၂. အဿဒ္ဓသုတ္တံ

၂၀၂. ‘‘အသပ္ပုရိသဉ္စ ဝေါ၊ ဘိက္ခဝေ၊ ဒေသေဿာမိ၊ အသပ္ပုရိသေန အသပ္ပုရိသတရဉ္စ၊ သပ္ပုရိသဉ္စ၊ သပ္ပုရိသေန သပ္ပုရိသတရဉ္စ. တံ သုဏာထ။ပေ။.

‘‘ကတမော စ၊ ဘိက္ခဝေ၊ အသပ္ပုရိသော? ဣဓ၊ ဘိက္ခဝေ၊ ဧကစ္စော အဿဒ္ဓေါ ဟောတိ၊ အဟိရိကော ဟောတိ၊ အနောတ္တပ္ပီ ဟောတိ၊ အပ္ပဿုတော ဟောတိ၊ ကုသီတော ဟောတိ၊ မုဋ္ဌဿတိ ဟောတိ၊ ဒုပ္ပညော ဟောတိ. အယံ ဝုစ္စတိ၊ ဘိက္ခဝေ၊ အသပ္ပုရိသော.

‘‘ကတမော စ၊ ဘိက္ခဝေ၊ အသပ္ပုရိသေန အသပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ အဿဒ္ဓေါ ဟောတိ၊ ပရဉ္စ အဿဒ္ဓိယေ [အသဒ္ဓါယ (က.)] သမာဒပေတိ၊ အတ္တနာ စ အဟိရိကော ဟောတိ၊ ပရဉ္စ အဟိရိကတာယ သမာဒပေတိ၊ အတ္တနာ စ အနောတ္တပ္ပီ ဟောတိ၊ ပရဉ္စ အနောတ္တပ္ပေ သမာဒပေတိ၊ အတ္တနာ စ အပ္ပဿုတော ဟောတိ၊ ပရဉ္စ အပ္ပဿုတေ သမာဒပေတိ၊ အတ္တနာ စ ကုသီတော ဟောတိ၊ ပရဉ္စ ကောသဇ္ဇေ သမာဒပေတိ၊ အတ္တနာ စ မုဋ္ဌဿတိ ဟောတိ၊ ပရဉ္စ မုဋ္ဌဿစ္စေ [မုဋ္ဌသစ္စေ (သီ. သျာ. ကံ. ပီ.)] သမာဒပေတိ၊ အတ္တနာ စ ဒုပ္ပညော ဟောတိ၊ ပရဉ္စ ဒုပ္ပညတာယ သမာဒပေတိ. အယံ ဝုစ္စတိ၊ ဘိက္ခဝေ၊ အသပ္ပုရိသေန အသပ္ပုရိသတရော.

‘‘ကတမော စ၊ ဘိက္ခဝေ၊ သပ္ပုရိသော? ဣဓ၊ ဘိက္ခဝေ၊ ဧကစ္စော သဒ္ဓေါ ဟောတိ၊ ဟိရိမာ ဟောတိ၊ ဩတ္တပ္ပီ ဟောတိ၊ ဗဟုဿုတော ဟောတိ၊ အာရဒ္ဓဝီရိယော ဟောတိ၊ သတိမာ ဟောတိ၊ ပညဝါ ဟောတိ. အယံ ဝုစ္စတိ၊ ဘိက္ခဝေ၊ သပ္ပုရိသော.

‘‘ကတမော စ၊ ဘိက္ခဝေ၊ သပ္ပုရိသေန သပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ သဒ္ဓါသမ္ပန္နော ဟောတိ၊ ပရဉ္စ သဒ္ဓါသမ္ပဒါယ သမာဒပေတိ၊ အတ္တနာ စ ဟိရိမာ ဟောတိ၊ ပရဉ္စ ဟိရိမတာယ [ဟိရိသမ္ပဒါယ (က.)] သမာဒပေတိ၊ အတ္တနာ စ ဩတ္တပ္ပီ ဟောတိ၊ ပရဉ္စ ဩတ္တပ္ပေ သမာဒပေတိ၊ အတ္တနာ စ ဗဟုဿုတော ဟောတိ၊ ပရဉ္စ ဗာဟုသစ္စေ သမာဒပေတိ၊ အတ္တနာ စ အာရဒ္ဓဝီရိယော ဟောတိ၊ ပရဉ္စ ဝီရိယာရမ္ဘေ သမာဒပေတိ၊ အတ္တနာ စ ဥပဋ္ဌိတဿတိ ဟောတိ၊ ပရဉ္စ သတိဥပဋ္ဌာနေ [သတိပဋ္ဌာနေ (သီ. သျာ. ကံ. ပီ.)] သမာဒပေတိ၊ အတ္တနာ စ ပညာသမ္ပန္နော ဟောတိ၊ ပရဉ္စ ပညာသမ္ပဒါယ သမာဒပေတိ. အယံ ဝုစ္စတိ၊ ဘိက္ခဝေ၊ သပ္ပုရိသေန သပ္ပုရိသတရော’’တိ. ဒုတိယံ.