၁. ပရိသာသုတ္တံ

၂၁၁. ‘‘စတ္တာရောမေ၊ ဘိက္ခဝေ၊ ပရိသဒူသနာ. ကတမေ စတ္တာရော? ဘိက္ခု၊ ဘိက္ခဝေ [ဣဓ ဘိက္ခဝေ ဘိက္ခု (ပီ. က.)]၊ ဒုဿီလော ပါပဓမ္မော ပရိသဒူသနော၊ ဘိက္ခုနီ၊ ဘိက္ခဝေ၊ ဒုဿီလာ ပါပဓမ္မာ ပရိသဒူသနာ၊ ဥပါသကော၊ ဘိက္ခဝေ၊ ဒုဿီလော ပါပဓမ္မော ပရိသဒူသနော၊ ဥပါသိကာ၊ ဘိက္ခဝေ၊ ဒုဿီလာ ပါပဓမ္မာ ပရိသဒူသနာ. ဣမေ ခေါ၊ ဘိက္ခဝေ၊ စတ္တာရော ပရိသဒူသနာ.

‘‘စတ္တာရောမေ၊ ဘိက္ခဝေ၊ ပရိသသောဘနာ. ကတမေ စတ္တာရော? ဘိက္ခု၊ ဘိက္ခဝေ၊ သီလဝါ ကလျာဏဓမ္မော ပရိသသောဘနော၊ ဘိက္ခုနီ၊ ဘိက္ခဝေ၊ သီလဝတီ ကလျာဏဓမ္မာ ပရိသသောဘနာ၊ ဥပါသကော၊ ဘိက္ခဝေ၊ သီလဝါ ကလျာဏဓမ္မော ပရိသသောဘနော၊ ဥပါသိကာ၊ ဘိက္ခဝေ၊ သီလဝတီ ကလျာဏဓမ္မာ ပရိသသောဘနာ. ဣမေ ခေါ၊ ဘိက္ခဝေ၊ စတ္တာရော ပရိသသောဘနာ’’တိ. ပဌမံ.