၈. ဥပကသုတ္တံ

၁၈၈. ဧကံ သမယံ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. အထ ခေါ ဥပကော မဏ္ဍိကာပုတ္တော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဥပကော မဏ္ဍိကာပုတ္တော ဘဂဝန္တံ ဧတဒဝေါစ –

‘‘အဟဉှိ၊ ဘန္တေ၊ ဧဝံဝါဒီ ဧဝံဒိဋ္ဌိ – ‘ယော ကောစိ ပရူပါရမ္ဘံ ဝတ္တေတိ၊ ပရူပါရမ္ဘံ ဝတ္တေန္တော သဗ္ဗော သော [သဗ္ဗသော (သီ. ပီ.)] န ဥပပါဒေတိ. အနုပပါဒေန္တော ဂါရယှော ဟောတိ ဥပဝဇ္ဇော’’’တိ. ‘‘ပရူပါရမ္ဘံ စေ၊ ဥပက၊ ဝတ္တေတိ ပရူပါရမ္ဘံ ဝတ္တေန္တော န ဥပပါဒေတိ၊ အနုပပါဒေန္တော ဂါရယှော ဟောတိ ဥပဝဇ္ဇော. တွံ ခေါ၊ ဥပက၊ ပရူပါရမ္ဘံ ဝတ္တေသိ၊ ပရူပါရမ္ဘံ ဝတ္တေန္တော န ဥပပါဒေသိ၊ အနုပပါဒေန္တော ဂါရယှော ဟောသိ ဥပဝဇ္ဇော’’တိ. ‘‘သေယျထာပိ၊ ဘန္တေ၊ ဥမ္မုဇ္ဇမာနကံယေဝ မဟတာ ပါသေန ဗန္ဓေယျ၊ ဧဝမေဝံ ခေါ အဟံ၊ ဘန္တေ၊ ဥမ္မုဇ္ဇမာနကောယေဝ ဘဂဝတာ မဟတာ ဝါဒပါသေန [မဟတာ ပါသေန (က.)] ဗဒ္ဓေါ’’တိ.

‘‘ဣဒံ အကုသလန္တိ ခေါ၊ ဥပက၊ မယာ ပညတ္တံ. တတ္ထ အပရိမာဏာ ပဒါ အပရိမာဏာ ဗျဉ္ဇနာ အပရိမာဏာ တထာဂတဿ ဓမ္မဒေသနာ – ဣတိပိဒံ အကုသလန္တိ. တံ ခေါ ပနိဒံ အကုသလံ ပဟာတဗ္ဗန္တိ ခေါ၊ ဥပက၊ မယာ ပညတ္တံ. တတ္ထ အပရိမာဏာ ပဒါ အပရိမာဏာ ဗျဉ္ဇနာ အပရိမာဏာ တထာဂတဿ ဓမ္မဒေသနာ – ဣတိပိဒံ အကုသလံ ပဟာတဗ္ဗန္တိ.

‘‘ဣဒံ ကုသလန္တိ ခေါ၊ ဥပက၊ မယာ ပညတ္တံ. တတ္ထ အပရိမာဏာ ပဒါ အပရိမာဏာ ဗျဉ္ဇနာ အပရိမာဏာ တထာဂတဿ ဓမ္မဒေသနာ – ဣတိပိဒံ ကုသလန္တိ. တံ ခေါ ပနိဒံ ကုသလံ ဘာဝေတဗ္ဗန္တိ ခေါ၊ ဥပက၊ မယာ ပညတ္တံ. တတ္ထ အပရိမာဏာ ပဒါ အပရိမာဏာ ဗျဉ္ဇနာ အပရိမာဏာ တထာဂတဿ ဓမ္မဒေသနာ – ဣတိပိဒံ ကုသလံ ဘာဝေတဗ္ဗ’’န္တိ.

အထ ခေါ ဥပကော မဏ္ဍိကာပုတ္တော ဘဂဝတော ဘာသိတံ အဘိနန္ဒိတွာ အနုမောဒိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ယေန ရာဇာ မာဂဓော အဇာတသတ္တု ဝေဒေဟိပုတ္တော တေနုပသင်္ကမိ၊ ဥပသင်္ကမိတွာ ယာဝတကော အဟောသိ ဘဂဝတာ သဒ္ဓိံ ကထာသလ္လာပေါ တံ သဗ္ဗံ ရညော မာဂဓဿ အဇာတသတ္တုဿ ဝေဒေဟိပုတ္တဿ အာရောစေသိ.

ဧဝံ ဝုတ္တေ ရာဇာ မာဂဓော အဇာတသတ္တု ဝေဒေဟိပုတ္တော ကုပိတော အနတ္တမနော ဥပကံ မဏ္ဍိကာပုတ္တံ ဧတဒဝေါစ – ‘‘ယာဝ ဓံသီ ဝတာယံ လောဏကာရဒါရကော ယာဝ မုခရော ယာဝ ပဂဗ္ဗော ယတြ ဟိ နာမ တံ ဘဂဝန္တံ အရဟန္တံ သမ္မာသမ္ဗုဒ္ဓံ အာသာဒေတဗ္ဗံ မညိဿတိ၊ အပေဟိ တွံ၊ ဥပက၊ ဝိနဿ၊ မာ တံ အဒ္ဒသ’’န္တိ. အဋ္ဌမံ.