၃. သုတသုတ္တံ

၁၈၃. ဧကံ သမယံ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. အထ ခေါ ဝဿကာရော ဗြာဟ္မဏော မဂဓမဟာမတ္တော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတာ သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ ဝဿကာရော ဗြာဟ္မဏော မဂဓမဟာမတ္တော ဘဂဝန္တံ ဧတဒဝေါစ –

‘‘အဟဉှိ၊ ဘော ဂေါတမ၊ ဧဝံဝါဒီ ဧဝံဒိဋ္ဌိ [ဧဝံဒိဋ္ဌီ (သဗ္ဗတ္ထ)] – ‘ယော ကောစိ ဒိဋ္ဌံ ဘာသတိ – ဧဝံ မေ ဒိဋ္ဌန္တိ၊ နတ္ထိ တတော ဒေါသော၊ ယော ကောစိ သုတံ ဘာသတိ – ဧဝံ မေ သုတန္တိ၊ နတ္ထိ တတော ဒေါသော၊ ယော ကောစိ မုတံ ဘာသတိ – ဧဝံ မေ မုတန္တိ၊ နတ္ထိ တတော ဒေါသော၊ ယော ကောစိ ဝိညာတံ ဘာသတိ – ဧဝံ မေ ဝိညာတန္တိ၊ နတ္ထိ တတော ဒေါသော’’’တိ.

‘‘နာဟံ၊ ဗြာဟ္မဏ၊ သဗ္ဗံ ဒိဋ္ဌံ ဘာသိတဗ္ဗန္တိ ဝဒါမိ၊ န ပနာဟံ၊ ဗြာဟ္မဏ၊ သဗ္ဗံ ဒိဋ္ဌံ န ဘာသိတဗ္ဗန္တိ ဝဒါမိ၊ နာဟံ၊ ဗြာဟ္မဏ၊ သဗ္ဗံ သုတံ ဘာသိတဗ္ဗန္တိ ဝဒါမိ၊ န ပနာဟံ၊ ဗြာဟ္မဏ၊ သဗ္ဗံ သုတံ န ဘာသိတဗ္ဗန္တိ ဝဒါမိ၊ နာဟံ၊ ဗြာဟ္မဏ၊ သဗ္ဗံ မုတံ ဘာသိတဗ္ဗန္တိ ဝဒါမိ၊ န ပနာဟံ၊ ဗြာဟ္မဏ၊ သဗ္ဗံ မုတံ န ဘာသိတဗ္ဗန္တိ ဝဒါမိ၊ နာဟံ၊ ဗြာဟ္မဏ၊ သဗ္ဗံ ဝိညာတံ ဘာသိတဗ္ဗန္တိ ဝဒါမိ၊ န ပနာဟံ၊ ဗြာဟ္မဏ၊ သဗ္ဗံ ဝိညာတံ န ဘာသိတဗ္ဗန္တိ ဝဒါမိ.

‘‘ယဉှိ၊ ဗြာဟ္မဏ၊ ဒိဋ္ဌံ ဘာသတော အကုသလာ ဓမ္မာ အဘိဝဍ္ဎန္တိ၊ ကုသလာ ဓမ္မာ ပရိဟာယန္တိ၊ ဧဝရူပံ ဒိဋ္ဌံ န ဘာသိတဗ္ဗန္တိ ဝဒါမိ. ယဉ္စ ခွဿ၊ ဗြာဟ္မဏ၊ ဒိဋ္ဌံ အဘာသတော ကုသလာ ဓမ္မာ ပရိဟာယန္တိ၊ အကုသလာ ဓမ္မာ အဘိဝဍ္ဎန္တိ၊ ဧဝရူပံ ဒိဋ္ဌံ ဘာသိတဗ္ဗန္တိ ဝဒါမိ.

‘‘ယဉှိ၊ ဗြာဟ္မဏ၊ သုတံ ဘာသတော အကုသလာ ဓမ္မာ အဘိဝဍ္ဎန္တိ၊ ကုသလာ ဓမ္မာ ပရိဟာယန္တိ၊ ဧဝရူပံ သုတံ န ဘာသိတဗ္ဗန္တိ ဝဒါမိ. ယဉ္စ ခွဿ၊ ဗြာဟ္မဏ၊ သုတံ အဘာသတော ကုသလာ ဓမ္မာ ပရိဟာယန္တိ၊ အကုသလာ ဓမ္မာ အဘိဝဍ္ဎန္တိ၊ ဧဝရူပံ သုတံ ဘာသိတဗ္ဗန္တိ ဝဒါမိ.

‘‘ယဉှိ၊ ဗြာဟ္မဏ၊ မုတံ ဘာသတော အကုသလာ ဓမ္မာ အဘိဝဍ္ဎန္တိ၊ ကုသလာ ဓမ္မာ ပရိဟာယန္တိ၊ ဧဝရူပံ မုတံ န ဘာသိတဗ္ဗန္တိ ဝဒါမိ. ယဉ္စ ခွဿ၊ ဗြာဟ္မဏ၊ မုတံ အဘာသတော ကုသလာ ဓမ္မာ ပရိဟာယန္တိ၊ အကုသလာ ဓမ္မာ အဘိဝဍ္ဎန္တိ၊ ဧဝရူပံ မုတံ ဘာသိတဗ္ဗန္တိ ဝဒါမိ.

‘‘ယဉှိ၊ ဗြာဟ္မဏ၊ ဝိညာတံ ဘာသတော အကုသလာ ဓမ္မာ အဘိဝဍ္ဎန္တိ၊ ကုသလာ ဓမ္မာ ပရိဟာယန္တိ၊ ဧဝရူပံ ဝိညာတံ န ဘာသိတဗ္ဗန္တိ ဝဒါမိ. ယဉ္စ ခွဿ၊ ဗြာဟ္မဏ၊ ဝိညာတံ အဘာသတော ကုသလာ ဓမ္မာ ပရိဟာယန္တိ၊ အကုသလာ ဓမ္မာ အဘိဝဍ္ဎန္တိ၊ ဧဝရူပံ ဝိညာတံ ဘာသိတဗ္ဗန္တိ ဝဒါမီ’’တိ.

အထ ခေါ ဝဿကာရော ဗြာဟ္မဏော မဂဓမဟာမတ္တော ဘဂဝတော ဘာသိတံ အဘိနန္ဒိတွာ အနုမောဒိတွာ ဥဋ္ဌာယာသနာ ပက္ကာမီတိ. တတိယံ.