၁၀. မဟာသာလပုတ္တသုတ္တံ

၄၀. ‘‘ဟိမဝန္တံ၊ ဘိက္ခဝေ၊ ပဗ္ဗတရာဇံ နိဿာယ မဟာသာလာ ပဉ္စဟိ ဝဍ္ဎီဟိ ဝဍ္ဎန္တိ. ကတမာဟိ ပဉ္စဟိ? သာခါပတ္တပလာသေန ဝဍ္ဎန္တိ၊ တစေန ဝဍ္ဎန္တိ၊ ပပဋိကာယ ဝဍ္ဎန္တိ၊ ဖေဂ္ဂုနာ ဝဍ္ဎန္တိ၊ သာရေန ဝဍ္ဎန္တိ. ဟိမဝန္တံ၊ ဘိက္ခဝေ၊ ပဗ္ဗတရာဇံ နိဿာယ မဟာသာလာ ဣမာဟိ ပဉ္စဟိ ဝဍ္ဎီဟိ ဝဍ္ဎန္တိ. ဧဝမေဝံ ခေါ၊ ဘိက္ခဝေ၊ သဒ္ဓံ ကုလပုတ္တံ နိဿာယ အန္တောဇနော ပဉ္စဟိ ဝဍ္ဎီဟိ ဝဍ္ဎတိ. ကတမာဟိ ပဉ္စဟိ? သဒ္ဓါယ ဝဍ္ဎတိ၊ သီလေန ဝဍ္ဎတိ၊ သုတေန ဝဍ္ဎတိ၊ စာဂေန ဝဍ္ဎတိ၊ ပညာယ ဝဍ္ဎတိ. သဒ္ဓံ၊ ဘိက္ခဝေ၊ ကုလပုတ္တံ နိဿာယ အန္တောဇနော ဣမာဟိ ပဉ္စဟိ ဝဍ္ဎီဟိ ဝဍ္ဎတီ’’တိ.

‘‘ယထာ ဟိ ပဗ္ဗတော သေလော၊ အရညသ္မိံ ဗြဟာဝနေ၊

တံ ရုက္ခာ ဥပနိဿာယ၊ ဝဍ္ဎန္တေ တေ ဝနပ္ပတီ.

‘‘တထေဝ သီလသမ္ပန္နံ၊ သဒ္ဓံ ကုလပုတ္တံ ဣမံ [ကုလပတိံ ဣဓ (သီ.)၊ ကုလပုတ္တံ ဣဓ (သျာ.)]၊

ဥပနိဿာယ ဝဍ္ဎန္တိ၊ ပုတ္တဒါရာ စ ဗန္ဓဝါ၊

အမစ္စာ ဉာတိသံဃာ စ၊ ယေ စဿ အနုဇီဝိနော.

‘‘တျဿ သီလဝတော သီလံ၊ စာဂံ သုစရိတာနိ စ၊

ပဿမာနာနုကုဗ္ဗန္တိ၊ ယေ ဘဝန္တိ ဝိစက္ခဏာ.

‘‘ဣမံ ဓမ္မံ စရိတွာန၊ မဂ္ဂံ [သဂ္ဂံ (သျာ. က.)] သုဂတိဂါမိနံ၊

နန္ဒိနော ဒေဝလောကသ္မိံ၊ မောဒန္တိ ကာမကာမိနော’’တိ. ဒသမံ၊

သုမနဝဂ္ဂေါ စတုတ္ထော.