၉. တဏှာသုတ္တံ

၁၉၉. ဘဂဝါ ဧတဒဝေါစ – ‘‘တဏှံ ဝေါ၊ ဘိက္ခဝေ၊ ဒေသေဿာမိ ဇာလိနိံ သရိတံ ဝိသဋံ ဝိသတ္တိကံ၊ ယာယ အယံ လောကော ဥဒ္ဓသ္တော ပရိယောနဒ္ဓေါ တန္တာကုလကဇာတော ဂုလာဂုဏ္ဌိကဇာတော [ကုလာဂုဏ္ဌိကဇာတော (သီ. သျာ. ကံ. ပီ.) အ. နိ. အဋ္ဌ. ၂.၄.၁၉၉] မုဉ္ဇပဗ္ဗဇဘူတော အပါယံ ဒုဂ္ဂတိံ ဝိနိပါတံ သံသာရံ နာတိဝတ္တတိ. တံ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘ကတမာ စ သာ၊ ဘိက္ခဝေ၊ တဏှာ ဇာလိနီ သရိတာ ဝိသဋာ ဝိသတ္တိကာ၊ ယာယ အယံ လောကော ဥဒ္ဓသ္တော ပရိယောနဒ္ဓေါ တန္တာကုလကဇာတော ဂုလာဂုဏ္ဌိကဇာတော မုဉ္ဇပဗ္ဗဇဘူတော အပါယံ ဒုဂ္ဂတိံ ဝိနိပါတံ သံသာရံ နာတိဝတ္တတိ? အဋ္ဌာရသ ခေါ ပနိမာနိ၊ ဘိက္ခဝေ၊ တဏှာဝိစရိတာနိ အဇ္ဈတ္တိကဿ ဥပါဒါယ၊ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ.

‘‘ကတမာနိ အဋ္ဌာရသ တဏှာဝိစရိတာနိ အဇ္ဈတ္တိကဿ ဥပါဒါယ? အသ္မီတိ၊ ဘိက္ခဝေ၊ သတိ ဣတ္ထသ္မီတိ ဟောတိ၊ ဧဝံသ္မီတိ [ဧဝမသ္မိ (သီ.)၊ ဧဝသ္မိ (သျာ. ကံ. ပီ.) ဝိဘ. ၉၇၃ ပဿိတဗ္ဗံ] ဟောတိ၊ အညထာသ္မီတိ ဟောတိ၊ အသသ္မီတိ ဟောတိ၊ သတသ္မီတိ ဟောတိ၊ သန္တိ ဟောတိ၊ ဣတ္ထံ သန္တိ ဟောတိ၊ ဧဝံ သန္တိ ဟောတိ၊ အညထာ သန္တိ ဟောတိ၊ အပိဟံ [အပိဟ (သီ. ပီ.)၊ အပိ (သျာ. ကံ.)] သန္တိ ဟောတိ၊ အပိဟံ [အပိ (သီ. သျာ. ကံ. ပီ.)] ဣတ္ထံ သန္တိ ဟောတိ၊ အပိဟံ [အပိ (သီ. သျာ. ကံ. ပီ.)] ဧဝံ သန္တိ ဟောတိ၊ အပိဟံ [အပိ (သီ. သျာ. ကံ. ပီ.)] အညထာ သန္တိ ဟောတိ၊ ဘဝိဿန္တိ ဟောတိ၊ ဣတ္ထံ ဘဝိဿန္တိ ဟောတိ၊ ဧဝံ ဘဝိဿန္တိ ဟောတိ၊ အညထာ ဘဝိဿန္တိ ဟောတိ. ဣမာနိ အဋ္ဌာရသ တဏှာဝိစရိတာနိ အဇ္ဈတ္တိကဿ ဥပါဒါယ.

‘‘ကတမာနိ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ? ဣမိနာသ္မီတိ၊ ဘိက္ခဝေ၊ သတိ ဣမိနာ ဣတ္ထသ္မီတိ ဟောတိ၊ ဣမိနာ ဧဝံသ္မီတိ ဟောတိ၊ ဣမိနာ အညထာသ္မီတိ ဟောတိ၊ ဣမိနာ အသသ္မီတိ ဟောတိ၊ ဣမိနာ သတသ္မီတိ ဟောတိ၊ ဣမိနာ သန္တိ ဟောတိ၊ ဣမိနာ ဣတ္ထံ သန္တိ ဟောတိ၊ ဣမိနာ ဧဝံ သန္တိ ဟောတိ၊ ဣမိနာ အညထာ သန္တိ ဟောတိ၊ ဣမိနာ အပိဟံ သန္တိ ဟောတိ၊ ဣမိနာ အပိဟံ ဣတ္ထံ သန္တိ ဟောတိ၊ ဣမိနာ အပိဟံ ဧဝံ သန္တိ ဟောတိ၊ ဣမိနာ အပိဟံ အညထာ သန္တိ ဟောတိ၊ ဣမိနာ ဘဝိဿန္တိ ဟောတိ၊ ဣမိနာ ဣတ္ထံ ဘဝိဿန္တိ ဟောတိ၊ ဣမိနာ ဧဝံ ဘဝိဿန္တိ ဟောတိ၊ ဣမိနာ အညထာ ဘဝိဿန္တိ ဟောတိ. ဣမာနိ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ.

‘‘ဣတိ အဋ္ဌာရသ တဏှာဝိစရိတာနိ အဇ္ဈတ္တိကဿ ဥပါဒါယ၊ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ. ဣမာနိ ဝုစ္စန္တိ၊ ဘိက္ခဝေ၊ ဆတ္တိံသ တဏှာဝိစရိတာနိ. ဣတိ ဧဝရူပါနိ အတီတာနိ ဆတ္တိံသ တဏှာဝိစရိတာနိ၊ အနာဂတာနိ ဆတ္တိံသ တဏှာဝိစရိတာနိ၊ ပစ္စုပ္ပန္နာနိ ဆတ္တိံသ တဏှာဝိစရိတာနိ. ဧဝံ အဋ္ဌသတံ တဏှာဝိစရိတံ ဟောန္တိ.

‘‘အယံ ခေါ သာ၊ ဘိက္ခဝေ၊ တဏှာ ဇာလိနီ သရိတာ ဝိသဋာ ဝိသတ္တိကာ၊ ယာယ အယံ လောကော ဥဒ္ဓသ္တော ပရိယောနဒ္ဓေါ တန္တာကုလကဇာတော ဂုလာဂုဏ္ဌိကဇာတော မုဉ္ဇပဗ္ဗဇဘူတော အပါယံ ဒုဂ္ဂတိံ ဝိနိပါတံ သံသာရံ နာတိဝတ္တတီ’’တိ. နဝမံ.