၁၀. သမဏသုတ္တံ

၂၄၁. ‘‘‘ဣဓေဝ၊ ဘိက္ခဝေ၊ (ပဌမော) သမဏော၊ ဣဓ ဒုတိယော သမဏော၊ ဣဓ တတိယော သမဏော၊ ဣဓ စတုတ္ထော သမဏော၊ သုညာ ပရပ္ပဝါဒါ သမဏေဟိ အညေဟီ’တိ [သမဏေဟိ အညေတိ (သီ. ပီ. က.) ဧတ္ထ အညေဟီတိ သကာယ ပဋိညာယ သစ္စာဘိညေဟီတိ အတ္ထော ဝေဒိတဗ္ဗော. ဒီ. နိ. ၂.၂၁၄၊ မ. နိ. ၁.၁၄၀] – ဧဝမေတံ၊ ဘိက္ခဝေ၊ သမ္မာ သီဟနာဒံ နဒထ.

‘‘ကတမော စ၊ ဘိက္ခဝေ၊ ပဌမော သမဏော? ဣဓ၊ ဘိက္ခဝေ၊ ဘိက္ခု တိဏ္ဏံ သံယောဇနာနံ ပရိက္ခယာ သောတာပန္နော ဟောတိ အဝိနိပါတဓမ္မော နိယတော သမ္ဗောဓိပရာယဏော. အယံ၊ ဘိက္ခဝေ၊ ပဌမော သမဏော.

‘‘ကတမော စ၊ ဘိက္ခဝေ၊ ဒုတိယော သမဏော? ဣဓ၊ ဘိက္ခဝေ၊ ဘိက္ခု တိဏ္ဏံ သံယောဇနာနံ ပရိက္ခယာ ရာဂဒေါသမောဟာနံ တနုတ္တာ သကဒါဂါမီ ဟောတိ၊ သကိဒေဝ ဣမံ လောကံ အာဂန္တွာ ဒုက္ခဿန္တံ ကရောတိ. အယံ၊ ဘိက္ခဝေ၊ ဒုတိယော သမဏော.

‘‘ကတမော စ၊ ဘိက္ခဝေ၊ တတိယော သမဏော? ဣဓ၊ ဘိက္ခဝေ၊ ဘိက္ခု ပဉ္စန္နံ ဩရမ္ဘာဂိယာနံ သံယောဇနာနံ ပရိက္ခယာ ဩပပါတိကော ဟောတိ တတ္ထ ပရိနိဗ္ဗာယီ အနာဝတ္တိဓမ္မော တသ္မာ လောကာ. အယံ၊ ဘိက္ခဝေ၊ တတိယော သမဏော.

‘‘ကတမော စ၊ ဘိက္ခဝေ၊ စတုတ္ထော သမဏော? ဣဓ၊ ဘိက္ခဝေ၊ ဘိက္ခု အာသဝါနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရတိ. အယံ၊ ဘိက္ခဝေ၊ စတုတ္ထော သမဏော.

‘‘‘ဣဓေဝ၊ ဘိက္ခဝေ၊ ပဌမော သမဏော၊ ဣဓ ဒုတိယော သမဏော၊ ဣဓ တတိယော သမဏော၊ ဣဓ စတုတ္ထော သမဏော၊ သုညာ ပရပ္ပဝါဒါ သမဏေဘိ အညေဟီ’တိ – ဧဝမေတံ၊ ဘိက္ခဝေ၊ သမ္မာ သီဟနာဒံ နဒထာ’’တိ. ဒသမံ.