(၂၃) ၃. ဒုစ္စရိတဝဂ္ဂေါ

၁. ဒုစ္စရိတသုတ္တံ

၂၂၁. ‘‘စတ္တာရိမာနိ၊ ဘိက္ခဝေ၊ ဝစီဒုစ္စရိတာနိ. ကတမာနိ စတ္တာရိ? မုသာဝါဒေါ၊ ပိသုဏာ ဝါစာ၊ ဖရုသာ ဝါစာ၊ သမ္ဖပ္ပလာပေါ – ဣမာနိ ခေါ၊ ဘိက္ခဝေ၊ စတ္တာရိ ဝစီဒုစ္စရိတာနိ. စတ္တာရိမာနိ၊ ဘိက္ခဝေ၊ ဝစီသုစရိတာနိ. ကတမာနိ စတ္တာရိ? သစ္စဝါစာ၊ အပိသုဏာ ဝါစာ၊ သဏှာ ဝါစာ၊ မန္တဝါစာ [မန္တာ ဝါစာ (သီ. သျာ. ကံ. ပီ.)] – ဣမာနိ ခေါ၊ ဘိက္ခဝေ၊ စတ္တာရိ ဝစီသုစရိတာနီ’’တိ. ပဌမံ.

၂. ဒိဋ္ဌိသုတ္တံ

၂၂၂. ‘‘စတူဟိ၊ ဘိက္ခဝေ၊ ဓမ္မေဟိ သမန္နာဂတော ဗာလော အဗျတ္တော အသပ္ပုရိသော ခတံ ဥပဟတံ အတ္တာနံ ပရိဟရတိ၊ သာဝဇ္ဇော စ ဟောတိ သာနုဝဇ္ဇော စ ဝိညူနံ၊ ဗဟုဉ္စ အပုညံ ပသဝတိ. ကတမေဟိ စတူဟိ? ကာယဒုစ္စရိတေန၊ ဝစီဒုစ္စရိတေန၊ မနောဒုစ္စရိတေန၊ မိစ္ဆာဒိဋ္ဌိယာ – ဣမေဟိ ခေါ၊ ဘိက္ခဝေ၊ စတူဟိ ဓမ္မေဟိ သမန္နာဂတော ဗာလော အဗျတ္တော အသပ္ပုရိသော ခတံ ဥပဟတံ အတ္တာနံ ပရိဟရတိ၊ သာဝဇ္ဇော စ ဟောတိ သာနုဝဇ္ဇော စ ဝိညူနံ၊ ဗဟုဉ္စ အပုညံ ပသဝတိ.

‘‘စတူဟိ၊ ဘိက္ခဝေ၊ ဓမ္မေဟိ သမန္နာဂတော ပဏ္ဍိတော ဝိယတ္တော သပ္ပုရိသော အက္ခတံ အနုပဟတံ အတ္တာနံ ပရိဟရတိ၊ အနဝဇ္ဇော စ ဟောတိ အနနုဝဇ္ဇော ဝိညူနံ၊ ဗဟုဉ္စ ပုညံ ပသဝတိ. ကတမေဟိ စတူဟိ? ကာယသုစရိတေန၊ ဝစီသုစရိတေန၊ မနောသုစရိတေန၊ သမ္မာဒိဋ္ဌိယာ – ဣမေဟိ ခေါ၊ ဘိက္ခဝေ၊ စတူဟိ ဓမ္မေဟိ သမန္နာဂတော ပဏ္ဍိတော ဝိယတ္တော သပ္ပုရိသော အက္ခတံ အနုပဟတံ အတ္တာနံ ပရိဟရတိ၊ အနဝဇ္ဇော စ ဟောတိ အနနုဝဇ္ဇော ဝိညူနံ၊ ဗဟုဉ္စ ပုညံ ပသဝတီ’’တိ. ဒုတိယံ.

၃. အကတညုတာသုတ္တံ

၂၂၃. ‘‘စတူဟိ၊ ဘိက္ခဝေ၊ ဓမ္မေဟိ သမန္နာဂတော ဗာလော အဗျတ္တော အသပ္ပုရိသော ခတံ ဥပဟတံ အတ္တာနံ ပရိဟရတိ၊ သာဝဇ္ဇော စ ဟောတိ သာနုဝဇ္ဇော ဝိညူနံ၊ ဗဟုဉ္စ အပုညံ ပသဝတိ. ကတမေဟိ စတူဟိ? ကာယဒုစ္စရိတေန၊ ဝစီဒုစ္စရိတေန၊ မနောဒုစ္စရိတေန၊ အကတညုတာ အကတဝေဒိတာ – ဣမေဟိ။ပေ။ ပဏ္ဍိတော။ ကာယသုစရိတေန၊ ဝစီသုစရိတေန၊ မနောသုစရိတေန ကတညုတာကတဝေဒိတာ။ပေ။. တတိယံ.

၄. ပါဏာတိပါတီသုတ္တံ

၂၂၄. ။ ပါဏာတိပါတီ ဟောတိ၊ အဒိန္နာဒါယီ ဟောတိ၊ ကာမေသုမိစ္ဆာစာရီ ဟောတိ၊ မုသာဝါဒီ ဟောတိ။ပေ။ ပါဏာတိပါတာ ပဋိဝိရတော ဟောတိ၊ အဒိန္နာဒါနာ ပဋိဝိရတော ဟောတိ၊ ကာမေသုမိစ္ဆာစာရာ ပဋိဝိရတော ဟောတိ၊ မုသာဝါဒါ ပဋိဝိရတော ဟောတိ။ပေ။. စတုတ္ထံ.

၅. ပဌမမဂ္ဂသုတ္တံ

၂၂၅. ။ မိစ္ဆာဒိဋ္ဌိကော ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါစော ဟောတိ၊ မိစ္ဆာကမ္မန္တော ဟောတိ။ပေ။ သမ္မာဒိဋ္ဌိကော ဟောတိ၊ သမ္မာသင်္ကပ္ပေါ ဟောတိ၊ သမ္မာဝါစော ဟောတိ၊ သမ္မာကမ္မန္တော ဟောတိ။ပေ။. ပဉ္စမံ.

၆. ဒုတိယမဂ္ဂသုတ္တံ

၂၂၆. ။ မိစ္ဆာအာဇီဝေါ ဟောတိ၊ မိစ္ဆာဝါယာမော ဟောတိ၊ မိစ္ဆာသတိ ဟောတိ၊ မိစ္ဆာသမာဓိ ဟောတိ။ပေ။ သမ္မာအာဇီဝေါ ဟောတိ၊ သမ္မာဝါယာမော ဟောတိ၊ သမ္မာသတိ ဟောတိ၊ သမ္မာသမာဓိ ဟောတိ။ပေ။. ဆဋ္ဌံ.

၇. ပဌမဝေါဟာရပထသုတ္တံ

၂၂၇. ။ အဒိဋ္ဌေ ဒိဋ္ဌဝါဒီ ဟောတိ၊ အသုတေ သုတဝါဒီ ဟောတိ၊ အမုတေ မုတဝါဒီ ဟောတိ၊ အဝိညာတေ ဝိညာတဝါဒီ ဟောတိ။ပေ။ အဒိဋ္ဌေ အဒိဋ္ဌဝါဒီ ဟောတိ၊ အသုတေ အသုတဝါဒီ ဟောတိ၊ အမုတေ အမုတဝါဒီ ဟောတိ၊ အဝိညာတေ အဝိညာတဝါဒီ ဟောတိ။ပေ။. သတ္တမံ.

၈. ဒုတိယဝေါဟာရပထသုတ္တံ

၂၂၈. ။ ဒိဋ္ဌေ အဒိဋ္ဌဝါဒီ ဟောတိ၊ သုတေ အသုတဝါဒီ ဟောတိ၊ မုတေ အမုတဝါဒီ ဟောတိ၊ ဝိညာတေ အဝိညာတဝါဒီ ဟောတိ။ပေ။ ဒိဋ္ဌေ ဒိဋ္ဌဝါဒီ ဟောတိ၊ သုတေ သုတဝါဒီ ဟောတိ၊ မုတေ မုတဝါဒီ ဟောတိ၊ ဝိညာတေ ဝိညာတဝါဒီ ဟောတိ။ပေ။. အဋ္ဌမံ.

၉. အဟိရိကသုတ္တံ

၂၂၉. ။ အဿဒ္ဓေါ ဟောတိ၊ ဒုဿီလော ဟောတိ၊ အဟိရိကော ဟောတိ၊ အနောတ္တပ္ပီ ဟောတိ။ပေ။ သဒ္ဓေါ ဟောတိ၊ သီလဝါ ဟောတိ၊ ဟိရိမာ ဟောတိ၊ ဩတ္တပ္ပီ ဟောတိ။ပေ။. နဝမံ.

၁၀. ဒုပ္ပညသုတ္တံ

၂၃၀. ။ အဿဒ္ဓေါ ဟောတိ၊ ဒုဿီလော ဟောတိ၊ ကုသီတော ဟောတိ၊ ဒုပ္ပညော ဟောတိ။ပေ။ သဒ္ဓေါ ဟောတိ၊ သီလဝါ ဟောတိ၊ အာရဒ္ဓဝီရိယော ဟောတိ၊ ပညဝါ ဟောတိ – ဣမေဟိ ခေါ၊ ဘိက္ခဝေ၊ စတူဟိ ဓမ္မေဟိ သမန္နာဂတော ပဏ္ဍိတော ဝိယတ္တော သပ္ပုရိသော အက္ခတံ အနုပဟတံ အတ္တာနံ ပရိဟရတိ၊ အနဝဇ္ဇော စ ဟောတိ အနနုဝဇ္ဇော ဝိညူနံ၊ ဗဟုဉ္စ ပုညံ ပသဝတီ’’တိ. ဒသမံ.

၁၁. ကဝိသုတ္တံ

၂၃၁. ‘‘စတ္တာရောမေ၊ ဘိက္ခဝေ၊ ကဝီ. ကတမေ စတ္တာရော? စိန္တာကဝိ၊ သုတကဝိ၊ အတ္ထကဝိ၊ ပဋိဘာနကဝိ – ဣမေ ခေါ၊ ဘိက္ခဝေ၊ စတ္တာရော ကဝီ’’တိ. ဧကာဒသမံ.

ဒုစ္စရိတဝဂ္ဂေါ တတိယော.