ ဟောတိ ဝရာဒါယီ စ ကာယဿာ’’တိ.

‘‘သဒ္ဓါယ သီလေန စ ယော ပဝဍ္ဎတိ [ယောဓ ဝဍ္ဎတိ (သီ.)]၊

ပညာယ စာဂေန သုတေန စူဘယံ၊

သော တာဒိသော သပ္ပုရိသော ဝိစက္ခဏော၊

အာဒီယတီ သာရမိဓေဝ အတ္တနော’’တိ. တတိယံ၊