၉. ပုတ္တသုတ္တံ

၃၉. ‘‘ပဉ္စိမာနိ၊ ဘိက္ခဝေ၊ ဌာနာနိ သမ္ပဿန္တာ မာတာပိတရော ပုတ္တံ ဣစ္ဆန္တိ ကုလေ ဇာယမာနံ. ကတမာနိ ပဉ္စ? ဘတော ဝါ နော ဘရိဿတိ၊ ကိစ္စံ ဝါ နော ကရိဿတိ၊ ကုလဝံသော စိရံ ဌဿတိ၊ ဒါယဇ္ဇံ ပဋိပဇ္ဇိဿတိ၊ အထ ဝါ ပန ပေတာနံ ကာလင်္ကတာနံ ဒက္ခိဏံ အနုပ္ပဒဿတီတိ. ဣမာနိ ခေါ၊ ဘိက္ခဝေ၊ ပဉ္စ ဌာနာနိ သမ္ပဿန္တာ မာတာပိတရော ပုတ္တံ ဣစ္ဆန္တိ ကုလေ ဇာယမာန’’န္တိ.

[ကထာ. ၄၉၁] ‘‘ပဉ္စ ဌာနာနိ သမ္ပဿံ၊ ပုတ္တံ ဣစ္ဆန္တိ ပဏ္ဍိတာ၊

ဘတော ဝါ နော ဘရိဿတိ၊ ကိစ္စံ ဝါ နော ကရိဿတိ.

‘‘ကုလဝံသော စိရံ တိဋ္ဌေ၊ ဒါယဇ္ဇံ ပဋိပဇ္ဇတိ၊

အထ ဝါ ပန ပေတာနံ၊ ဒက္ခိဏံ အနုပ္ပဒဿတိ.

‘‘ဌာနာနေတာနိ သမ္ပဿံ၊ ပုတ္တံ ဣစ္ဆန္တိ ပဏ္ဍိတာ၊

တသ္မာ သန္တော သပ္ပုရိသာ၊ ကတညူ ကတဝေဒိနော.

‘‘ဘရန္တိ မာတာပိတရော၊ ပုဗ္ဗေ ကတမနုဿရံ၊

ကရောန္တိ နေသံ ကိစ္စာနိ၊ ယထာ တံ ပုဗ္ဗကာရိနံ.

‘‘ဩဝါဒကာရီ ဘတပေါသီ၊ ကုလဝံသံ အဟာပယံ၊

သဒ္ဓေါ သီလေန သမ္ပန္နော၊ ပုတ္တော ဟောတိ ပသံသိယော’’တိ. နဝမံ၊